বিমানত উঠি ভ্ৰমণ কৰাৰ মজাই সুকীয়া ৷ সেয়ে হয়তো বিমান যাত্ৰাৰ হাবিয়াস সকলোৰে থাকে ৷ কিন্তু কেতবোৰ বিশেষ দিশত সাৱধানতা অৱলম্বন নকৰিলে এই যাত্ৰা আপোনাৰ বাবে আৰামদায়ক নহ'ব পাৰে ৷ হয়, ভ্ৰমণৰ আগতে আমি সদায় স্বাস্থ্যসন্মত আৰু অতি লঘু খাদ্য খাব লাগে ৷ যাত্ৰাৰ সময়ত যাতে পেটৰ সমস্যা নহয়, তাৰ প্ৰতি লক্ষ্য ৰাখি আমি কিছুমান খাদ্য খোৱাৰ পৰা বিৰত থাকিব লাগে ৷ বিমান যাত্ৰা কৰাৰ পূৰ্বে কোনবোৰ খাদ্য খাব নালাগে,আজি জানো আহক-
টেঙাজাতীয় খাদ্য
বিমান যাত্ৰা কৰাৰ পূৰ্বে কেতিয়াও টেঙাজাতীয় খাদ্য খাব নালাগে ৷ অত্যধিক টেঙা খাদ্য খালে পেটত অস্বস্তিৰ সৃষ্টি হয় ৷ ইয়াৰ ফলত পেট ফুলা, বদহজমৰ দৰে সমস্যা হ’ব পাৰে ৷
দাইল, ৰাজমাহ
দাইল-ৰাজমাহ আমাৰ স্বাস্থ্যৰ বাবে যথেষ্ট উপকাৰী ৷ কিন্তু ইয়াত যথেষ্ট পৰিমাণে প্ৰটিন থাকে ৷ এনে প্ৰটিনযুক্ত খাদ্য খোৱাৰ পিছত বিমানত যাত্ৰা কৰিলে পেটত গেছৰ সমস্যা হ’ব পাৰে ৷ সেয়েহে যাত্ৰা কৰাৰ পূৰ্বে এনে উচ্চ প্ৰটিনযুক্ত খাদ্য পৰাপক্ষত নাখাব ৷
কাৰ্বনেটেড পানীয়
দ্ৰৱীভূত কাৰ্বন ডাই অক্সাইড গেছযুক্ত কাৰ্বনেটেড পানীয় অৰ্থাৎ বিভিন্ন ব্ৰেণ্ডৰ শীতল পানীয়ও বিমান যাত্ৰাৰ পূৰ্বে খোৱাটো অনুচিত ৷ ইয়াত যথেষ্ট পৰিমাণে চেনীও থাকে ৷ এইসমূহ খোৱাৰ ফলত পেটৰ বহু সমস্যা হ’ব পাৰে ৷
দুগ্ধজাত খাদ্য
লেক্ট’জযুক্ত খাদ্যয়েও হজম শক্তি নষ্ট কৰে ৷ সেয়েহে বিমানেৰে যাত্ৰা কৰাৰ আগতে গাখীৰ, দৈ বা অন্যান্য দুগ্ধজাত সামগ্ৰী খোৱাৰ পৰা বিৰত থাকিব লাগে ৷ ইয়াৰ ফলত পেটত অসহনীয় বিষ হ’ব পাৰে ৷
ভজা খাদ্য
অধিকাংশ লোকেই বিমানলৈ অপেক্ষা কৰি থকাৰ সময়ত বিমানবন্দৰত উপলব্ধ বিভিন্ন ভজা-পোৰা সামগ্ৰী খায় ৷ বিশেষকৈ, শিশুৱে এইবোৰ খাবলৈ ভাল পায় ৷ কিন্তু এনেবোৰ খাদ্য আমাৰ স্বাস্থ্যৰ বাবে কিমান হানিকাৰক, তাক দোঁহৰাৰ প্ৰয়োজন নাই ৷ বিমান যাত্ৰাৰ পূৰ্বেও এনে খাদ্য খালে পেট বেয়া হোৱাটো প্ৰায় নিশ্চিত ৷
