বিষ্ণু প্ৰসাদ ৰাভাৰ সৈনিক সত্তাটো তুলি ধৰাৰ উদ্দেশ্যৰে নতুন গান "কমৰেড ৰাভা"
মুক্তি লাভ কৰিলে বিষ্ণুপ্ৰসাদ ৰাভাৰ ওপৰত নিৰ্মিত প্ৰথমটো অসমীয়া জীৱনীমূলক গীত "কমৰেড ৰাভা"ই । শেহতীয়াকৈ সামাজিক মাধ্যম যোগে মুক্তি দিয়া হৈছে গীতটি ।
By ETV Bharat Entertainment Team
Published : June 18, 2025 at 6:52 PM IST
গুৱাহাটী : ৰাভা দিৱসৰ পূৰ্বে মুক্তি লাভ কৰিলে বিষ্ণুপ্ৰসাদ ৰাভাৰ ওপৰত নিৰ্মিত প্ৰথমটো অসমীয়া জীৱনীমূলক গীত "কমৰেড ৰাভা"। সৈনিকশিল্পী বিষ্ণু প্ৰসাদ ৰাভাৰ সৈনিক সত্তাটো তুলি ধৰাৰ উদ্দেশ্যৰে ৰচনা কৰা হৈছে গীতটি । গীতটিৰ কথা-সুৰ আৰু সংগীত ড° সীমান্ত দাসৰ । শেহতীয়াকৈ সামাজিক মাধ্যম যোগে মুক্তি দিয়া হৈছে গীতটি ।
"কমৰেড ৰাভা" পৰিকল্পনাৰ সন্দৰ্ভত ই টিভি ভাৰতৰ সাংবাদিকৰ সৈতে এক টেলিফোনিক বাৰ্তালাপ ড° সীমান্ত দাসৰ-
"কমৰেড ৰাভা"ৰ ৰচনাৰ আঁৰৰ কিছু কথা
ড° সীমান্ত দাসে কয়, “অসমত বিষ্ণু প্ৰসাদ ৰাভাৰ নিচিনা আৰু দ্বিতীয়গৰাকী নেতা পোৱা নাযায় । সেইটোৱেই হ'ল মূল কাৰণ যিটো কাৰণত মই গীতটো লিখিবলৈ আগবাঢ়ি আহিলোঁ । বিষ্ণু প্ৰসাদ ৰাভাৰ সন্দৰ্ভত আমাৰ ঘৰত সৰুৰে পৰা চর্চা চলি অহা দেখা পাইছোঁ । ইয়াৰে বেছি ভাগ কথাই আমি আমাৰ দেউতাৰ মুখৰ পৰা শুনিছিলোঁ । সৰুৰে পৰাই বিষ্ণু প্ৰসাদ ৰাভাৰ চৰিত্ৰটোৱে আকৰ্ষণ কৰি আহিছিল । তেওঁ কিদৰে সশস্ত্ৰ বিপ্লৱৰ প্ৰতি আগবাঢ়ি গৈছিল, সেই দিশটো আমাৰ ঘৰত সৰুৰে পৰা চর্চা হৈছিল ।”
তেওঁ লগতে আৰু কয়, “আনহাতে বিদ্যালয়ত পঢ়ি থাঁকোতে মই প্ৰথমবাৰৰ বাবে পোৱা পুৰস্কাৰৰ কিতাপৰ টোপোলাত এখন কিতাপ আছিল ‘অকণিৰ বিষ্ণুৰাভা’ । মোৰ লগত বিষ্ণুপ্ৰসাদ ৰাভাৰ চৰিত্ৰটো সৰুৰে পৰা জড়িত । মই যে কেৱল কলাগুৰুৰ দিশতো অধ্যয়ন কৰিছিলোঁ সেইটো নহয়, সৈনিক বিষ্ণুপ্ৰসাদ ৰাভাৰ এটা দিশো অধ্যয়ন কৰাৰ সুবিধা সৰুৰে পৰা পাইছিলোঁ । এইবোৰ কাৰণতেই মই গীতটো লিখিবলৈ অনুপ্ৰাণিত হ'লোঁ । ঘৰখনত যিটো পৰিৱেশ আছিল সেইটোৱে মোক প্ৰত্যক্ষ বা পৰোক্ষভাৱে গীতটি লিখাৰ বাবে অনুপ্ৰাণিত কৰিছিল ।”
গীতটি ৰচনাৰ পৰিকল্পনা কিমান দিনৰ ?
