চিটাৰা ডেস্ক, 12 ছেপ্টেম্বৰ : বলীউডৰ অভিনেত্ৰী মালাইকা অৰোৰাই বুধবাৰে সন্ধিয়া পিতৃ অনিল কুলদীপ মেহতাৰ মৃত্যুৰ পিছতে এক বিবৃতি প্ৰকাশ কৰে । ইয়াৰ পূৰ্বে সংবাদ মাধ্যমত তেওঁৰ নাম অনিল অৰোৰা বুলি উল্লেখ কৰা হৈছিল যদিও অভিনেত্ৰীগৰাকীৰ আনুষ্ঠানিক বিবৃতিত উল্লেখ কৰা পিতৃৰ নামে ছ’চিয়েল মিডিয়া ব্যৱহাৰকাৰীসকলক বিভ্ৰান্ত কৰিছে । ব্যৱহাৰকাৰীসকলে মালাইকা অৰোৰাৰ পিতৃৰ উপাধি সন্দৰ্ভত বিভিন্ন ধৰণৰ মন্তব্য আৰু প্ৰশ্ন কৰিছে ।
মালাইকা অৰোৰাৰ বক্তব্য
বুধবাৰে সন্ধিয়া মালাইকা অৰোৰাই তেওঁৰ অফিচিয়েল ইনষ্টাগ্ৰামত পৰিয়ালটোৰ হৈ এটা বিবৃতি প্ৰকাশ কৰি লিখিছে, “আমাৰ প্ৰিয় পিতৃ অনিল মেহতাৰ মৃত্যুৰ কথা ঘোষণা কৰি আমি অত্যন্ত দুখিত । তেওঁ এজন নম্ৰ আত্মা, এজন নিষ্ঠাৱান ককাক, এজন প্ৰিয় স্বামী আৰু আমাৰ আটাইতকৈ ভাল বন্ধু আছিল । আমাৰ পৰিয়াল এই মুহূৰ্তত হতবাক হৈ পৰিছে, আৰু আমি এই কঠিন সময়ত সংবাদ মাধ্যম আৰু শুভাকাংক্ষীসকলৰ পৰা গোপনীয়তাৰ বাবে অনুৰোধ জনাইছো । আমি আপোনাৰ বুজাবুজি, সমৰ্থন আৰু সন্মানক প্ৰশংসা কৰো । কৃতজ্ঞতাৰে, জয়েছ, মালাইকা, অমৃতা, শ্বাকিল, আৰহান, আজান, ৰিয়ান, কেছপাৰ এক্সেল, ডাফী আৰু বাডী ।" পোষ্টটোৰ শেষত, মালাইকাই তেওঁৰ দেউতাকৰ নাম 'অনিল কুলদীপ মেহতা' লিখিছিল ।
অনিল মেহতাৰ উপাধি আৰু বয়সক লৈ ব্যৱহাৰকাৰীৰ প্ৰতিক্ৰিয়া
মালাইকাৰ এই বক্তব্যৰ পিছত তেওঁৰ বন্ধু-বান্ধৱী, চেলেব্ৰিটী আৰু একাংশ অনুৰাগীয়ে শোক প্ৰকাশ কৰাৰ সময়তে একাংশ ব্যৱহাৰকাৰীয়ে তেওঁৰ পিতৃৰ উপাধিৰ বিষয়ে কমেণ্ট ছেকশ্যনত জানিব বিচাৰিছিল । এজন ব্যৱহাৰকাৰীয়ে লিখিছে, “মই এটা কথা বুজিব পৰা নাই, মালাইকাৰ বয়স 50 বছৰ আৰু দেউতাকৰ বয়স 62 বছৰ, গতিকে মাত্ৰ 12 বছৰৰ ব্যৱধান কেনেকৈ সম্ভৱ ? অলপ বিভ্ৰান্তিৰ সৃষ্টি হৈছে ।” আন এজনে লিখিছে, “মালাইকা অৰোৰা আৰু পিতৃ মেহতা নেকি ?” অন্য এজনে মন্তব্যৰ উত্তৰত ক'লে, “তেওঁ মালাইকাৰ সতীয়া পিতৃ ?” এজন ব্যৱহাৰকাৰীয়ে লিখিছে, “কেনেকৈ তেওঁৰ উপাধি অৰোৰা আৰু দেউতাকৰ উপাধি মেহতা ?”
সতীয়া পিতৃ
অনিল কুলদীপ মেহতা আছিল মালাইকাৰ সতীয়া পিতৃ । অনিল কুলদীপ মেহতাৰ উপাধিক লৈ হোৱা বিতৰ্কৰ পিছত সংবাদ মাধ্যমে ইয়াৰ সত্যতা জানিবলৈ চেষ্টা কৰে । এক ঘনিষ্ঠ সূত্ৰই আইএনএছক জনোৱা মতে, তেওঁ আচলতে মালাইকাৰ সতীয়া পিতৃ ।
বুধবাৰে পুৱা প্ৰায় 9.00 বজাত মুম্বাইৰ বান্দ্ৰা অঞ্চলৰ আয়েশা মেন’ৰ বিল্ডিঙৰ বাসগৃহত সংঘটিত হয় এই আত্মহত্যাৰ ঘটনা । মুম্বাই আৰক্ষীয়ে ঘটনাস্থলীত উপস্থিত হৈ বিষয়টোৰ তদন্ত কৰে । প্ৰাৰম্ভিক তদন্তত আৰক্ষীয়ে ইয়াক আত্মহত্যা বুলি ঘোষণা কৰিছে ।
লগতে পঢ়ক : সহজ নাছিল : মাক-দেউতাকৰ বিচ্ছেদ সন্দৰ্ভত মালাইকা অৰোৰাৰ ভাষ্য - MALAIKA ARORA FATHER PASSES AWAY
