হায়দৰাবাদ: ভাৰতীয় ক্ৰিকেটাৰ বিৰাট কোহলীয়ে টেষ্ট ক্ৰিকেটৰ পৰা অৱসৰ লোৱাৰ কথা ঘোষণা কৰিছে । ইংলেণ্ড টেষ্ট শৃংখলাৰ পূৰ্বে ৰোহিত শৰ্মাৰ পিছত এতিয়া বিৰাটৰ অৱসৰৰ খবৰে অনুৰাগীৰ লগতে চেলেব্ৰিটীসকলক আৱেগিক কৰি তুলিছে । ছচিয়েল মিডিয়া পোষ্টৰ জৰিয়তে অৱসৰৰ কথা ঘোষণা কৰে কোহলীয়ে । পত্নী অনুষ্কা শৰ্মাৰ সৈতে বিমানবন্দৰত দেখা পোৱাৰ পাছতে আহিল বিৰাটৰ এই পোষ্ট ।
ছ’চিয়েল মিডিয়াত অৱসৰৰ ঘোষণা
অৱসৰৰ কথা ঘোষণা কৰি বিৰাট কোহলীয়ে ইনষ্টাগ্ৰামত লিখিছে, “টেষ্ট ক্ৰিকেটত প্ৰথমবাৰৰ বাবে বেগী ব্লু পিন্ধা আজি ১৪ বছৰ হ’ল । সঁচা কথা ক’বলৈ গ’লে এই ফৰ্মেটটোৱে মোক কোনটো যাত্ৰাত লৈ যাব সেয়া মই কেতিয়াও কল্পনা কৰা নাছিলো । ই মোক পৰীক্ষা কৰিছিল, গঢ় দিছিল আৰু গোটেই জীৱন লগত লৈ ফুৰিব পৰা পাঠ শিকাইছিল । বগা জাৰ্চি পিন্ধি খেলাটো অতি আৱেগিক অভিজ্ঞতা ।”
তেওঁ লগতে আৰু লিখে, “কঠোৰ পৰিশ্ৰম, দীঘলীয়া দিন, সৰু সৰু মুহূৰ্তবোৰ যিবোৰ কোনেও দেখা নাপাই, কিন্তু যিবোৰ আপোনাৰ লগত চিৰদিনৰ বাবে থাকে । ইয়াৰ পৰা আঁতৰি যোৱাটো ইমান সহজ নহয় যদিও সেয়াই সঠিক । মই ইয়াক মোৰ সকলোখিনি দিছো আৰু ই মোক আশা কৰাতকৈও অধিক দিছে । খেলপথাৰত খেলা মানুহখিনিৰ লগতে এই যাত্ৰাত মোৰ সৈতে থকা প্ৰতিজনৰে প্ৰতি মই গভীৰ কৃতজ্ঞ । মোৰ টেষ্ট কেৰিয়াৰলৈ সদায় হাঁহি হাঁহি ঘূৰি চাম । বিদায় লৈছো ।”
অনুষ্কাৰ সৈতে দেখা গ’ল বিমানবন্দৰত
টেষ্ট ক্ৰিকেটৰ পৰা অৱসৰ লোৱাৰ কথা ঘোষণা কৰা দিনটোতে কোহলীক পত্নী অনুষ্কা শৰ্মাৰ সৈতে বিমানবন্দৰত দেখা গৈছিল । সোমবাৰে পুৱা মুম্বাই বিমানবন্দৰত অনুষ্কা শৰ্মা আৰু বিৰাট কোহলীক ষ্টাইলিছ সাজ-পোছাকত একেলগে দেখা গৈছিল ।
অনুষ্কা শৰ্মাৰ আৱেগিক পোষ্ট
