আপুনি কমকৈ শুৱে নেকি ? তেন্তে সাৱধান!

সুস্থ হৈ থাকিবলৈ ভাল টোপনি অতি প্ৰয়োজনীয় । স্বাস্থ্যসন্মত খাদ্য কেৱল ভাল জীৱনশৈলীৰ বাবেই প্ৰয়োজনীয় নহয়, তাৰ লগতে পৰ্যাপ্ত টোপনিৰো প্ৰয়োজন হয় । সুস্থ হৈ থাকিবলৈ আমাক টোপনিৰ অতি প্ৰয়োজন ।

আধুনিক জীৱনশৈলীৰ বাবে আজিকালি অধিকাংশ লোকৰেই পৰ্যাপ্ত টোপনিত বাধাৰ সৃষ্টি হয় ৷ কিন্তু এই স্বভাৱৰ বাবে আপুনি যে দুৰাৰোগ্য ৰোগত আক্ৰান্ত হ’ব পাৰে জানেনে ? হয়, পৰ্যাপ্ত টোপনিৰ অভাৱৰ বাবে আপুনি কৰ্কট ৰোগত আক্ৰান্ত হ’ব পাৰে ৷ বহু অধ্যয়নত ইতিমধ্যে প্ৰমাণ হৈছে যে টোপনিৰ মানদণ্ড আৰু কৰ্কট ৰোগৰ মাজত গভীৰ সম্পৰ্ক আছে ৷ পৰ্যাপ্ত তথা ভাল মানদণ্ডৰ টোপনিৰ ফলত শৰীৰৰ ৰোগ প্ৰতিৰোধ প্ৰণালী শক্তিশালী হয় ৷ আনহাতে, টোপনিৰ অভাৱ বা অত্যধিক টোপনিৰ ফলত বিভিন্ন স্বাস্থ্য সমস্যা হ'ব পাৰে ৷

বিশেষজ্ঞসকলৰ মতে, পৰ্যাপ্ত টোপনিৰ অভাৱে শৰীৰৰ কোষৰ ডিএনএ ক্ষতিগ্ৰস্ত কৰিব পাৰে, যাৰ ফলত কৰ্কট ৰোগৰ আশংকা বৃদ্ধি হয় ৷ যদি আমি নিশা পলমকৈ শুই পুৱা সোনকালে উঠো অৰ্থাৎ ৫ ঘণ্টাতকৈ কম সময় টোপনি গ্ৰহণ কৰো, তেতিয়া মেলাটোনিন নামৰ হৰমনৰ স্তৰ হ্ৰাস হ'ব পাৰে ৷ এই মেলাটোনিন হৰমনৰ স্তৰ হ্ৰাস হোৱাৰ ফলত কৰ্কট কোষৰ বিকাশ বৃদ্ধি হয় ৷ গৱেষণাত প্ৰমাণ হৈছে যে গোটেই নিশা কাম কৰি দিনত শুই থকা লোকসকলৰ কৰ্কট ৰোগৰ আক্ৰান্ত হোৱাৰ আশংকা অধিক ৷

এই সন্দৰ্ভত বিশেষজ্ঞই কয় যে, ভাল টোপনি সুস্থ জীৱনৰ মুলমন্ত্ৰ, কিন্তু বৰ্তমান ব্যস্ততাৰে ভৰা এই জীৱনত বহুলোক টোপনিৰ সমস্যাত ভুগিবলৈ ধৰিছে ​​যাৰ ফলত টোপনিৰ সৈতে জড়িত এই সমস্যাসমূহ ক্ৰমাগতভাৱে বৃদ্ধি পাইছে । টোপনিৰ গুৰুত্বও বিভিন্ন মানুহৰ বাবে বহুত বেলেগ । হতাশা অৱসাদত ভোগা ব্যক্তিৰ বাবে টোপনিয়ে তেওঁক তেওঁৰ অপৰ্যাপ্ততা, অক্ষমতাৰ কথা মনত পেলাই দিয়ে । একে সময়তে ভাৱনাত্মক দিশত আৱদ্ধ হৈ থকাৰ বাবে আৰামত শুবলৈ অসুবিধা হয় । এনে পৰিস্থিতিত পিছৰ দিনা ভাগৰুৱা অনুভৱ হয়, যাৰ ফলত কামত প্ৰভাৱ পৰে ।

টোপনিৰ অভাৱৰ ফলত কোন প্ৰকাৰৰ কৰ্কট ৰোগৰ বিপদাশংকা অধিক ?

