আপুনিও গাব পাৰিব গীত এটি... সংগীতশিল্পী ভূপেন উজীৰৰ জন্মদিনৰ বৰ্ণাঢ্য আয়োজন

হায়দৰাবাদ : স্বনামধন্য সংগীত পৰিচালক, সংগীতজ্ঞ, শব্দযন্ত্ৰী প্ৰয়াত ভূপেন উজীৰৰ ৭২ সংখ্যক জন্মদিনটো অহা ৫ এপ্ৰিল শনিবাৰে “ভূপেন উজীৰ স্মৃতি ৰক্ষা সমিতি’’ৰ উদ্যোগে বিশেষভাৱে উদ্‌যাপন কৰিবলৈ মনস্থ কৰিছে ৷ সংগীতশিল্পীগৰাকীৰ জন্মদিনৰ লগত সংগতি ৰাখি তেওঁৰ সুন্দৰ চিৰসেউজ কেইটিমান নিৰ্বাচিত গীতৰ এখন অনলাইন প্ৰতিযোগিতাৰো আয়োজন কৰা হৈছে ৷ প্ৰতিযোগিতাখনি দুটা শাখাত অনুষ্ঠিত হ’ব ৷ ‘ক’ শাখা ১৪ বছৰৰ অনুৰ্ধৰ আৰু ‘খ’ শাখা ১৪ বছৰৰ উৰ্ধৰ ৷ দুয়োটি শাখাতে তিনিটাকৈ বঁটা থাকিব ৷

প্ৰতিযোগিতাৰ নিয়মাৱলী তথা গীতসমূহ ইতিমধ্যেই ভূপেন উজীৰ স্মৃতি ৰক্ষা সমিতিৰ ফেচবুক পেজত (Bhupen Uzir Smriti Raksha Samiti) প্ৰকাশ কৰা হৈছে ৷ প্ৰতিযোগীসকলে আগন্তুক ২৫ মাৰ্চৰ ভিতৰত তেওঁলোকৰ গীতৰ ভিডিঅ' ৬০০১২৪১৮৭৫ আৰু ৯৮৬৪১৫৯৭৭৭ নম্বৰলৈ হোৱাটছআপ যোগে নাইবা bhupenuzirsrs@gmail.com ঠিকনাত ই-মেইল যোগে প্ৰেৰণ কৰিব লাগিব ৷

প্ৰয়াত সংগীতজ্ঞ ভূপেন উজীৰৰ ৭২ সংখ্যক জন্ম জয়ন্তী উদযাপনৰ যো-জা (Photo : ETV Bharat Assam)

ভূপেন উজীৰ স্মৃতি ৰক্ষা সমিতিয়ে জনোৱা অনুসৰি বিজয়ী প্ৰতিযোগীসকলক ট্ৰফীৰ লগতে নগদ ধন আৰু মানপত্ৰ প্ৰদান কৰা হ’ব ৷ প্ৰয়াত শিল্পীজনাৰ জন্মদিনটোত, অৰ্থাৎ আগন্তুক ৫ এপ্ৰিলত গুৱাহাটীৰ শ্ৰীমন্ত শংকৰদেৱ কলাক্ষেত্ৰৰ শ্ৰীমন্ত মাধৱদেৱ প্ৰেক্ষাগৃহত “হিয়া ভৰা শুভকামনাৰে ২০২৫’’ শীৰ্ষক এক অন্তৰংগ সুৰৰ সন্ধিয়াৰো আয়োজন কৰা হৈছে ৷ য’ত অসমৰ প্ৰতিষ্ঠিত আৰু ন-প্ৰজন্মৰ কেইবাগৰাকীও শিল্পীয়ে গীত পৰিৱেশন কৰাৰ লগতে প্ৰতিযোগিতাৰ শ্ৰেষ্ঠ প্ৰতিযোগীক গীত পৰিৱেশন কৰিবলৈ দিয়া হ’ব ৷ লগতে সেই অনুষ্ঠানতে বিজয়ী প্ৰতিযোগীসকলক বঁটা প্ৰদান কৰা হ’ব ৷

“হিয়া ভৰা শুভকামনাৰে ২০২৫’’ অনুষ্ঠানতে জীৱনজোৰা সাধনাৰ বাবে তিনিগৰাকী বাদ্যযন্ত্ৰী আৰু শব্দযন্ত্ৰীক বিশেষভাৱে সন্মানিত কৰিবলৈয়ো সিদ্ধান্ত লৈছে ভূপেন উজীৰ স্মৃতি ৰক্ষা সমিতিয়ে ৷ অনুষ্ঠানটোত সংগীতানুৰাগী ৰাইজৰ সহায়-সহযোগিতা আয়োজক সমিতিয়ে কামনা কৰিছে ৷ উল্লেখ্য যে, অনুষ্ঠানটি ভূপেন উজীৰ স্মৃতি ৰক্ষা সমিতিয়ে অসম চৰকাৰৰ সাংস্কৃতিক সঞ্চালকালয়ৰ সহযোগিতাত অনুষ্ঠিত কৰিব ।

লগতে পঢ়ক : বিশিষ্ট অভিনেতা মেহতাব হুছেইনৰ দেহাৱসান