কিছু সময় পূৰ্বে সামাজিক মাধ্যমত অনুষ্কা শৰ্মাই বিৰাটৰ সৈতে ক্ৰিকেট ফিল্ডৰ পৰা এখন ফটো শ্বেয়াৰ কৰি মনৰ ভাৱ প্ৰকাশ কৰিছে ৷ “তেওঁলোকে ৰেকৰ্ড আৰু মাইলষ্ট’নবোৰৰ কথা ক’ব — কিন্তু মই মনত পেলাম তুমি কেতিয়াও নেদেখুওৱা চকুলোবোৰ, কোনেও দেখা নোপোৱা যুদ্ধবোৰ আৰু খেলৰ এই ফৰ্মেটলৈ দিয়া অটল মৰমবোৰ । এই সকলোবোৰে তোমাৰ পৰা কিমান ল’লে মই জানো । প্ৰতিখন টেষ্ট ছিৰিজৰ পিছত তুমি অলপ বুদ্ধিমান, অলপ নম্ৰ হৈ উভতি আহিছিলা — আৰু এই সকলোবোৰৰ মাজেৰে তোমাৰ বিকাশ দেখিবলৈ পোৱাটো মোৰ সৌভাগ্য”, অনুষ্কাই লিখে ৷
লগতে তেওঁ লিখে, “কেনেবাকৈ, মই সদায় কল্পনা কৰিছিলো যে তুমি বগা ৰঙৰ সাজ পিন্ধিয়েই আন্তঃৰাষ্ট্ৰীয় ক্ৰিকেটৰ পৰা অৱসৰ ল’বা — কিন্তু তুমি সদায় তোমাৰ হৃদয় অনুসৰণ কৰিছা আৰু সেয়েহে মোৰ মৰমক মই মাত্ৰ ক’ব বিচাৰিছো, তুমি এই বিদায়ৰ প্ৰতিটো অংশ উপাৰ্জন কৰিছা ❤️”
আৱেগিক অনুৰাগী
কিংবদন্তি ক্ৰিকেটাৰগৰাকীয়ে আনুষ্ঠানিকভাৱে টেষ্ট ক্ৰিকেটৰ পৰা অৱসৰ লোৱাৰ কথা ঘোষণা কৰাৰ পিছত তেওঁৰ অনুৰাগীসকল অতি আৱেগিক হৈ পৰে আৰু ছ’চিয়েল মিডিয়াত নিজৰ অনুভৱ প্ৰকাশ কৰে । বিৰাট কোহলীৰ এই সিদ্ধান্তক লৈ চলচ্চিত্ৰ তাৰকাসকলেও নিজৰ প্ৰতিক্ৰিয়া প্ৰকাশ কৰিছে । বিকী কৌশলে ছ’চিয়েল মিডিয়াত লিখিছে, “আপুনি যি ধৰণে এই কাম কৰিলে সেয়া সঁচাকৈয়ে প্ৰশংসনীয় । টেষ্ট কেৰিয়াৰৰ বাবে অভিনন্দন আৰু ইমান ভাল স্মৃতি দিয়াৰ বাবে চেম্পিয়নক ধন্যবাদ ।” নীৰজ চোপ্ৰাই কোহলীক তেওঁৰ উৎকৃষ্ট টেষ্ট কেৰিয়াৰৰ বাবে অভিনন্দন জ্ঞাপন কৰে ।
এজন অনুৰাগীয়ে লিখিছে, “টেষ্ট ক্ৰিকেট আৰু কেতিয়াও আগৰ দৰে নহ’ব ।” আন এজনে লিখিছে, “এটা যুগ শেষ হ’ল ৷” আৰু এজনে মন্তব্য কৰিছে, “ইমান ডাঙৰ টেষ্ট কেৰিয়াৰৰ বাবে অভিনন্দন, আমি আপোনাক খেলপথাৰত মিছ কৰিম ।”
লগতে পঢ়ক : তুৰ্কী অভিনেতাৰ সৈতে বিৰাট কোহলীৰ অলৌকিক সাদৃশ্য: যেন চিনি নাপাব অনুষ্কায়ো