মহিলাৰ ক্ষেত্ৰত মেলাটোনিন হৰমনৰ অভাৱৰ ফলত স্তনৰ কৰ্কট ৰোগৰ আশংকা বৃদ্ধি হ'ব পাৰে ৷ পুৰুষৰ ক্ষেত্ৰত, নিম্ন স্তৰৰ মেলাটোনিনে প্ৰষ্টেট কৰ্কট ৰোগৰ সম্ভাৱনা বৃদ্ধি কৰে ৷ আনহাতে, কম টোপনিয়ে পাচন তন্ত্ৰ প্ৰভাৱিত কৰে, যাৰ ফলত অন্ত্ৰৰ কৰ্কট ৰোগ হ'ব পাৰে ৷ টোপনিৰ অভাৱৰ ফলত শৰীৰত প্ৰদাহ বৃদ্ধি হয়, যিয়ে হাঁওফাঁও প্ৰভাৱিত কৰিব পাৰে ৷

অত্যধিক টোপনিয়েও কৰ্কট ৰোগৰ আশংকা বৃদ্ধি কৰে নেকি ?

অত্যধিক টোপনি (৯-১০ ঘণ্টাতকৈ অধিক)যোৱাটোও স্বাস্থ্যৰ বাবে ভাল নহয় ৷ কেতবোৰ গৱেষণাত প্ৰমাণ হৈছে যে অত্যধিক টোপনিয়ে মেদবহুলতা, মধুমেহ আৰু হৃদৰোগ বৃদ্ধি কৰিব পাৰে, যাৰ ফলত কৰ্কট ৰোগৰ আশংকা বৃদ্ধি হয় ৷ অত্যধিক টোপনি গ'লে শৰীৰত প্ৰদাহ বৃদ্ধি হয়, যিয়ে কৰ্কট ৰোগৰ আশংকা বৃদ্ধি কৰে ৷

কৰ্কট ৰোগ পৰিহাৰ কৰিবলৈ সঠিক টোপনি কেনেদৰে প্ৰাপ্ত কৰিব ?

সদায ৭-৮ ঘণ্টা গভীৰ টোপনি প্ৰাপ্ত কৰিব ৷ ৰাতি শোৱা আৰু পুৱা উঠাৰ সময় একে ৰাখিব ৷ পৰাপক্ষত ৰাতি সোনকালে শুবলৈ আৰু পুৱা সোনকালে উঠিবলৈ চেষ্টা কৰিব ৷ শোৱাৰ ১ঘণ্টাৰ আগতে ম'বাইল ফোন, লেপটপ আৰু টিভিৰ পৰা দূৰ হ'ব ৷ তদুপৰি, কম পোহৰত শুবলৈ অভ্যস্ত হওঁক যাতে শৰীৰত মেলাটোনিন হ’ৰম’ন সঠিকভাৱে প্ৰস্তুত হয় ৷ কেফেইন আৰু অত্যধিক ভজা খাদ্য পৰিহাৰ কৰিব, বিশেষকৈ নিশা ৷ টোপনিৰ মানদণ্ড উন্নত কৰিবলৈ দৈনিক ব্যায়াম কৰক আৰু যোগাভ্যাস কৰিব ৷

উৎস:- https://pmc.ncbi.nlm.nih.gov/articles/PMC6249821/

https://www.cancer.org/cancer/risk-prevention/diet-physical-activity/sleep.html#:~:text=Short%20sleep%20may%20be%20linked,colorectal%20and%20lung%20cancer%20risk.

(সতৰ্কীকৰণ: এই প্ৰতিবেদনত আপোনাক দিয়া সকলো স্বাস্থ্য তথা জীৱনশৈলী সম্পৰ্কীয় যিকোনো তথ্য আৰু পৰামৰ্শ কেৱল আপোনাৰ সাধাৰণ তথ্যৰ বাবেহে আগবঢ়োৱা হৈছে । আমি এই তথ্য বৈজ্ঞানিক গৱেষণা, অধ্যয়ন, চিকিৎসা আৰু স্বাস্থ্য পেছাদাৰী পৰামৰ্শৰ ভিত্তিত প্ৰদান কৰিছো । আপুনি এই উপায় বা পদ্ধতি অনুসৰণ কৰাৰ আগতে এই বিষয়ে বিতংভাৱে জনাটো উচিত তথা আপোনাৰ ব্যক্তিগত চিকিৎসকৰ পৰামৰ্শ গ্ৰহণ কৰাটো উচিত ।)

লগতে পঢ়ক