নতুন দিল্লী: অসমৰ জীপাল বৈদ্যুতিক সংগীত জগতখনে ৰাষ্ট্ৰীয় মঞ্চত স্থান দখল কৰিছে ৷ ৰাজ্যৰ তিনিগৰাকী শিল্পী আদিত্য উপাধ্যায় (গুৱাহাটী), দিব্যজিৎ ৰায় (বঙাইগাঁও) আৰু নৱজ্যোতি বৰুৱাই (লখিমপুৰ)‘ৰিজ’নেট: দ্য ই ডি এম চেলেঞ্জ’ৰ শীৰ্ষ ১০ গৰাকী চূড়ান্ত প্ৰতিযোগীৰ ভিতৰত স্থান অৰ্জন কৰিছে । তথ্য আৰু সম্প্ৰচাৰ মন্ত্ৰণালয়ৰ এক বিবৃতিত কোৱা হৈছে যে বিশ্ব অডিঅ’ ভিজুৱেল আৰু মনোৰঞ্জন শীৰ্ষ সন্মিলন (WAVES) ২০২৫ৰ অধীনত ‘ভাৰতত সৃষ্টি’ ইয়াৰ এটা মূল বৈশিষ্ট্য ।
ভাৰতীয় সংগীত উদ্যোগৰ সহযোগত তথ্য আৰু সম্প্ৰচাৰ মন্ত্ৰণালয়ে আয়োজন কৰা ৰিজ’নেটৰ লক্ষ্য হৈছে ইলেক্ট্ৰনিক ডান্স মিউজিক (ই ডি এম)ৰ উদ্ভাৱন আৰু মৌলিকতাৰ ওপৰত গুৰুত্ব আৰোপ কৰা, সমগ্ৰ ভাৰত আৰু বিশ্বৰ উঠি অহা প্ৰতিভাক প্ৰদৰ্শন কৰা । সংগীত উদ্যোগৰ আগশাৰীৰ পেছাদাৰী পেনেলৰ নেতৃত্বত তীব্ৰ নিৰ্বাচনী প্ৰক্ৰিয়াৰ অন্তত ২০২৫ চনৰ ১২ এপ্ৰিলত দহজন চূড়ান্ত প্ৰতিযোগীৰ নাম ঘোষণা কৰা হৈছিল।
ভাৰতৰ উত্তৰ-পূৰ্বাঞ্চলৰ বৈদ্যুতিক সংগীত সমাজৰ বৈচিত্ৰ্য আৰু সৃষ্টিশীলতা দুয়োটাকে প্ৰতিনিধিত্ব কৰি ২০২৫ চনৰ ১ ৰ পৰা ৪ মে’লৈ মুম্বাইত অনুষ্ঠিত হ’বলগীয়া WAVES Summit ত তিনিওগৰাকী অসমীয়া চূড়ান্ত প্ৰতিযোগীয়ে লাইভ অনুষ্ঠান পৰিৱেশন কৰিব।
ষ্টেণ্ডআউট চূড়ান্ত প্ৰতিযোগীৰ ভিতৰত আছে নিষ্ঠাৰে সংগীতৰ প্ৰতি দায়বদ্ধতাৰ জৰিয়তে সংগীত জগতত নিজৰ নাম উজলাই তোলা নৱজ্যোতি বৰুৱা । তেওঁ শ্বেয়াৰ কৰে যে ইলেক্ট্ৰনিক মিউজিকৰ উত্থানৰ পৰা অনুপ্ৰাণিত হৈ তেওঁ সংগীত যাত্ৰা আৰম্ভ কৰিছিল আৰু পেছাদাৰী অডিঅ’ ইঞ্জিনিয়াৰিঙৰ কাম কৰাৰ পূৰ্বে ইউটিউবৰ জৰিয়তে সংগীত প্ৰডাকশ্যনৰ কাম শিকিছিল ৷
অডিঅ’ ইঞ্জিনিয়াৰ বৰুৱাই চেন্নাই আৰু বাংগালুৰুত বিভিন্ন প্ৰকল্পত কাম কৰি আহিছে । তেওঁ এ.আৰ. ৰহমান, অমিত ত্ৰিবেদী আৰু অনুৰাগ শইকীয়াৰ দৰে ভাৰতীয় সুৰকাৰৰ পৰা প্ৰেৰণা লাভ কৰে । লগতে আন্তঃৰাষ্ট্ৰীয় আইকন যেনে স্ক্ৰিলেক্স, জেড আৰু পৰ্টাৰ ৰবিনছনো তেওঁৰ বাবে প্ৰেৰণা । তেওঁ কয়, "মোৰ লক্ষ্য সদায় বিভিন্ন ধাৰাক মিহলাই শ্ৰোতাৰ বাবে সঁচাকৈয়ে অনন্য কিবা এটা সৃষ্টি কৰা ।"
আজিলৈকে তেওঁৰ অন্যতম কৃতিত্ব হৈছে অনন্যা শৰ্মাই গোৱা ছেলিম-ছুলেইমানৰ "এক মাৰ্টাবা"ৰ অফিচিয়েল ৰিমিক্স ৷ ইয়াক ৱাৰ্নাৰ মিউজিক ইণ্ডিয়াই বিতৰণ কৰা মাৰ্চেণ্ট ৰেকৰ্ডছৰ জৰিয়তে মুকলি কৰা হৈছে ।
