সঘনাই প্ৰস্ৰাৱ হয় নেকি ? এইসমূহ লক্ষণ দেখিলে হৈ যাওক সাৱধান

দিনটোৰ ভিতৰত সঘনাই প্ৰস্ৰাৱ হোৱাৰ সমস্যাত ভুগিছে নেকি ? বাৰে বাৰে ৱাশ্বৰুমলৈ যাবলগীয়া হোৱাৰ বাবে ৰাতি বাৰে বাৰে টোপনি ভাঙি যায় নেকি ? যদি আপোনাৰ উত্তৰ হয়, তেন্তে এই সমস্যা কেৱল অসুবিধা নহয়, আপোনাৰ শৰীৰত চলি থকা কোনো গুৰুতৰ বিকাৰৰ লক্ষণো হ’ব পাৰে ৷ প্ৰায়ে মানুহে ইয়াক অত্যধিক পানী খোৱাৰ বাবে বা চৰ্দি ধৰাৰ বাবে হোৱা বুলি বিবেচনা কৰি আওকাণ কৰে, কিন্তু এই লক্ষণ কেতিয়াবা ডায়েবেটিছ, প্ৰস্ৰাৱৰ সংক্ৰমণ (UTI), বা প্ৰষ্টেটৰ সৈতে জড়িত ৰোগ হ’ব পাৰে ৷ সঘনাই প্ৰস্ৰাৱ কৰাৰ আঁৰৰ কাৰণ কি হ’ব পাৰে আৰু কেতিয়া চিকিৎসকৰ ওচৰলৈ যোৱাটো দৰকাৰ আজি এই বিষয়ে বিতংভাৱে জানো আহক-

ডায়েবেটিছ

সঘনাই প্ৰস্ৰাৱ কৰাৰ অন্যতম সাধাৰণ আৰু গুৰুতৰ কাৰণ হ’ল ডায়েবেটিছ ৷ শৰীৰত ৰক্ত শৰ্কৰাৰ মাত্ৰা বৃদ্ধি হ’লে বৃক্কই ইয়াক ফিল্টাৰ কৰিবলৈ চেষ্টা কৰে আৰু শৰীৰত অধিক প্ৰস্ৰাৱ উৎপন্ন হয় ৷ এই অৱস্থাত দিন আৰু ৰাতি উভয়ে সঘনাই প্ৰস্ৰাৱ হয় ৷

প্ৰস্ৰাৱৰ সংক্ৰমণ

এই সমস্যা মহিলাৰ ক্ষেত্ৰত সাধাৰণ ৷ প্ৰস্ৰাৱৰ সংক্ৰমণ হ’লে প্ৰস্ৰাৱৰ পৰিমাণ অতি কম হ’লেও প্ৰস্ৰাৱ কৰাৰ প্ৰবল হেঁপাহ থাকে ৷ প্ৰস্ৰাৱৰ সময়ত জ্বলা-পোৰা আৰু তলপেটত বিষ হোৱা আন লক্ষণ হ’ব পাৰে ৷

অত্যধিক পানী বা প্ৰস্ৰাৱৰ ঔষধ সেৱন কৰা

বেছিকৈ পানী, চাহ, কফি বা শীতল পানীয় সেৱন কৰিলে শৰীৰত সঘনাই প্ৰস্ৰাৱ উৎপন্ন হয় ৷ কেফেইন আৰু এলক’হলৰ দৰে পদাৰ্থ প্ৰস্ৰাৱৰ পৰিমাণ বৃদ্ধি কৰে ৷

অভাৰএক্টিভ ব্লাডাৰ চিনড্ৰম (Overactive bladder syndrome)

এই অৱস্থাত মূত্ৰাশয়ৰ পেশীবোৰ স্বাভাৱিকতকৈ অধিক সক্ৰিয় হৈ পৰে, যাৰ ফলত মূত্ৰাশয় সম্পূৰ্ণ ভৰ্তি নহ’লেও সঘনাই প্ৰস্ৰাৱ কৰাৰ হেঁপাহৰ সৃষ্টি হয় ৷ বয়সৰ লগে লগে এই অৱস্থা বেছিকৈ দেখা দিয়ে ৷

প্ৰষ্টেট গ্ৰন্থিৰ সমস্যা

মধ্যবয়সৰো অধিক বয়সৰ পুৰুষৰ সঘনাই প্ৰস্ৰাৱ কৰাৰ কাৰণ হ’ব পাৰে প্ৰষ্টেট গ্ৰন্থি বৃদ্ধি হোৱা ৷ বৃদ্ধি পোৱা গ্ৰন্থিয়ে মূত্ৰনলীত হেঁচা প্ৰয়োগ কৰে, যাৰ বাবে প্ৰস্ৰাৱ সম্পূৰ্ণৰূপে ওলাই আহিব নোৱাৰে আৰু সঘনাই প্ৰস্ৰাৱ কৰাৰ প্ৰয়োজন অনুভৱ কৰে ৷

কেতিয়া চিকিৎসকৰ পৰামৰ্শ ল’ব লাগে ?

• প্ৰস্ৰাৱৰ জ্বলা, তেজ বা দুৰ্গন্ধ
• ৰাতি সঘনাই প্ৰস্ৰাৱ কৰাৰ বাবে টোপনিৰ ব্যাঘাত জন্মা
• অতি কম পৰিমাণে সঘনাই প্ৰস্ৰাৱ অহা
• দুৰ্বলতা বা হঠাৎ ওজন কমি যোৱা

উৎস:- https://www.medparkhospital.com/en-US/disease-and-treatment/frequent-urination

লগতে পঢ়ক