এড শ্বীৰাণৰ নতুন গান “ছেফায়াৰ”ত ভাৰতীয় সংস্কৃতিৰ প্ৰতিফলন, কেমিঅ’ত শতিকাৰ জনপ্ৰিয় তাৰকাৰ এভূমুকি

হায়দৰাবাদ: ব্ৰিটিছ গায়ক-গীতিকাৰ এড শ্বীৰাণে তেওঁৰ শেহতীয়া মুক্তিৰ জৰিয়তে সমগ্ৰ ভাৰততে অনুৰাগীসকলক উত্তেজিত কৰি তুলিছে । তেওঁৰ নতুন গান ছেফায়াৰত ছাঁ দেখা গৈছে ভাৰতীয় সংস্কৃতি, ভাষা আৰু সংগীতৰ ৷ বিশেষভাৱে ইয়াক উদযাপন কৰা হৈছে ।

জনপ্ৰিয় ভাৰতীয় গায়ক অৰিজিত সিঙে কণ্ঠ নিগৰোৱা এই ট্ৰেকটোৱে ইয়াৰ আকৰ্ষণীয় সুৰ, উন্নতমানৰ ভিজুৱেল আৰু ভাৰতৰ প্ৰতি শ্ৰদ্ধাঞ্জলিৰ বাবে দ্ৰুতগতিত লাইক লাভ কৰিছে ।

শেহতীয়াকৈ ভাৰত ভ্ৰমণৰ সময়ত শ্বুট কৰা ছেফায়াৰৰ মিউজিক ভিডিঅ’টোত শ্বীৰাণে ৰঙীন ভাৰতীয় ৰাজপথসমূহ অতিক্ৰম কৰা, আইক'নিক লেণ্ডমাৰ্কসমূহ ভ্ৰমণ কৰা আৰু স্থানীয় শিশুসকলৰ সৈতে বন্ধন গঢ়ি তোলাৰ দৃশ্য দেখুওৱা হৈছে, য’ত যুৱ ফুটবল খেলুৱৈৰ এটা দলো আছে । ভিডিঅ’টোত ভাৰতৰ সংস্কৃতিৰ আভাস পোৱা গৈছে । মিউজিক ভিডিঅ’টোত কেমিঅ’ চৰিত্ৰত ওলাই বলীউডৰ ছুপাৰষ্টাৰ শ্বাহৰুখ খান ।

অৰিজিত সিঙে কেৱল ট্ৰেকটোত গান গোৱাই নহয়, এডৰ অনন্য ক্ষমতাৰ সৈতে পৰম্পৰাগত ভাৰতীয় শব্দৰ সংমিশ্ৰণ ঘটাই চেতাৰ বজাইছে । ছেফায়াৰৰ এটা আকৰ্ষণীয় মুহূৰ্ত হ'ল শ্বীৰাণে পাঞ্জাবী শাৰী এটা গাবলৈ কৰা আন্তৰিক প্ৰচেষ্টা: "চম চম চমকে সীতাৰে ৱাৰ্গী", যিটোক অনুৰাগীসকলে গীতটোৰ অন্যতম হাইলাইট বুলি অভিহিত কৰিছে ।

শ্বীৰাণে ছেফায়াৰৰ সৈতে নিজৰ আৱেগিক সম্পৰ্ক অনুৰাগীৰ আগত প্ৰকাশ কৰে ইনষ্টাগ্ৰামৰ জৰিয়তে । শ্বীৰাণে লিখিছে, "প্লেৰ বাবে মই শেষ কৰা প্ৰথমটো গীত আছিল ছেফায়াৰ, যিয়ে মোক এলবামটো ক’লৈ গৈ আছে সেই কথা জানিবলৈ দিছিল । সেইবাবেই মই ভাৰতৰ কিছুমান শ্ৰেষ্ঠ সংগীতজ্ঞৰ সৈতে গোৱাত ৰেকৰ্ডিং প্ৰক্ৰিয়া শেষ কৰিলোঁ । ই আছিল এক অবিশ্বাস্য সৃষ্টিশীল প্ৰক্ৰিয়া ।"

তেওঁ লগতে কয়, "মোৰ বাবে চূড়ান্ত কথাটো আছিল @arijitsinghক এই ৰেকৰ্ডত স্থান দিয়া । সেই বিষয়ে কেইদিনমানৰ পিছত এটা পোষ্ট কৰিম, কিন্তু তাত উপনীত হোৱাটো এক যাত্ৰা আছিল আৰু সংগীত আৰু পৰিয়ালৰ বাবে কি যে এটা আচৰিত দিন । মই আৰু তেওঁ গীতটিৰ সম্পূৰ্ণ পাঞ্জাবী সংস্কৰণ কৰিছো, যিটো অহা কেইসপ্তাহমানৰ ভিতৰত ওলাব, য’ত তেওঁৰ অংশ বহুত বেছি আছে । এই গীতটোৰ এলবাম সংস্কৰণ আৰু এলবামটোৰ মোৰ প্ৰিয় গীত । আশা কৰো আপোনালোকে ভাল পাব ।"

এড শ্বীৰাণে বহুবাৰ ভাৰত ভ্ৰমণ কৰি ভাৰতীয় মনোৰঞ্জন উদ্যোগৰ সৈতে এক শক্তিশালী সম্পৰ্ক গঢ়ি তুলিছে । চলিত বৰ্ষৰ আৰম্ভণিতে তেওঁ পুনে, হায়দৰাবাদ, চেন্নাই, বেংগালুৰু আৰু শ্বিলঙত প্ৰদৰ্শন কৰে ৷ তাৰ পাছত দিল্লী-এন চি আৰত নিজৰ অভিলেখ ভংগকাৰী x Tour লৈ আহিছিল ।

লগতে পঢ়ক : প্ৰিয় অভিনেতাক কাষৰ পৰা লগ পাবলৈ কিমান দূৰলৈ যাব আপুনি ?