টেল আভিভ: ইজৰাইলৰ বায়ুসেনাই মঙলবাৰে গাজাত এক বৃহৎ আক্ৰমণ সংঘটিত কৰে । তথ্য অনুসৰি ১৭ জানুৱাৰীৰ যুদ্ধবিৰতিৰ পিছত এতিয়ালৈকে এইটোৱেই হৈছে সৰ্ববৃহৎ আক্ৰমণ । এই আক্ৰমণৰ পিছত গাজাৰ স্বাস্থ্য মন্ত্ৰালয়ে কয় যে ইজৰাইলে পুৱাৰ ভাগত চলোৱা কেইবাটাও বিমান আক্ৰমণত প্ৰায় ২৩৫ জন লোকৰ মৃত্যু হোৱাৰ খবৰ পোৱা গৈছে । বিষয়াসকলে আৰু কয় যে জানুৱাৰী মাহত যুদ্ধবিৰতি কাৰ্যকৰী হোৱাৰ পিছত অঞ্চলটোৰ আটাইতকৈ ভয়াৱহ আক্ৰমণত ইজৰাইলে হামাছৰ ডজন ডজন ঘাটিক লক্ষ্যক কৰি লৈছিল ।
প্ৰধানমন্ত্ৰী বেঞ্জামিন নেতান্যাহুৱে কয় যে যুদ্ধবিৰতি বৃদ্ধিৰ বাবে চলি থকা আলোচনাত অগ্ৰগতিৰ অভাৱৰ বাবেই তেওঁ এই নিৰ্দেশ দিছে । অৱশ্যে এইয়া স্পষ্ট নহয় যে, এই আক্ৰমণ এককালীন হেঁচা কৌশল নে ১৭ মাহ পুৰণি যুদ্ধ পুনৰ আৰম্ভ কৰা প্ৰক্ৰিয়া ।
ইজৰাইলৰ প্ৰধানমন্ত্ৰীৰ কাৰ্যালয়ে এক বিবৃতি প্ৰকাশ কৰি কয় যে যুদ্ধবিৰতি বৃদ্ধিৰ বাবে আমেৰিকাৰ প্ৰস্তাৱ নাকচ কৰাৰ পিছত গাজাত হামাছৰ বিৰুদ্ধে পুনৰ আক্ৰমণ সংঘটিত কৰা হৈছে । ইজৰাইলৰ প্ৰতিৰক্ষা মন্ত্ৰী ইজৰাইল কাটজে কয় যে গাজাত ‘যুদ্ধ পুনৰ আৰম্ভ হৈছে’ আৰু সকলো পণবন্দীক মুকলি নকৰালৈকে আক্ৰমণ অব্যাহত থাকিব । প্ৰতিৰক্ষা মন্ত্ৰীয়ে আৰু কয় যে যদি পণবন্দীসকলক মুকলি কৰি দিয়া নহয় তেন্তে ‘গাজাত নৰকৰ দুৱাৰ মুকলি হ’ব’ ।
তেওঁ কয় যে যেতিয়ালৈকে আমাৰ সকলো পণবন্দী ঘৰলৈ উভতি নাহে আৰু আমি যুদ্ধৰ সকলো লক্ষ্যত উপনীত নহওঁ তেতিয়ালৈকে আমি যুদ্ধ বন্ধ নকৰো । গাজাৰ স্বাস্থ্য মন্ত্ৰালয়ে প্ৰকাশ কৰা অনুসৰি মঙলবাৰে পুৱা গাজা ষ্ট্ৰিপত বিমান আক্ৰমণত কমেও ২৩৫ জন লোক নিহত হয় । ইজৰাইলে কয় যে জানুৱাৰী মাহত যুদ্ধবিৰতি কাৰ্যকৰী হোৱাৰ পিছত অঞ্চলটোৰ হামাছৰ লক্ষ্যত এইটোৱেই আটাইতকৈ ভয়াৱহ আক্ৰমণ । উল্লেখ্য যে, ইজৰাইলে মঙলবাৰে পুৱা গাজা ষ্ট্ৰিপত ধাৰাবাহিক বিমান আক্ৰমণ চলাই কয় যে জানুৱাৰী মাহত যুদ্ধবিৰতি কাৰ্যকৰী হোৱাৰ পিছত অঞ্চলটোৰ হামাছৰ ঘাটিত এইটোৱেই আটাইতকৈ ডাঙৰ আক্ৰমণ ।
হামাছে এই আক্ৰমণক সমালোচনা কৰে
ইজৰাইলৰ আক্ৰমণক সমালোচনা কৰে হামাছৰ এজন বিষয়া তাহিৰ নুনুয়ে । তেওঁ কয় যে আন্তঃৰাষ্ট্ৰীয় সমাজ নৈতিক পৰীক্ষাৰ সন্মুখীন হৈছে । হয় দখলদাৰী বাহিনীয়ে সংঘটিত অপৰাধৰ প্ৰতি ঘূৰি অহাৰ অনুমতি দিয়ে নহয় গাজাত নিৰীহ লোকৰ বিৰুদ্ধে আগ্ৰাসন আৰু যুদ্ধৰ অন্ত পেলোৱাৰ প্ৰতিশ্ৰুতি কাৰ্যকৰী কৰে । কিন্তু দুসপ্তাহ পূৰ্বে প্ৰথম পৰ্যায়ৰ যুদ্ধবিৰতি শেষ হোৱাৰ পিছৰে পৰা দ্বিতীয় পৰ্যায়ৰ বাবে কেনেকৈ আগবাঢ়িব সেই সন্দৰ্ভত দুয়োপক্ষই একমত হ’ব পৰা নাই, যাৰ লক্ষ্য হৈছে বাকী থকা প্ৰায় ৬০ জন পণবন্দীক মুকলি কৰি যুদ্ধখন সম্পূৰ্ণৰূপে শেষ কৰা । নেতান্যাহুৱে বাৰে বাৰে যুদ্ধ পুনৰ আৰম্ভ কৰাৰ ভাবুকি দিছে আৰু চলিত মাহৰ আৰম্ভণিতে হামাছক হেঁচা প্ৰয়োগ কৰিবলৈ ঘেৰাও কৰা অঞ্চলটোলৈ সকলো খাদ্য আৰু সাহায্য প্ৰদান বন্ধ কৰি দিছিল ।
