ৰাতি শুবলৈ যোৱাৰ পূৰ্বে আপুনিও দাঁত ব্ৰাছ কৰিবলৈ পাহৰে নেকি ? যদি পাহৰে, তেন্তে এয়া আপোনাৰ বাবে বিপদজনক হ’ব পাৰে ৷ আপুনি ৰাতি ব্ৰাছ নকৰাকৈ শুবলৈ যোৱাৰ ফলত আপোনাৰ হাৰ্ট এটেক হ’ব পাৰে ৷ হয়, শেহতীয়া এক গৱেষণাত প্ৰমাণ হৈছে যে, ৰাতি ব্ৰাছ নকৰাকৈ শুলে হাৰ্ট এটেকৰ সম্ভাৱনা যথেষ্ট পৰিমাণে বৃদ্ধি হয় ৷
গৱেষণাত পোহৰলৈ অহা মতে, ৰাতি দাঁত ভালকৈ পৰিস্কাৰ নকৰিলে মুখত বেক্টেৰিয়াৰ জন্ম হ’ব পাৰে, যি পোনপটীয়াকৈ তেজত দ্ৰৱীভূত হৈ হৃদযন্ত্ৰৰ স্বাস্থ্যত প্ৰভাৱ পেলায় ৷ এই অসাৱধানতাৰ বাবে হাৰ্ট এটেকৰ আশংকা বৃদ্ধি হয় ৷ এই সৰু ভুলটোৱে হৃদযন্ত্ৰৰ কেনেদৰে ক্ষতি কৰে, প্ৰতি নিশা দাঁত ব্ৰাছ কৰাটো কিয় গুৰুত্বপূৰ্ণ, আজি জানো আহক-
হৃদযন্ত্ৰৰ স্বাস্থ্য আৰু মুখৰ পৰিস্কাৰ-পৰিচ্ছন্নতা
মুখৰ স্বাস্থ্যৰ ওপৰতেই হৃদযন্ত্ৰৰ স্বাস্থ্য নিৰ্ভৰ কৰে ৷ দাঁতবোৰ সঠিকভাৱে পৰিস্কাৰ কৰি ৰাখিলে হৃদযন্ত্ৰও সুস্থ হৈ থাকে ৷ দাঁত-মুখ চাফা কৰি ৰাখিয়েই খুব সহজভাৱে আপুনি আপোনাৰ হৃদযন্ত্ৰ সুস্থ কৰি ৰাখিব পাৰে ৷ শেহতীয়াকৈ এজন আমেৰিকান চিকিৎসকে প্ৰকাশ কৰিছে যে দাঁত-মুখ চাফা হৈ নাথাকিলে হৃদৰোগৰ সম্ভাৱনা বৃদ্ধি হয় ৷
ৰাতি দাঁত ব্ৰাছ নকৰিলে কি হ’ব পাৰে ?
ৰাতি শুবলৈ যোৱাৰ আগতে যদি আপুনি দাঁত ব্ৰাছ নকৰে, তেন্তে আপোনাৰ হৃদযন্ত্ৰৰ স্বাস্থ্যত বিৰূপ প্ৰভাৱ পৰিব পাৰে ৷ গৱেষণাত দেখা গৈছে যে নিয়মিতভাৱে দাঁত ব্ৰাছ নকৰা লোকৰ হৃদৰোগৰ সম্ভাৱনা বেছি ৷
মুখত বেক্টেৰিয়াৰ বিপদ
স্বাস্থ্য বিশেষজ্ঞৰ মতে, মুখত থকা বেক্টেৰিয়া পোনে পোনে তেজলৈ যাব পাৰে ৷ যাৰ ফলত মুখ ফুলি উঠিব পাৰে ৷ এই প্ৰদাহে সময়ৰ লগে লগে হৃদযন্ত্ৰত প্ৰভাৱ পেলায় ৷ মুখৰ পৰিস্কাৰ-পৰিচ্ছন্নতাৰ অভাৱৰ ফলত হোৱা দাঁতৰ আলুৰ বিভিন্ন ৰোগেও হৃদৰোগৰ সম্ভাৱনা বৃদ্ধি কৰিব পাৰে ৷
দৈনিক দাঁত পৰিস্কাৰ কৰিলে সুস্থ হৈ থাকে হৃদযন্ত্ৰ
আমেৰিকাৰ বিশেষজ্ঞই কৰা এই গৱেষণাত প্ৰমাণ হোৱা মতে, যিসকল লোকে দৈনিক পুৱা-ৰাতি দাঁত পৰিস্কাৰ কৰে, তেওঁলোকৰ হৃদযন্ত্ৰ সুস্থ হৈ থাকে ৷
কিদৰে ল’ব মুখৰ যত্ন ?
