আজিৰ ডিজিটেল জগতত স্মাৰ্টফোন আমাৰ সকলো জীৱনৰ এক গুৰুত্বপূৰ্ণ অংগ হৈ পৰিছে ৷ পুৱা সাৰ পোৱাৰ পৰা ৰাতি শুবলৈ যোৱালৈকে আমাৰ বেছিভাগ সময় ম’বাইল ফোন, লেপটপ, কম্পিউটাৰ আদি ব্যৱহাৰ কৰা হয় ৷ ছ’চিয়েল মিডিয়া, গেম, আড্ডা আৰু ভিডিঅ’ চোৱাৰ অভ্যাসে ঘণ্টাৰ পিছত ঘণ্টা ধৰি পৰ্দাৰ সন্মুখত বহি থাকে ৷ গোটেই দিনটো ফোন ব্যৱহাৰ কৰাৰ পিছত মগজুৱে গধুৰ আৰু ভাগৰুৱা অনুভৱ কৰিবলৈ আৰম্ভ কৰে ৷ যাৰ ফলত মানসিক স্বাস্থ্যৰ ওপৰত নেতিবাচক প্ৰভাৱ পৰে ৷ আজি জানো আহক সকলো সময়তে অনবৰতে ফোন ব্যৱহাৰ কৰিলে কেনেধৰণৰ সমস্যাই দেখা দিব পাৰে ?
ঘণ্টাৰ পিছত ঘণ্টা ধৰি ফোন ব্যৱহাৰ কৰাৰ পাৰ্শ্বক্ৰিয়া
ফোনটো বেছিকৈ ব্যৱহাৰ কৰিলে আপোনাৰ স্বাস্থ্যৰ ওপৰত বেয়া প্ৰভাৱ পৰিব পাৰে ৷ ষ্টেনফৰ্ড চেণ্টাৰ অন লংভিটিৰ এক প্ৰতিবেদনত প্ৰকাশ পাইছে যে অত্যধিক ফোন ব্যৱহাৰৰ ফলত চকুৰ টান আৰু ডিঙিৰ বিষ, মানসিক স্বাস্থ্যৰ ওপৰত নেতিবাচক প্ৰভাৱ, মগজুৰ ক্ষতি আৰু সামাজিক বিচ্ছিন্নতা হয় ৷ পুৱা বিচনাত এঘণ্টা ধৰি ফোনত স্ক্ৰল কৰিলে আপোনাৰ স্বাস্থ্যৰ ওপৰত বেয়াকৈ প্ৰভাৱ পৰিব পাৰে ৷
চকু দুটা ফোনত অনবৰতে ৰাখিলে হ’ব পাৰে আপোনাৰ মগজুৰ ক্ষতি
এই প্ৰতিবেদন অনুসৰি মানুহে যিদৰে ফোনত অধিক সময় কটাব ধৰিছে, ইয়াৰ প্ৰভাৱ তেওঁলোকৰ শিক্ষণ ক্ষমতাত পৰিছে ৷ ইয়াৰ বাবে স্মৃতিশক্তিও কমি যায় কেৱল ইয়াৰ পৰাই নহয়, স্নায়ুৰ অৱক্ষয়ৰ আশংকাও থাকে ৷ ১৮ৰ পৰা ২৫ বছৰ বয়সৰ ভিতৰত বেছি সময় পৰ্দালৈ চাই থাকিলে মগজুৰ আটাইতকৈ বাহিৰৰ স্তৰ অৰ্থাৎ মস্তিষ্কৰ কৰ্টেক্স পাতল হৈ পৰিব পাৰে ৷ এই স্তৰে স্মৃতিশক্তি আৰু জ্ঞানমূলক কাৰ্য্য উন্নত কৰাত সহায় কৰে ৷ ফোন ব্যৱহাৰৰ বাবেও ফ’কাচ কমি যায় ৷ ইয়াৰ উপৰিও টোপনিও প্ৰভাৱিত হয়, যাৰ ফলত মানসিক চাপ আৰু উদ্বেগ বৃদ্ধি পায় ৷
কেনেকৈ ফোনটো বেছি ব্যৱহাৰ নকৰিব
১) প্ৰথমতে আপুনি দৈনিক কিমান ঘণ্টা ফোন ব্যৱহাৰ কৰি আছে সেইটো জনাটো গুৰুত্বপূৰ্ণ ৷ আপোনাৰ ফোনটোৰ স্ক্ৰীণ টাইম ছেটিংছ বা যিকোনো এপৰ সহায়ত আপুনি আপোনাৰ ফোন ব্যৱহাৰৰ ওপৰত চকু ৰাখিব পাৰে ৷
২) বিশেষকৈ পুৱা আৰু ৰাতি ফোন ব্যৱহাৰৰ বাবে এটা নিৰ্দিষ্ট সময় নিৰ্ধাৰণ কৰক ৷
৩) ছ’চিয়েল মিডিয়া আৰু গেমিং এপত সময়সীমা নিৰ্ধাৰণ কৰক ৷
৪) আপোনাৰ ফোনটো অপ্ৰয়োজনীয়ভাৱে স্ক্ৰল নকৰিবলৈ, Do Not Disturb মোড অন কৰক ৷
৫) শুবলৈ যোৱাক কমেও ১ ঘণ্টা আগতে ফোনটো আঁতৰত ৰাখক, ডাইনিং টেবুলত ফোন ব্যৱহাৰ নকৰিব, কাম বা পঢ়াৰ সময়ত ফোনটো আঁতৰত ৰাখক ৷
৬) আজৰি সময়ত ফুৰিবলৈ যাওক, ব্যায়াম কৰক বা যোগাসন কৰক ৷ নতুন চখ এটা লওক, যেনে কিতাপ পঢ়া, ছবি অঁকা বা সংগীত শুনা ৷
৭) বন্ধু-বান্ধৱ আৰু পৰিয়ালৰ সৈতে অধিক সময় কটাওক, যাতে আপুনি ফোনটোৰ পৰা আঁতৰি থাকিব পাৰে ৷
৮) সপ্তাহত অন্তত: এটা দিন ফোন ফ্ৰী দিন হিচাপে ৰাখক ৷ ছ’চিয়েল মিডিয়াত বিৰতি লওক ৷
উৎস:-https://pmc.ncbi.nlm.nih.gov/articles/PMC6449671/
(সতৰ্কীকৰণ: এই প্ৰতিবেদনত আপোনাক দিয়া সকলো স্বাস্থ্য তথা জীৱনশৈলী সম্পৰ্কীয় যিকোনো তথ্য আৰু পৰামৰ্শ কেৱল আপোনাৰ সাধাৰণ তথ্যৰ বাবেহে আগবঢ়োৱা হৈছে । আমি এই তথ্য বৈজ্ঞানিক গৱেষণা, অধ্যয়ন, চিকিৎসা আৰু স্বাস্থ্য পেছাদাৰী পৰামৰ্শৰ ভিত্তিত প্ৰদান কৰিছো । আপুনি এই উপায় বা পদ্ধতি অনুসৰণ কৰাৰ আগতে এই বিষয়ে বিতংভাৱে জনাটো উচিত তথা আপোনাৰ ব্যক্তিগত চিকিৎসকৰ পৰামৰ্শ গ্ৰহণ কৰাটো উচিত ।)
লগতে পঢ়ক
