চাইবাৰ আক্ৰমণৰ বাবে মাস্ক-ট্ৰাম্পৰ সাক্ষাৎকাৰ বিলম্ব - TRUMP MUSK INTERVIEW

ইণ্টাৰনেশ্যনেল ডেস্ক,১৩ আগষ্ট : এক্সৰ স্বত্বাধিকাৰী ইলন মাস্কে সোমবাৰে (ভাৰতত মঙলবাৰে পুৱা) কয় যে ডনাল্ড ট্ৰাম্পৰ সৈতে বহু চৰ্চিত সাক্ষাৎকাৰ চাইবাৰ আক্ৰমণৰ ফলত প্ৰভাৱিত হৈছে । বিশ্বৰ আটাইতকৈ ধনী ব্যক্তিজনে এক্সত লিখিছিল, "এক্সৰ ওপৰত এক বৃহৎ ডিডিঅ'এছ আক্ৰমণ হোৱা দেখা গৈছে । ইয়াক বন্ধ কৰাৰ বাবে কাম কৰি থকা হৈছে ।" যাৰ ফলত তেওঁ লাইভষ্ট্ৰীমিং দৰ্শকৰ সংখ্যা হ্ৰাস কৰিবলৈ বাধ্য হয় । এই সাক্ষাৎকাৰ পলম হৈছিল কিয়নো চাইবাৰ আক্ৰমণে ব্যৱহাৰকাৰীসকলক লাইভষ্ট্ৰীমৰ পৰা আঁতৰাই ৰাখিছিল । মাস্কে কয়, "পৰিস্থিতি অতি বেয়া, আমি কম সংখ্যক লাইভষ্ট্ৰীমিং দৰ্শকৰ সৈতে আগবাঢ়িম ।"

এক্সত ডিডিঅ'এছ আক্ৰমণ

আন এটা পোষ্টত তেওঁ কৈছিল: "আমি আজি পূৰ্বে ৮ মিলিয়ন লাইভষ্ট্ৰীমিং দৰ্শকৰ সৈতে প্ৰণালীটো পৰীক্ষা কৰিছিলো ।" আমি ৮:৩০ বজাত কম সংখ্যক লাইভষ্ট্ৰীমিং দৰ্শকৰ সৈতে আগবাঢ়িম আৰু তাৰ ঠিক পিচতে অসম্পাদিত অডিঅ'টো পোষ্ট কৰিম ।"

উল্লেখ্য যে সামাজিক মাধ্যম প্লেটফৰ্ম এক্সৰ ব্যৱহাৰকাৰীসকলে সোমবাৰে নিশা প্লেটফৰ্মত ট্ৰাম্পৰ সৈতে এলন মাস্কৰ লাইভষ্ট্ৰীমিং সাক্ষাৎকাৰ চোৱাৰ সময়ত বহুতো সমস্যাৰ সন্মুখীন হৈছিল । লাইভষ্ট্ৰীমিং সাক্ষাৎকাৰটো সন্ধিয়া ৮ বজাত আৰম্ভ হোৱাৰ কথা আছিল যদিও কাৰিকৰী বিজুতিৰ বাবে বিলম্ব হৈছিল আৰু এই সম্প্ৰচাৰ ৮.৪২ বজাত আৰম্ভ হৈছিল ।

ইলন মাস্কে পূৰ্বে কৈছিল যে তেওঁ ডেমক্ৰেটক ভোট দিছিল । কিন্তু যোৱা মাহত ৰিপাব্লিকান দলৰ সম্ভাব্য প্ৰাৰ্থী ডনাল্ড ট্ৰাম্পক বন্দুকধাৰীয়ে আক্ৰমণ কৰাৰ পিচৰে পৰা ট্ৰাম্পৰ স্থিতি কিছু সলনি হৈছে ।

২০২১ চনৰ জানুৱাৰীত ট্ৰাম্পৰ সমৰ্থকৰ এটা দলে ইউএছ কেপিটেলত আক্ৰমণ কৰিছিল । তাৰ পিচতে ট্ৰাম্পৰ এক্সৰ (পূৰ্বতে টুইটাৰ) একাউণ্ট বন্ধ কৰা হৈছিল, কিন্তু মাস্কে পিচত সেয়া পুনৰ স্থাপন কৰে । সোমবাৰে দুয়োগৰাকী ব্যক্তিৰ সাক্ষাৎকাৰৰ উদ্দেশ্য আছিল ট্ৰাম্পৰ প্ৰচাৰ অভিযানক পুনৰুজ্জীৱিত কৰাত সহায় কৰা ।

লগতে পঢ়ক :হঠাৎ ভোটাৰৰ মাজত জনপ্ৰিয়তা বৃদ্ধি কমলা হেৰিছৰ: সমীক্ষা - US Presidential elections