কফি আৰু চাহ
হয়, এইটো অলপ আচৰিত হ’ব পাৰে কাৰণ বহুতে বিমান যাত্ৰাৰ সময়তো কিছু কেফেইন চুগ ডাউন কৰাৰ অভ্যাসত ৷ কিন্তু, যদি আপুনি বমি হোৱাটো নিবিচাৰে, তেন্তে কফি আৰু চাহৰ পৰা আঁতৰি থকাটোৱে আপোনাৰ বাবে উপকাৰী ৷ এই পানীয়বোৰত থকা কেফেইনৰ পৰিমাণ ইমানেই বেছি যে অতি শীঘ্ৰে ই আপোনাৰ শৰীৰৰ পৰা পানী শুহি ডিহাইড্ৰেচনৰ সৃষ্টি কৰিব পাৰে ৷ তদুপৰি, যদি আপুনি এচিডিটিত ভুগিছে, তেন্তে প্ৰচুৰ পৰিমাণে কফি আৰু চাহ খালে আপোনাৰ এচিডিটিৰ সমস্যা বৃদ্ধি পাব পাৰে আৰু বমি হ’ব পাৰে ৷
জ্বলা-পোৰা খাদ্য
যদি আপুনি মছলাৰ অনুৰাগী তেন্তে পেটত গেছ হোৱাটো যদি নিবিচাৰে তেন্তে জ্বলা-পোৰা বা মছলাযুক্ত খাদ্য বিমানত উঠাৰ আগতে নাখাব ৷ জ্বলা-পোৰা খাদ্য খোৱাৰ ফলত পেট বেয়া হোৱাই নহয়, অস্বস্তি আৰু পেট জ্বলাৰ দৰে সমস্যা হ’ব পাৰে ৷ সেয়েহে দীঘলীয়া বিমান যাত্ৰাৰ বাবে সাজু হ’লে মছলা আৰু জ্বলা-পোৰা খাদ্য খোৱা পৰিহাৰ কৰাটোৱেই উত্তম ৷
তেন্তে কি খোৱাটো উচিত ?
পানী
যাত্ৰাৰ সময়ত পানী খোৱাটো খুব দৰকাৰী ৷ কিন্তু তৰল খাদ্য বুলি অস্বাস্থ্যকৰ ৰস, শীতল পানীয় খাই বিপদত নপৰিব ৷
খিচিৰি
যাত্ৰাৰ আগত যদি গধুৰ আহাৰ খাবলৈ মন যায়, তেন্তে আপুনি মচলা নোহোৱাকৈ খিচিৰি খাব পাৰে ৷ আপুনি কিছুমান ফলো খাব পাৰে ৷ কিন্তু কেতিয়াও টেঙাজাতীয় ফল নাখাব ৷ মুঠতে যাত্ৰাৰ পূৰ্বে সদায় সহজে হজম হোৱা খাদ্য খাব ৷
(সতৰ্কীকৰণ: এই প্ৰতিবেদনত আপোনাক দিয়া সকলো স্বাস্থ্য তথা জীৱনশৈলী সম্পৰ্কীয় যিকোনো তথ্য আৰু পৰামৰ্শ কেৱল আপোনাৰ সাধাৰণ তথ্যৰ বাবেহে আগবঢ়োৱা হৈছে । আমি এই তথ্য বৈজ্ঞানিক গৱেষণা, অধ্যয়ন, চিকিৎসা আৰু স্বাস্থ্য পেছাদাৰী পৰামৰ্শৰ ভিত্তিত প্ৰদান কৰিছো । আপুনি এই উপায় বা পদ্ধতি অনুসৰণ কৰাৰ আগতে এই বিষয়ে বিতংভাৱে জনাটো উচিত তথা আপোনাৰ ব্যক্তিগত চিকিৎসকৰ পৰামৰ্শ গ্ৰহণ কৰাটো উচিত ।)
লগতে পঢ়ক
