কালি টেষ্ট ক্ৰিকেটৰ পৰা অৱসৰ, আজি সাধু প্ৰেমানন্দ মহাৰাজৰ আশ্ৰম ভ্ৰমণ

হায়দৰাবাদ: টেষ্ট শৃংখলাৰ পৰা অৱসৰ লোৱাৰ এদিন পিছতে ভাৰতীয় ক্ৰিকেট আইকন বিৰাট কোহলী আৰু তেওঁৰ অভিনেত্ৰী-পত্নী অনুষ্কা শৰ্মাই বৃন্দাবনলৈ যাত্ৰা কৰে ৷ অৱশ্যে এয়া অতি ব্যক্তিগত আৰু আধ্যাত্মিক ভ্ৰমণ আছিল । আশীৰ্বাদ ল’বলৈ পৰিয়ালসহ দম্পতীটো সাধু প্ৰেমানন্দ মহাৰাজৰ আশ্ৰমত উপস্থিত হয় ।

সোমবাৰে টেষ্ট ক্ৰিকেটৰ পৰা অৱসৰ ঘোষণা কৰি কোহলীয়ে সকলোকে আচৰিত কৰি তোলে ৷ ক্ৰিকেট জগতৰ পৰা আকস্মিক প্ৰস্থান কৰাৰ পিছতে মঙলবাৰে পুৱাই পৰিয়ালসহ সাধু প্ৰেমানন্দ মহাৰাজৰ আশ্ৰমলৈ যায় কোহলী । এই ভ্ৰমণৰ কথা ঘোষণা কৰা হোৱা নাছিল আৰু সংবাদ মাধ্যমৰ হাততো খবৰ নাছিল ৷ তাৰকাদ্বয় দিল্লীলৈ উভতি নহালৈকে কোনেও আনুষ্ঠানিকভাৱে নিশ্চিত কৰা নাছিল তেওঁলোকৰ এই যাত্ৰাৰ বিষয়ে ।

সাধু প্ৰেমানন্দ মহাৰাজৰ আশ্ৰমত কোহলীয়ে এয়া তৃতীয়বাৰৰ বাবে উপস্থিতি নিশ্চিত কৰে ৷ তেওঁ ২০২৩ চনৰ জানুৱাৰী আৰু ২০২৫ চনৰ জানুৱাৰী মাহত সন্ত প্ৰেমানন্দ মহাৰাজৰ ওচৰলৈ গৈছিল । ২০২৫ চনৰ জানুৱাৰী মাহৰ এই ভ্ৰমণ ক্ৰিকেটাৰগৰাকীৰ বিশেষভাৱে উল্লেখনীয় আছিল, কিয়নো সেই সময়তে কোহলীয়ে তেওঁৰ কেৰিয়াৰত গুৰুতৰ অৱনতি দেখিবলৈ পাইছিল ।

২০১১ চনত প্ৰথমবাৰৰ বাবে টেষ্ট ক্ৰিকেট খেলা কোহলীয়ে এক আকৰ্ষণীয় কৃতিত্বৰ মাজেৰে অৱসৰ গ্ৰহণ কৰিছে । বিৰাটে ১২৩ খন টেষ্ট মেচত ৪৬.৮৫ গড়েৰে ৯২৩০ ৰাণ সংগ্ৰহ কৰে, যাৰ ভিতৰত আছে ৩০ টা শতক আৰু ৩১ টা অৰ্ধশতক ৷ শচীন টেণ্ডুলকাৰ, ৰাহুল দ্ৰাবিড় আৰু সুনীল গাভাস্কাৰৰ পিছতে চতুৰ্থ সৰ্বাধিক ৰান সংগ্ৰহকাৰী হিচাপে পৰিগণিত হয় কোহলী ।

বিৰাটৰ কোহলীৰ জীৱনৰ সোণালী সময়ছোৱা বুলি ক’লে উল্লেখ কৰিব লাগিব ২০১৬ চনৰ পৰা ২০১৯ চনলৈকে ৩ বছৰীয়া সময়ৰ কথা ৷ কেৰিয়াৰৰ শিখৰত থকা সময়ত টেষ্ট ক্ৰিকেটত প্ৰায় ৬৭ গড়েৰে ৪০০০ ৰাণ সংগ্ৰহ কৰিছিল বিৰাটে । ২০২০ বৰ্ষত তেওঁৰ কেৰিয়াৰত কিছু অৱনতি ঘটাৰ পিছত পুনৰ ২০২৩ চনত উন্নতিৰ পথত গতি কৰে ।

কোহলীয়ে টেষ্ট ক্ৰিকেটৰ পৰা অৱসৰৰ কথা ঘোষণা কৰি আৱেগিক ইনষ্টাগ্ৰাম পোষ্ট কৰে ৷ তাৰ পাছতে বৃন্দাবনলৈ যোৱাৰ কথাটোৱে তেওঁৰ আধ্যাত্মিক প্ৰৱণতা ক’ত আছে সেয়া বাৰুকৈয়ে দেখুৱাইছে । তেওঁ আৰু অনুষ্কাই নিজৰ আধ্যাত্মিক বিশ্বাসৰ বিষয়ে প্ৰায়ে মুকলিকৈ কৈ আহিছে ৷ দুয়ো সাধু প্ৰেমানন্দ মহাৰাজৰ স্বীকৃতিপ্ৰাপ্ত ভক্ত, তেওঁলোক গুৰুজনাৰ ওচৰলৈ একাধিকবাৰ গৈছে ।

লগতে পঢ়ক : টেষ্ট ক্ৰিকেটৰ পৰা অৱসৰ, বিৰাট-অনুষ্কাৰ আৱেগিক পোষ্টে কন্দুৱাইছে অনুৰাগীক