ডাঙৰ ঘোষণা: এই ৰোগৰ চিকিৎসাৰ বাবে নতুন ঔষধ প্ৰস্তুত কৰিলে লাভ কৰিব ১০ কোটি টকা, কি এই ৰোগ জানো আহক

বৃহস্পতিবাৰে (১৯ জুন) চৰকাৰে ‘ছিকেল চেল’ ৰোগৰ চিকিৎসাৰ বাবে ঔষধ প্ৰস্তুত কৰি ১০ কোটি টকাৰ পুৰস্কাৰ ঘোষণা কৰে ৷ এই ৰোগে ভাৰতৰ জনজাতীয় লোকক বিশেষভাৱে আক্ৰান্ত কৰে ৷ ‘ছিকেল চেল’ ৰোগ হ’ল বংশগত তেজৰ বিকাৰৰ এটা গোট যিয়ে হিম’গ্লবিনক প্ৰভাৱিত কৰে, যাৰ ফলত ৰক্তকণিকাবোৰ ছিকেল আকৃতিৰ হৈ ৰক্ত সঞ্চালন সঠিকভাৱে হোৱাত বাধা প্ৰদান কৰে, যাৰ ফলত ষ্ট্ৰোক, চকুৰ সমস্যা আৰু সংক্ৰমণৰ দৰে গুৰুতৰ জটিলতা দেখা দিয়ে ৷

ছিকেল চেল এনিমিয়া মানে কি ?

আমাৰ দেশৰ বহু লোকক গুৰুতৰভাৱে প্ৰভাৱিত কৰা দহটা ডাঙৰ স্বাস্থ্যজনিত সমস্যাৰ ভিতৰত অন্যতম হৈছে ছিকেল চেল এনিমিয়া । বহু গৱেষণাৰ পৰা দেখা গৈছে যে এই ৰোগত আক্ৰান্ত বিশ্বৰ মুঠ ৰোগীৰ ১৪.৫ শতাংশ ভাৰতত পোৱা গৈছে । প্ৰতি বছৰে ১৯ জুন তাৰিখে বিশ্বৰ স্বাস্থ্য বিশেষজ্ঞ আৰু স্বাস্থ্য সম্পৰ্কীয় সংস্থাসমূহে এই ৰোগৰ বিষয়ে বিশেষভাৱে আলোচনা কৰে । আমেৰিকান ছ’চাইটি অৱ হেমেট’লজীৰ মতে ই এক তেজৰ বিকাৰ, য’ত ৰক্তকণিকাবোৰ ভাঙিবলৈ আৰম্ভ কৰে । ইয়াৰ ফলত ৰক্তহীনতা, বৃক্ক বা যকৃত বিকল হোৱা, ষ্ট্ৰোক আৰু হাওঁফাওঁৰ সংক্ৰমণকে ধৰি বহু সমস্যাৰ সৃষ্টি হ’ব পাৰে ।

ছিকেল চেল এনিমিয়াৰ লক্ষণ

• অত্যন্ত ক্লান্তি
• জণ্ডিচ
• হাত-ভৰি ফুলা
• বুকু, পিঠি, হাত বা ভৰিৰ বিষ
• ৰক্তহীনতা
• সঘনাই সংক্ৰমণ
• পলমকৈ বিকাশ হোৱা
• দৃষ্টি-সম্পৰ্কীয় বিষয়
• মৃৰ্গী ৰোগ
• হৃদৰোগ

এই ৰোগৰ লক্ষণসমূহৰ প্ৰতি গুৰুত্ব দি এই ৰোগৰ প্ৰতি সজাগ হোৱাটো প্ৰয়োজন । ইয়াৰ বাবে সময়মতে পৰীক্ষা কৰাটো প্ৰয়োজনীয় । একে সময়তে আন বিশেষজ্ঞৰ মতে এনে ৰোগীয়ে অধিক পানী খাব লাগে আৰু সম্ভৱ হ’লে দৈনিক ফলিক এচিডৰ টেবলেট খাব লাগে । যিকোনো ব্যক্তিয়ে যদি বমি হয়, ডায়েৰিয়া হয় আৰু অত্যধিক ঘাম ওলায় তেন্তে তৎক্ষণাত চিকিৎসকৰ সৈতে যোগাযোগ কৰিব লাগে । যদি কোনোবাই সুৰা, ধূমপান আৰু মদ্যপানৰ পৰা আঁতৰি থাকে, তেন্তে এই ৰোগৰ পৰা হাত সাৰিব পাৰে ।

