জুবিন নৌটিয়ালৰ সংগীতানুষ্ঠান বাতিল সন্দৰ্ভত সন্দৰ্ভত কি ক’লে আয়োজকে... - JUBIN NAUTIYAL MUSIC CONCERT
Jubin Nautiyal music concert: কাৰিকৰী কাৰণতেই বাতিল কৰা হ'ল জুবিন নৌটিয়ালৰ অনুষ্ঠান । অনুষ্ঠান বাতিল সন্দৰ্ভত মন্তব্য প্ৰকাশ আয়োজক মৌচুমী বৰাৰ । শুকুৰবাৰে মহানগৰীৰ নেহৰু ষ্টেডিয়ামত অনুষ্ঠিত হ'বলগীয়া আছিল এই অনুষ্ঠান ।
Published : March 30, 2024 at 11:42 AM IST
গুৱাহাটী, 30 মাৰ্চ : এটা ব্যক্তিগত সংগঠন সা ৰে গা মা আৰ্টছ অৱ্ মিউজিকৰ অধীনত জুবিন নৌটিয়ালৰ সংগীতানুষ্ঠান অনুষ্ঠিত হোৱাৰ কথা আছিল মহানগৰীৰ নেহৰু ষ্টেডিয়ামত ৷ কিন্তু অনুষ্ঠানৰ কেইঘণ্টামান পূৰ্বে বাতিল কৰা হ'ল তেওঁৰ সংগীতানুষ্ঠান । মহানগৰ আৰক্ষী আয়ুক্তগৰাকীয়ে এক প্ৰেছবাৰ্তা যোগে অৱগত কৰে এই কথা ।
এই সন্দৰ্ভত আৰক্ষী আয়ুক্ত গৰাকীয়ে উল্লেখ কৰে, "এটা ব্যক্তিগত সংগঠন সা ৰে গা মা আৰ্টছ অৱ্ মিউজিক এ আজি নেহৰু ষ্টেডিয়ামত আয়োজন কৰা এক অনুষ্ঠানৰ বাবে আৰক্ষী কৰ্তৃপক্ষৰ পৰা অনুমতি লাভ কৰিছিল"। জুবিন নৌটিয়ালৰ অনুষ্ঠান বাতিলৰ পাচত আটক কৰা হৈছিল আয়োজক সমিতিৰ মৌচুমী বৰাসহ ৮ জনক ।
নিশা পাণবজাৰ থানাত দীৰ্ঘসময়জোৰা জেৰাৰ অন্তত যাবলৈ দিয়া হয় মৌচুমী বৰাসহ মুঠ ৮ জনক । স্বাস্থ্য পৰীক্ষাৰ অন্তত আটাইকেইজনক যাবলৈ দিয়া হৈছে । অনুষ্ঠান বাতিলৰ সন্দৰ্ভত সাংবাদিকে সোধা প্ৰশ্নৰ উত্তৰত মৌচুমী বৰাই কয়, ‘‘আমাৰ একো অসুবিধা হোৱা নাছিল’’ ।
‘‘জুবিন নৌটিয়ালৰ অন্য শ্ব' আছিল আৰু তেওঁ দেৰাদুনৰ পৰা দিল্লীলৈ গাড়ীৰে আহিছিল যিটোৰ খৰচ আমি বহন কৰিছো । তেওঁৰ ফ্লাইট দিনৰ 2 টা বজাত আছিল । 2 টা বজাত তেওঁ আহি নোপোৱাৰ কাৰণে সেইখনৰ সলনি ৫ টা বজাত ফ্লাইট বুক কৰা হৈছিল । কিন্তু ৫ বজাৰ বিমানখনেৰে তেওঁ প্ৰায় ৭.৩০ বজাত গুৱাহাটীত অৱতৰণ কৰিলেহেঁতেন’’ । বৰাই কয় ৷
তেওঁ আৰু কয়, ‘‘আমাৰ অনুষ্ঠানেই আৰম্ভ হোৱাৰ কথা আছিল ৫ বজাত । সেয়ে এই সিদ্ধান্ত ল'বলগীয়া হয় ৷’’ ইফালে অনুষ্ঠান বাতিলৰ পাচত জুবিন নৌটিয়ালেও সামাজিক মাধ্যমযোগে এক স্পষ্টীকৰণ প্ৰকাশ কৰে ।
উল্লেখ্য যে, অনুষ্ঠানটো বাতিলৰ পাচতেই কালি পানীখাইটিৰ পৰা আৰক্ষীয়ে আটক কৰিছিল মৌচুমী বৰাক । সা ৰে গা মা আৰ্টচ অৱ্ মিউজিকৰ উদ্যোগত অনুষ্ঠিত এই অনুষ্ঠানত জুবিন নৌটিয়ালৰ উপৰিও ধৰ্মেশ য়েলাণ্ডেও অংশগ্ৰহণ কৰাৰ কথা আছিল ।
মন কৰিবলগীয়া যে এই একেটা অনুষ্ঠানেই চলিত মাহৰ ১৬ মাৰ্চত অনুষ্ঠিত হোৱাত কথা আছিল । পৰৱৰ্তী সময়ত ১৬ মাৰ্চৰ পৰিৱৰ্তে ২৯ মাৰ্চলৈ পিছুৱাই দিয়া হৈছিল । কিন্তু শুকুৰবাৰে অনুষ্ঠানৰ আৰম্ভণিৰ কিছুঘণ্টাৰ পূৰ্বে অনুষ্ঠানটো পুনৰ এবাৰ বাতিল হোৱাত অনুৰাগীসকল আশাহত হৈ পৰে ।
লগতে পঢ়ক : দুবাইত মমৰ মূৰ্তি উন্মোচনৰ পিচত পত্নী স্নেহালৈ এই প্ৰশ্ন আল্লু অৰ্জুনৰ - Allu Arjun Wax Statue
