ৰণবীৰ এলাহবাদিয়াক পাছপ’ৰ্ট ঘূৰাই দিয়াৰ নিৰ্দেশ উচ্চতম ন্যায়ালয়ৰ

নতুন দিল্লী: উচ্চতম ন্যায়ালয়ে সোমবাৰে পডকাষ্টাৰ ৰণবীৰ এলাহবাদিয়াক পাছপ’ৰ্ট ঘূৰাই দিয়াৰ অনুমতি দিয়ে, যাতে তেওঁ কামৰ সন্দৰ্ভত দেশৰ বাহিৰলৈ যাত্ৰা কৰিব পাৰে । বিষয়টো ন্যায়াধীশ সূৰ্য কান্ত আৰু এন কোটিশ্বৰ সিঙক লৈ গঠিত এখন বিচাৰপীঠৰ সন্মুখলৈ আহিছিল । অসম আৰু মহাৰাষ্ট্ৰ চৰকাৰে এলাহবাদিয়াৰ বিৰুদ্ধে তদন্ত সম্পূৰ্ণ হোৱা বুলি কোৱাৰ পিছত শীৰ্ষ ন্যায়ালয়ে চৰ্তটো শিথিল কৰাৰ সিদ্ধান্ত লয় ।

এলাহবাদিয়াৰ হৈ হাজিৰ হোৱা অভিনৱ চন্দ্ৰচুড়ে বিচাৰপীঠক আহ্বান জনাই যে বিচাৰপীঠে যাতে তেওঁৰ ক্লায়েণ্টৰ বিৰুদ্ধে দাখিল হোৱা সকলো এফ আই আৰ একেলগ কৰিবলৈ অনুমতি দিয়ে ৷ ইয়াৰ প্ৰয়োজনীয়তা সন্দৰ্ভত যুক্তি দিবলৈয়ো তেওঁ অনুমতি বিচাৰে । চন্দ্ৰচুড়ে যুক্তি দিয়ে যে অসমৰ এফ আই আৰ মুম্বাইতকৈ অধিক বিস্তৃত হ’ব পাৰে, কিন্তু একেটা ঘটনাক কেন্দ্ৰ কৰিয়ে ই উদ্ভৱ হৈছে ।

বিচাৰপীঠে চন্দ্ৰচূড়ক কয় যে ই তেওঁৰ ক্লায়েণ্টৰ বিৰুদ্ধে এজাহাৰসমূহ একত্ৰিত কৰাৰ বাবে তেওঁৰ অনুৰোধ বিবেচনা কৰিব আৰু পৰৱৰ্তী শুনানিত ইয়াক একে ঠাইলৈ আনিব । ইয়াৰ পাছত বিচাৰপীঠে এলাহবাদিয়াক তেওঁৰ পাছপ’ৰ্ট ঘূৰাই লোৱাৰ বাবে মহাৰাষ্ট্ৰ চাইবাৰ আৰক্ষী ব্যুৰ'ৰ কাষ চাপিবলৈ কয় ।

"আমি আবেদনকাৰীক তেওঁৰ পাছপ’ৰ্ট মুকলি কৰাৰ বাবে মহাৰাষ্ট্ৰ চাইবাৰ অপৰাধ ব্যুৰ'ত আবেদন কৰিবলৈ অনুমতি দিছো", বিচাৰপীঠে কয় যে তেওঁৰ বিদেশ ভ্ৰমণ সক্ষম কৰি তুলিবলৈ পাছপ’ৰ্ট ঘূৰাই দিয়াৰ নিৰ্দেশ দিয়া হৈছে ।

ফেব্ৰুৱাৰীত শীৰ্ষ ন্যায়ালয়ে এলাহবাদিয়াক এটা ইউটিউব অনুষ্ঠানৰ সময়ত তেওঁৰ বিতৰ্কিত মন্তব্যৰ বাবে দাখিল কৰা একাধিক এজাহাৰত গ্ৰেপ্তাৰৰ পৰা সুৰক্ষিত কৰিছিল আৰু তেওঁক থানেৰ আৰক্ষী থানা নোডাল চাইবাৰ আৰক্ষীৰ তদন্তকাৰী বিষয়াৰ ওচৰত তেওঁৰ পাছপ’ৰ্ট জমা দিবলৈ নিৰ্দেশ দিছিল ।

শীৰ্ষ আদালতে ৩ মাৰ্চত এলাহবাদিয়াক নৈতিকতা আৰু শালীনতা বজাই ৰাখি আৰু ইয়াক সকলো বয়সৰ দৰ্শকৰ বাবে উপযুক্ত কৰি তুলি তেওঁৰ পডকাষ্ট ‘দ্য ৰণবীৰ শ্ব’ পুনৰ আৰম্ভ কৰিবলৈ অনুমতি দিছিল ।

কৌতুক অভিনেতা সময় ৰাইনাৰ ইউটিউব অনুষ্ঠান ‘ইণ্ডিয়াজ গট লেটেণ্ট’ত পিতৃ-মাতৃ আৰু যৌন সম্পৰ্কৰ ওপৰত কৰা মন্তব্যৰ বাবে এলাহবাদিয়াৰ বিৰুদ্ধে গোচৰ ৰুজু কৰা হৈছিল । এলাহবাদিয়া আৰু ৰাইনাৰ বাহিৰেও, অসমত গোচৰটোত নাম থকা আনসকল হৈছে আশীষ চঞ্চলানী, যশপ্ৰীত সিং, অপূৰ্বা মখিজা ।

লগতে পঢ়ক : মুখৰ লেকাম নধৰি হেৰুৱালে লাখ লাখ অনুৰাগী, ৰণবীৰ-সময়ৰ কমিব নেকি উপাৰ্জনো ?