দিনটোত দুবাৰ ব্ৰাছ কৰিব
প্ৰতিদিনে পুৱা আৰু ৰাতি কমেও দুমিনিটৰ বাবে দাঁত ভালদৰে ব্ৰাছ কৰিব ৷ ইয়াৰ দ্বাৰা দাঁতত জমা হোৱা বেক্টেৰীয়া আৰু প্লেক আঁতৰাব পাৰি ৷ ব্ৰাছ কৰাৰ সময়ত বৃত্তাকাৰ গতিৰে ব্ৰাছ কৰি দাঁতৰ প্ৰতিটো অংশ ভালদৰে পৰিস্কাৰ হয় ৷
ফ্লছ ব্যৱহাৰ কৰিব
কেৱল ব্ৰাছ কৰিলেই নহ’ব ৷ দাঁতৰ মাজত আবদ্ধ হৈ থকা মলি আঁতৰাবলৈ ফ্লছ ব্যৱহাৰ কৰিব লাগে ৷ দিনটোত এবাৰ হ’লেও এই কাম কৰক ৷
মাউথৱাছ ব্যৱহাৰ কৰিব
মাউথৱাছে কেৱল সতেজতা প্ৰদান কৰাই নহয়, ই বেক্টেৰিয়াও নিধন কৰে ৷ দিনটোত এবাৰ মাউথৱাছ ব্যৱহাৰ কৰিব লাগে ৷
স্বাস্থ্যসন্মত খাদ্য গ্ৰহণ কৰিব
চেনি আৰু এচিডিক খাদ্য পৰিহাৰ কৰিব ৷ কিয়নো ই দাঁতৰ ইনামেলৰ ক্ষতি কৰে ৷ দাঁতৰ শক্তি বৃদ্ধি কৰিবলৈ কেলচিয়াম সমৃদ্ধ খাদ্য যেনে সেউজীয়া শাক-পাচলি, ফল-মূল, গাখীৰ খাব ৷
দাঁতৰ বাবে উপযুক্ত টুথব্ৰাছ বাছনি কৰিব
কোমল ব্ৰিষ্টল থকা টুথব্ৰাছ বাছনি কৰিব, যিয়ে দাঁত আৰু আলুৰ কোনো ক্ষতি নকৰে ৷ প্ৰতি ৩ মাহৰ মূৰে মূৰে টুথব্ৰাছ সলনি কৰিব লাগে ৷
দৈনিক পানী খাব
পানী খোৱাৰ ফলত মুখত থকা বেক্টেৰিয়া কমি যোৱাৰ লগতে দাঁত সুস্থ হৈ থাকে ৷
নিয়মীয়াকৈ দন্ত পৰীক্ষা কৰিব
বছৰত কমেও দুবাৰ দন্ত চিকিৎসকৰ ওচৰৈল গৈ দাঁত পৰীক্ষা কৰিব ৷ ইয়াৰ দ্বাৰা দাঁতৰ যিকোনো সমস্যা সময়মতে ধৰা পেলাব পৰা যায় ৷
ধূমপান পৰিহাৰ কৰিব
ধঁপাত, চিগাৰেট, পান মছলা আদিবোৰ দাঁতৰ বাবে ক্ষতিকাৰক ৷ ইয়াৰ ফলত দাঁতৰ ক্ষতি হ’ব পাৰে আৰু দাঁতৰ আঁঠু ফুলি উঠিব পাৰে ৷
এই সহজ ব্যৱস্থাসমূহ গ্ৰহণ কৰিলে আপুনি আপোনাৰ দাঁত সুস্থ আৰু শক্তিশালী কৰি ৰাখিব পাৰে ৷ মুখৰ পৰিস্কাৰ-পৰিচ্ছন্নতাৰ যত্ন লোৱাটো কেৱল দাঁতৰ বাবেই নহয়, আপোনাৰ সামগ্ৰিক স্বাস্থ্যৰ বাবেও গুৰুত্বপূৰ্ণ ৷
(সতৰ্কীকৰণ: এই প্ৰতিবেদনত আপোনাক দিয়া সকলো স্বাস্থ্য তথা জীৱনশৈলী সম্পৰ্কীয় যিকোনো তথ্য আৰু পৰামৰ্শ কেৱল আপোনাৰ সাধাৰণ তথ্যৰ বাবেহে আগবঢ়োৱা হৈছে । আমি এই তথ্য বৈজ্ঞানিক গৱেষণা, অধ্যয়ন, চিকিৎসা আৰু স্বাস্থ্য পেছাদাৰী পৰামৰ্শৰ ভিত্তিত প্ৰদান কৰিছো । আপুনি এই উপায় বা পদ্ধতি অনুসৰণ কৰাৰ আগতে এই বিষয়ে বিতংভাৱে জনাটো উচিত তথা আপোনাৰ ব্যক্তিগত চিকিৎসকৰ পৰামৰ্শ গ্ৰহণ কৰাটো উচিত ।)
লগতে পঢ়ক