২০২৩ চনত আৰম্ভ হৈছিল ‘ছিকেল চেল এনিমিয়া’ নিৰ্মূলকৰণ অভিযান

২০৪৭ চনৰ ভিতৰত এই ৰোগ নিৰ্মূল কৰাৰ লক্ষ্যৰে প্ৰধানমন্ত্ৰী নৰেন্দ্ৰ মোদীয়ে ২০২৩ চনৰ ১ জুলাইত ৰাষ্ট্ৰীয় ‘ছিকেল চেল এনিমিয়া’ নিৰ্মূলকৰণ অভিযান আৰম্ভ কৰে ৷ এই অভিযানৰ অধীনত ৪০ বছৰ বয়সলৈকে ৭ কোটি লোকক পৰীক্ষা কৰাৰ লক্ষ্য চৰকাৰৰ ৷

কেন্দ্ৰীয় জনজাতি পৰিক্ৰমা ৰাজ্যিক মন্ত্ৰী দুৰ্গাদাস উইকেয়ে ‘বিশ্ব ছিকেল চেল দিৱস’ উপলক্ষে আয়োজন কৰা এক কাৰ্যসূচীৰ জৰিয়তে এই ৰোগৰ চিকিৎসাৰ বাবে ঔষধ প্ৰস্তুত কৰাৰ বাবে বীৰছা মুণ্ডা বঁটা প্ৰদানৰ কথা ঘোষণা কৰে ৷

বৰ্তমান এই ৰোগৰ চিকিৎসাৰ বাবে মাত্ৰ এটি ঔষধহে উপলব্ধ

এই ৰোগৰ চিকিৎসাৰ বাবে বৰ্তমান মাত্ৰ এটা ঔষধহে উপলব্ধ বুলি উল্লেখ কৰে মন্ত্ৰীগৰাকীয়ে ৷ তেওঁ কয় যে বৰ্তমান সময়ত ৰোগীৰ শাৰীৰিক অৱস্থা আৰু ৰোগৰ ভয়াৱহতাৰ ওপৰত ভিত্তি কৰি কেইবাটাও বিকল্পৰ পৰা উপযুক্ত ঔষধ বাছি লোৱাৰ কোনো বিকল্প নাই ৷

তেওঁ কয় যে, গৰ্ভাৱস্থাত বা আন গুৰুতৰ চিকিৎসাজনিত অৱস্থাত এই সমস্যা আৰু অধিক ভয়াৱহ হৈ পৰে, গতিকে নতুন ঔষধ প্ৰস্তুত কৰাৰ জৰুৰী প্ৰয়োজন ৷ জনজাতি পৰিক্ৰমা মন্ত্ৰালয়ে দিল্লীস্থিত অল ইণ্ডিয়া ইনষ্টিটিউট অৱ মেডিকেল ছায়েন্স (এইমছ)ৰ সহযোগত এই ঔষধ প্ৰস্তুতৰ বাবে এক প্ৰতিযোগিতাৰ আয়োজন কৰিব ৷

১০ কোটি টকা পৰ্যন্ত পুঁজি লাভ কৰিব

উইকেয়ে কয় যে, নিৰ্বাচিত প্ৰস্তাৱটোৰ বাবে ১০ কোটি টকা পৰ্যন্ত পুঁজিৰ ব্যৱস্থা কৰা হ’ব ৷ লগতে তেওঁ কয় যে মন্ত্ৰালয়ে এইমছ-দিল্লীৰ অধীনত এটা চেণ্টাৰ ফৰ ট্ৰাইবেল হেল্থ এণ্ড ৰিচাৰ্চ ইনষ্টিটিউট স্থাপন কৰিব, য’ত বহিঃৰোগী আৰু আন্তঃৰোগীৰ সুবিধা থাকিব যাতে জনজাতীয় লোকসকলক উচ্চমানৰ চিকিৎসা সেৱা প্ৰদান কৰিব পৰা যায় ৷

মন্ত্ৰীগৰাকীয়ে কয় যে, জনজাতীয় চিকিৎসা বিজ্ঞানৰ স্নাতকোত্তৰ পাঠ্যক্ৰমো প্ৰস্তুত কৰা হ’ব ৷ তেওঁ কয় যে ইয়াৰ দ্বাৰা জনজাতীয় সম্প্ৰদায়ৰ দীৰ্ঘদিনীয়া স্বাস্থ্য বৈষম্য দূৰ কৰাত সহায়ক হ’ব, যিসকলে ভৌগোলিক, আৰ্থ-সাংস্কৃতিক আৰু ব্যৱস্থাগত বাধাৰ বাবে প্ৰায়ে বঞ্চিত হৈ পৰে ৷

এই বিশেষ পাঠ্যক্ৰমটো জনজাতীয় পৰিৱেশৰ লগত খাপ খুৱাই প্ৰাসংগিক জ্ঞান, ক্লিনিকেল দক্ষতা আৰু জনস্বাস্থ্যৰ দক্ষতা থকা চিকিৎসকৰ কেডাৰ গঢ়ি তোলাৰ বাবে ডিজাইন কৰা হ’ব ৷

উৎস:-https://www.pib.gov.in/PressReleasePage.aspx?PRID=2137717

লগতে পঢ়ক