ঢাকা: বাংলাদেশৰ উচ্ছেদিত প্ৰধানমন্ত্ৰী শ্বেখ হাছিনাৰ আৱামী লীগ দলৰ এক লাখৰো অধিক সদস্য ভাৰতলৈ পলায়ন কৰিছে । এই খবৰ মঙলবাৰে ইয়াৰ অন্তৱৰ্তীকালীন চৰকাৰৰ তথ্য উপদেষ্টা মহফুজ আলমে নিশ্চিত কৰে । বাংলাদেশৰ এটা নিউজ পৰ্টেল bdnews24.com ৰ মতে, হাছিনাৰ কাৰ্যকালত নিৰুদ্দেশ বা নিহত হোৱা বুলি অভিযোগ উত্থাপন হোৱা লোকৰ পৰিয়ালে অংশগ্ৰহণ কৰা ঢাকাত অনুষ্ঠিত ঈদৰ অনুষ্ঠানত আলমে এই মন্তব্য কৰে । তেজগাঁও অঞ্চলত এটা মানৱ অধিকাৰ সংগঠন ‘মেয়ৰ ডাক’ৰ উদ্যোগত এই অনুষ্ঠানৰ আয়োজন কৰা হৈছিল ।
বাংলাদেশৰ চৰকাৰী সংবাদ সংস্থা বি এছ এছৰ মতে, হাছিনাক সমালোচনা কৰি মহফুজে কয় যে পিতৃ-মাতৃৰ হত্যাৰ প্ৰতিশোধ ল’বলৈ হাছিনা বলপূৰ্বকভাৱে নিৰুদ্দেশ হৈ মানুহক হত্যা কৰিছিল । তেওঁ আৰু কয় যে বলপূৰ্বকভাৱে নিৰুদ্দেশ কৰাৰ বেছিভাগ কাণ্ডই ২০১৩ আৰু ২০১৪ চনত সংঘটিত হৈছিল, যেতিয়া মানুহে নিজৰ ভোটাধিকাৰৰ বাবে যুঁজি আছিল । এই কাৰ্যৰ আঁৰৰ মূল উদ্দেশ্য আছিল নিৰ্বাচনী ব্যৱস্থা ধ্বংস কৰা । উপদেষ্টাগৰাকীয়ে কয় যে ইতিমধ্যে চৰকাৰে বলপূৰ্বক নিৰুদ্দেশৰ গোচৰৰ তদন্তৰ বাবে আয়োগ গঠন কৰিছে ।
অন্তৱৰ্তীকালীন চৰকাৰৰ তথ্য উপদেষ্টা আলমে কয় যে আয়োগৰ পৰামৰ্শৰ ভিত্তিত বলপূৰ্বক নিৰুদ্দেশৰ সৈতে জড়িত কেইবাজনো লোকৰ বিৰুদ্ধে গ্ৰেপ্তাৰী পৰোৱানা জাৰি কৰা হৈছে । ইয়াৰ বাহিৰেও আন বহু লোকৰ বিৰুদ্ধে এতিয়াও তদন্ত অব্যাহত আছে । পূৰ্বৰ চৰকাৰক আক্ৰমণ কৰি তেওঁ কয় যে আৱামী লীগৰ ৰাজনৈতিক বিৰোধিতা কৰাসকলক সন্ত্ৰাসবাদী আৰু উগ্ৰপন্থী বুলি লেবেল লগাই বলপূৰ্বকভাৱে নিৰুদ্দেশ কৰা হৈছিল । মাহফুজ আলমে কয় যে তেওঁলোকৰ পৰিয়ালেও ভয় আৰু ভাবুকিৰ সন্মুখীন হৈছে আৰু এনে নিৰুদ্দেশৰ বাবে বিভিন্ন চৰকাৰী সংস্থা ব্যৱহাৰ কৰা হৈছিল ।
উপদেষ্টাগৰাকীয়ে দাবী কৰে যে হাছিনাই এতিয়াও ভাৰতত বাস কৰি দেশৰ বিৰুদ্ধে ষড়যন্ত্ৰ ৰচনা কৰি আছে, যিটো অতি দুৰ্ভাগ্যজনক । তেওঁ আৱামী লীগক ‘মাফিয়া গোট‘ হিচাপে কাম কৰাৰ অভিযোগ উত্থাপন কৰি বাংলাদেশত দলটোক কেতিয়াও ৰাজনৈতিক স্থান দখল কৰিবলৈ দিয়া নহ'ব বুলি প্ৰতিজ্ঞা কৰে । তেওঁ কয়- "ভাৰতে তেওঁক আৰু তেওঁৰ সন্ত্ৰাসবাদী বাহিনীক আশ্ৰয় দিয়াৰ সিদ্ধান্ত লোৱাটো দুৰ্ভাগ্যজনক । আমি জানিব পাৰিছো যে প্ৰায় এক লাখ আৱামী লীগৰ সদস্যই তাত আশ্ৰয় লৈছে ।"
উল্লেখ্য যে, যোৱা বছৰৰ ৫ আগষ্টত ছাত্ৰ-ছাত্ৰীৰ নেতৃত্বত হিংসাত্মক জনবিদ্ৰোহত হাছিনাৰ ১৬ বছৰীয়া আৱামী লীগ চৰকাৰখন ওফৰাই পেলোৱা হৈছিল । তেতিয়াৰ পৰাই ৭৭ বছৰীয়া হাছিনাই বাংলাদেশ এৰি গোপনে ভাৰতত বাস কৰি আছে । পদৰ পৰা অপসাৰণৰ পিছৰে পৰা তেওঁৰ বিৰুদ্ধে গণহত্যা আৰু দুৰ্নীতিকে ধৰি ১০০ৰো অধিক গোচৰ চলি আছে ।