দাসে কয়, “গীতটি লিখিবলৈ আৰম্ভ কৰিছিলোঁ আজিৰে পৰা ১ বছৰ ৭ মাহ পূৰ্বে । গীতটি লিখাৰ সময়ত বিষ্ণু প্ৰসাদ ৰাভাৰ বিভিন্ন ঘটনাৱলীৰ ওপৰত অধ্যয়ন কৰি লিখা হৈছিল ।”
দৃশ্যগ্ৰহণ ক’ত ক’ত কৰা হৈছিল ?
মেঘালয়, যোৰাবাটৰ আশে-পাশে, অসম মেঘালয়ৰ সীমান্তৱৰ্তী ৰাণীখামাৰত গীতটোৰ দৃশ্যগ্ৰহণ কৰা হৈছিল ।
বিষ্ণু প্ৰসাদ ৰাভা কলাগুৰু নে সৈনিক শিল্পী !
বহুসময়ত বিষ্ণু প্ৰসাদ ৰাভা কলাগুৰু নে সৈনিক শিল্পী এই সন্দৰ্ভত বিভিন্নজনে বহুধৰণৰ মন্তব্য প্ৰকাশ কৰা দেখা যায় । এই সন্দৰ্ভত ড° সীমান্ত দাসে কয়, “বিষ্ণুপ্ৰসাদ ৰাভাক কলাগুৰু বুলি সকলোৱে চিনি পায় । মোৰ মতে এগৰাকী ব্যক্তিৰ পৰিচয় কেতিয়াও সীমাৱদ্ধ হৈ থাকিব নালাগে । বিষ্ণু প্ৰসাদ ৰাভা এনে এজন ব্যক্তি আছিল, অস্ত্ৰও ধৰিছিল তুলিকাও কৰিছিল । আমি কেৱল তেওঁৰ এটা দিশ জানিলেই নহ'ব । তেওঁক আমি জানিবলৈ হ’লে একেবাৰে শৈশৱৰ পৰা তেওঁ মানসিক ধৰণে কেনেকুৱা এজন ব্যক্তি আছিল, তেওঁ যে কলা- সংস্কৃতিৰ লগত জড়িত থকাৰ লগতে তেওঁৰ ভিতৰত এটা বৈপ্লৱিক সত্তাও আছিল সেই সকলোবোৰ দিশ জানিব লাগিব । মোৰ মতে কলাগুৰু শব্দটোৱে কেৱল তেওঁৰ সাংস্কৃতিক দিশটোকহে প্ৰতিনিধিত্ব কৰে, সেই শব্দটোৱে কিন্তু তেওঁৰ বৈপ্লৱিক সত্তাটোক প্ৰতিনিধিত্ব নকৰে । মোৰ মতে সৈনিক শিল্পী শব্দটো তেওঁৰ নামটোৰ লগত বেছি মিলা যেন অনুভৱ হয় । বিষ্ণুপ্ৰসাদ ৰাভাৰ সৈনিক সত্তাটো আমি কেতিয়াও নুই কৰিব নোৱাৰোঁ । যদিহে তেখেতৰ সেই সত্তাটো পাহৰি যাওঁ তেন্তে আচলতে আমি কেতিয়াও বিষ্ণু প্ৰসাদ ৰাভাক বুজিয়ে নাপালোঁ ।”
উল্লেখ্য যে, গীতটিৰ কাহিনী, ধাৰণা, পৰিচালনা আৰু প্ৰযোজনা ড° সীমান্ত দাসৰ । চিত্ৰগ্ৰহণ কৰিছে অৰুপ গয়াৰীয়ে । গীতটিত অভিনয় কৰিছে কেনী বসুমতাৰী, অমৰেন্দ্ৰ ডেকা, কল্পনা দাস, জাহ্নবী দাস, মানস প্ৰতিম হালৈ, দিলীপ বর্মনকে ধৰি কেইবাগৰাকীও অভিনেতা-অভিনেত্ৰীয়ে ।
লগতে পঢ়ক : প্রথমখন অসমীয়া ক’র্ট ৰূম ৱেব ছিৰিজ ‘ন্যায়’ মুক্তিৰ দিশে