অসমৰ আন এগৰাকী চূড়ান্ত প্ৰতিযোগী আদিত্য উপাধ্যায়ে এনে এক সন্মানীয় মঞ্চৰ অংশ হ’বলৈ পাই উল্লাস প্ৰকাশ কৰে । "ই ডি এম সম্প্ৰদায়ৰ আমাৰ বাবে ৱেভছ এটা ভাল সুযোগ, কিয়নো ভাৰতত এই সম্প্ৰদায় এতিয়া আগবাঢ়ি গৈ আছে । শীৰ্ষ ১০ গৰাকী চূড়ান্ত প্ৰতিযোগীৰ ভিতৰত থাকিবলৈ পাই মই সঁচাকৈয়ে কৃতজ্ঞ আৰু এইটো মোৰ কেৰিয়াৰৰ এক ডাঙৰ টাৰ্নিং পইণ্ট হ’ব ৷" তেওঁ এইদৰে শ্বেয়াৰ কৰে । সীমাবদ্ধতা অতিক্ৰম কৰি ভাৰতীয় ইলেক্ট্ৰনিক সংগীতৰ বৃদ্ধিত অৰিহণা যোগোৱাৰ তেওঁৰ ইচ্ছাই সংগীত প্ৰযোজক হিচাপে তেওঁৰ যাত্ৰা প্ৰতিফলিত কৰিছে ।
'ৰিজ’নেট: দ্য ই ডি এম চেলেঞ্জ'ৰ লক্ষ্য আছিল ইলেক্ট্ৰনিক সংগীত প্ৰডাকশ্যন আৰু ডি জেৰ ক্ষেত্ৰত ভাৰতীয়ৰ লগতে বিশ্বব্যাপী উদীয়মান প্ৰতিভাক উন্মোচন আৰু উন্নীত কৰা । এই প্ৰত্যাহ্বানৰ সফলতাই সংগীত সংমিশ্ৰণ, ইলেক্ট্ৰনিক সংগীত আৰু ডিজিং শিল্পীত্বৰ বাবে এক গোলকীয় কেন্দ্ৰ হিচাপে ভাৰতৰ স্থিতি শক্তিশালী কৰে । ভাৰত চৰকাৰে মুম্বাইত প্ৰথম বিশ্ব অডিঅ' ভিজুৱেল এণ্ড এণ্টাৰটেইনমেণ্ট ছামিট (ৱেভছ), মিডিয়া এণ্ড এণ্টাৰটেইনমেণ্ট (এম এণ্ড ই) খণ্ডৰ বাবে এক মাইলৰ খুঁটি অনুষ্ঠান অহা ১ মে’ৰ পৰা ৪ মে’লৈ আয়োজন কৰিব ।
আপুনি লাগিলে উদ্যোগৰ পেছাদাৰীয়েই হওঁক নতুবা বিনিয়োগকাৰী, সৃষ্টিকৰ্তা বা উদ্ভাৱকেই হওঁক, সন্মিলনখনে এম এণ্ড ই লেণ্ডস্কেপত সংযোগ, সহযোগিতা, উদ্ভাৱন আৰু অৰিহণা যোগোৱাৰ বাবে চূড়ান্ত গোলকীয় মঞ্চ প্ৰদান কৰিব ।
WAVES এ ভাৰতৰ সৃষ্টিশীল শক্তিক বৃদ্ধি কৰিবলৈ সাজু হৈছে, সমল সৃষ্টি, বৌদ্ধিক সম্পত্তি আৰু প্ৰযুক্তিগত উদ্ভাৱনৰ কেন্দ্ৰ হিচাপে ইয়াৰ স্থান নিশ্চিত কৰিবলৈ সাজু হৈছে । গুৰুত্বপূৰ্ণ উদ্যোগ আৰু খণ্ডবোৰৰ ভিতৰত আছে ব্ৰডকাষ্টিং, প্ৰিণ্ট মিডিয়া, টেলিভিছন, ৰেডিঅ', ফিল্মছ, এনিমেশ্যন, ভিজুৱেল ইফেক্ট, গেমিং, কমিক্স, শব্দ আৰু সংগীত, বিজ্ঞাপন, ডিজিটেল মিডিয়া, ছ'চিয়েল মিডিয়া প্লেটফৰ্ম, জেনেৰেটিভ এ আই, অগমেণ্টড ৰিয়েলিটী (এ আৰ), ভাৰ্চুৱেল ৰিয়েলিটী (ভি আৰ) আৰু এক্সটেণ্ডেড ৰিয়েলিটী (এক্স আৰ)।
লগতে পঢ়ক : সংমিশ্ৰণৰ প্ৰয়োজন সকলোতে, তাৰ বাবে লাগে উদাৰতা- এই বাৰ্তা লৈয়ে আহি আছে ‘ঝংকাৰ’
