চেন্নাই: অস্কাৰ বিজয়ী সংগীতজ্ঞ এ আৰ ৰহমান ডিহাইড্ৰেচন আৰু ডিঙিৰ বিষৰ বাবে দেওবাৰে চিকিৎসালয়ত ভৰ্তি হোৱাৰ কেইঘন্টামানৰ পাছত তেওঁক ঘৰলৈ যাবলৈ দিয়া হয় । তেওঁৰ পৰিয়াল আৰু বিষয়াসকলে এই কথা নিশ্চিত কৰিছে । চেন্নাইৰ এখন চিকিৎসালয়ত ভৰ্তি হোৱা ৫৮ বছৰীয়া সংগীত শিল্পীগৰাকী পানীলগা আৰু গেষ্ট্ৰিক সমস্যাৰ বাবে অসুস্থ অনুভৱ কৰা বুলি জানিব পৰা গৈছে । ইয়াৰ পিছতে তেওঁক চেন্নাইৰ এপ’ল’ হাস্পতালত ভৰ্তি কৰোৱা হয় য’ত চিকিৎসকে কেইবাটাও পৰীক্ষা কৰি ৰহমানৰ স্বাস্থ্য এতিয়া সুস্থিৰ হোৱা বুলি নিশ্চিত কৰে ।
স্বাস্থ্যৰ আপডেট দিলে মুখ্যমন্ত্ৰী এম কে ষ্টেলিনে
তামিলনাডুৰ মুখ্যমন্ত্ৰী এম কে ষ্টেলিনে ৰহমানৰ প্ৰতি থকা সমৰ্থন শ্বেয়াৰ কৰি টুইটৰ জৰিয়তে জনসাধাৰণক আশ্বস্ত কৰে যে সংগীতজ্ঞজন ভালেই আছে । এটা টুইটত ষ্টেলিনে লিখিছে, "এ আৰ ৰহমানক চিকিৎসালয়ত ভৰ্তি হোৱাৰ খবৰ পোৱাৰ লগে লগে চিকিৎসকৰ সৈতে যোগাযোগ কৰি তেওঁৰ স্বাস্থ্যৰ বিষয়ে বুজ লৈছিলোঁ । এতিয়া তেওঁ ভালেই আছে আৰু সোনকালে ঘৰলৈ উভতি আহিব ।"
To all our dear fans, family, and well-wishers, I sincerely thank you for your love, prayers, and support. My father felt a bit weak due to dehydration hence we went ahead and did some routine tests, but I’m happy to share that he is doing well now. Your kind words and blessings…
— A.R.Ameen (@arrameen) March 16, 2025
এ আৰ ৰহমানৰ পুত্ৰৰ পোষ্ট
ৰহমানৰ পুত্ৰ এ আৰ আমিনেও ছ’চিয়েল মিডিয়াতো এটা এই বিষয়ে উল্লেখ কৰে । সংগীতজ্ঞগৰাকীৰ বাবে প্ৰাৰ্থনা কৰা অনুৰাগীসকলক ধন্যবাদ জনাই তেওঁ লিখিছে, "আমাৰ সকলো প্ৰিয় অনুৰাগী, পৰিয়াল আৰু শুভাকাংক্ষীলৈ, আপোনালোকৰ মৰম, প্ৰাৰ্থনা আৰু সমৰ্থনৰ বাবে মই আন্তৰিকতাৰে ধন্যবাদ জনাইছো । ডিহাইড্ৰেচনৰ বাবে দেউতাই অলপ দুৰ্বল অনুভৱ কৰি আছিল । কিন্তু মই আপোনালোকক ক’বলৈ পাই সুখী যে তেওঁৰ অৱস্থা এতিয়া ঠিকেই আছে । আপোনাৰ মৰমলগা কথা আৰু আশীৰ্বাদ আমাৰ বাবে বহুত গুৰুত্বপূৰ্ণ ।"
ৰহমানৰ মেনেজাৰ সেনথিল ভেলানেও তেওঁৰ ডিচচাৰ্জৰ খবৰ নিশ্চিত কৰি কয়, "ডিহাইড্ৰেচন আৰু গেষ্ট্ৰিক সমস্যাৰ বাবে তেওঁক আজি পুৱা চিকিৎসালয়ত ভৰ্তি কৰা হৈছে । চিকিৎসকে পৰীক্ষা কৰিলে, এতিয়া সকলো ঠিকেই আছে । এতিয়া ঘৰলৈ উভতি আহিছে আৰু ভালেই আছে ।"
শেহতীয়াকৈ এড শ্বীৰানৰ চেন্নাই ভ্ৰমণৰ সময়ত এ আৰ ৰহমানে তেওঁৰ লগত এটি স্মৰণীয় অনুষ্ঠানত পৰিবেশন কৰে আৰু তাৰ পিছতে তেওঁ চিকিৎসালয়ত ভৰ্তি হয় । বৰ্তমান ৰহমানে বহুকেইটা প্ৰকল্পত কাম কৰি আছে । য’ত আছে আটাইতকৈ প্ৰত্যাশিত তেৰে ইছক মেইন, লাহোৰ ১৯৪৭ আৰু গান্ধী টকছ ।
লগতে পঢ়ক: সংগীত সুৰকাৰ এ আৰ ৰহমান এপ’ল’ হাস্পতালত চিকিৎসাধীন
