ছলমান খানক হত্যাৰ ষড়যন্ত্ৰ, হাৰিয়ানাৰ পৰা নৱী মুম্বাই আৰক্ষীয়ে আটক কৰে এজনক

চিটাৰা ডেস্ক, 17 অক্টোবৰ : বলীউডৰ অভিনেতা ছলমান খানক হত্যাৰ পৰিকল্পনা চলিছে ! হত্যা কৰাৰ অভিযোগ উত্থাপন হোৱা এজন ৱাণ্টেড অভিযুক্তক নৱী মুম্বাই আৰক্ষীয়ে আটক কৰিছে বুলি এগৰাকী বিষয়াই জানিবলৈ দিয়ে ।

অভিযুক্ত সুখাক হাৰিয়ানাৰ পানীপথৰ পৰা আটক কৰা হৈছে বুলি বিষয়াজনে বুধবাৰে সদৰী কৰে । নৱী মুম্বাইলৈ অনাৰ পিছত বৃহস্পতিবাৰে তেওঁক আদালতত হাজিৰ কৰোৱা হ’ব, আৰক্ষীয়ে জানিবলৈ দিয়ে ।

চলিত বৰ্ষৰ জুন মাহত, আৰক্ষীয়ে নৱী মুম্বাইৰ পানভেলৰ ওচৰত থকা তেওঁৰ ফাৰ্মহাউচলৈ যাওঁতে অভিনেতাজনক দুৰ্বৃত্তই লক্ষ্য কৰি লোৱাৰ কথা জানিবলৈ দিছিল । 2024 চনৰ এপ্ৰিলত মুম্বাইস্থিত তেওঁৰ বান্দ্ৰাৰ বাসগৃহৰ বাহিৰত গুলীচালনাৰ পিছত এই তথ্য় লাভ কৰিছিল আৰক্ষীয়ে ।

খানে এই বছৰৰ আৰম্ভণিতে আৰক্ষীক কৈছিল যে লৰেন্স বিষ্ণৈ দলটোৱে তেওঁক আৰু তেওঁৰ পৰিয়ালৰ সদস্যসকলক হত্যা কৰাৰ উদ্দেশ্যৰে তেওঁৰ বাসগৃহত গুলীচালনা কৰিছিল । অভিনেতাজনৰ বিবৃতিটো ঘটনাটোৰ সন্দৰ্ভত মুম্বাই আৰক্ষীয়ে এখন আদালতত দাখিল কৰা অভিযোগপত্ৰৰ অংশ ।

অভিনেতাজনে উল্লেখ কৰিছিল যে দুজন অচিনাক্ত ব্যক্তিয়ে 2024 চনৰ জানুৱাৰীত ভুৱা পৰিচয় ব্যৱহাৰ কৰি পানভেলৰ ওচৰত থকা তেওঁৰ ফাৰ্মহাউচত অনধিকাৰ প্ৰৱেশ কৰিবলৈ চেষ্টা কৰিছিল । 2022 চনত তেওঁৰ ভৱনৰ বিপৰীতে থকা এখন বেঞ্চত এখন ভাবুকি পত্ৰ পোৱা গৈছিল ৷ আনহাতে 2023 চনৰ মাৰ্চ মাহত তেওঁলোকে লৰেন্স বিষ্ণৈ দলৰ পৰা ইমেইলৰ ভাবুকি পাইছিল বুলি খানে আৰক্ষীক কৈছিল ৷

আৰক্ষীয়ে জনোৱা অনুসৰি, লৰেন্স বিষ্ণৈ আৰু সম্পত নেহৰা দলটোৱে তেওঁৰ বান্দ্ৰাৰ বাসগৃহ, পানভেল ফাৰ্মহাউচ আৰু চলচ্চিত্ৰ শ্বুটিঙৰ স্থানসমূহ পৰীক্ষা কৰাৰ লগতে খানৰ গতিবিধি নিৰীক্ষণ কৰিবলৈ প্ৰায় 60 ৰ পৰা 70 জন সদস্য মোতায়েন কৰিছিল ।

খানক হত্যা কৰিবলৈ ষড়যন্ত্ৰ কৰাৰ বিষয়ে নিৰ্দিষ্ট তথ্য লাভ কৰাৰ পিছত 24 এপ্ৰিলত পানভেল টাউন আৰক্ষী থানাত কেইবাজনো লোকৰ বিৰুদ্ধে এটা গোচৰ ৰুজু কৰা হৈছিল ।

লগতে পঢ়ক : ছলমান খান-ডাউদ ইব্ৰাহিমৰ সহায়কাৰীক মুকলি ভাবুকি