কপিল শৰ্মা, ৰেমো ডি'চুজা, সুগন্ধা মিশ্ৰ, ৰাজপাল যাদৱক কোনে দিলে ভাবুকি ?

মুম্বাই : হঠাৎ অহা এটা ই-মেইলে হাহাকাৰ লগাইছে বলীউডৰ কেইবাগৰাকীও তাৰকাৰ মাজত । কৌতুক অভিনেতা কপিল শৰ্মা, অভিনেতা ৰাজপাল যাদৱ, কৰিঅ'গ্ৰাফাৰ ৰেম' ডিচুজা আৰু অভিনেত্ৰী তথা কৌতুক অভিনেত্ৰী সুগন্ধা মিশ্ৰই ই-মেইলযোগে মৃত্যুৰ ভাবুকি লাভ কৰিছে, যাৰ ফলত তেওঁলোকে সাম্প্ৰতিক সময়ত এনেধৰণৰ ভাবুকি লাভ কৰা শেহতীয়া চেলিব্ৰিটি হৈ পৰিছে ।

জনৈক বিষ্ণু স্বাক্ষৰিত এটা ই-মেইল লাভ কৰে আটাইকেইজন তাৰকাই । মেইলটোত লিখা আছিল, "আমি আপোনাৰ শেহতীয়া কাৰ্যকলাপবোৰ নিৰীক্ষণ কৰি আছোঁ আৰু আমি বিশ্বাস কৰোঁ যে আমি আপোনাৰ দৃষ্টি আকৰ্ষণ কৰাটো গুৰুত্বপূৰ্ণ । এয়া কোনো প্ৰচাৰ ষ্টান্ট বা আপোনাক হাৰাশাস্তি কৰাৰ প্ৰয়াস নহয়, আমি আপোনাক এই বাৰ্তাটো অতি গুৰুত্বসহকাৰে আৰু গোপনীয়তাৰে ব্যৱহাৰ কৰিবলৈ অনুৰোধ জনাইছো ।"

বিগত ১৪ ডিচেম্বৰত প্ৰেৰণ কৰা ই-মেইলখনক লৈ উদ্বেগ প্ৰকাশ কৰে আটাইকেইজন তাৰকাই আৰু এই সন্দৰ্ভত এক অভিযোগ দাখিল কৰে । উক্ত অভিযোগৰ ভিত্তিত তদন্ত কৰি আৰক্ষীয়ে দাবী কৰে যে এইটো পাকিস্তানৰ পৰা প্ৰেৰণ কৰা হৈছিল । য'ত চেলিব্ৰিটিসকলক ৮ ঘণ্টাৰ ভিতৰত উত্তৰ দিবলৈ বা পৰিণামৰ সন্মুখীন হ'বলৈ ভাবুকি প্ৰদান কৰা হৈছিল ।

অভিনেতা ৰাজপাল যাদৱৰ অভিযোগৰ ভিত্তিত মুম্বাইৰ আম্বোলি আৰক্ষী থানাত এটা গোচৰ ৰুজু কৰা হৈছিল । সুগন্ধা মিশ্ৰ, ৰেম' ডি'চুজাইও একেটা ভাবুকিপূৰ্ণ ই-মেইল পোৱাৰ পিছত অভিযোগ দাখিল কৰিছিল । আৰক্ষীয়ে এতিয়া ভাবুকি আৰু এই ই-মেইলৰ আঁৰৰ ব্যক্তিজনৰ সন্ধানত তদন্ত অব্যাহত ৰাখিছে ।

উল্লেখ্য যে, শেহতীয়াভাৱে মুম্বাই আৰক্ষীয়ে তাৰকাসকলৰ সুৰক্ষাৰ বাবে যথেষ্ট পদক্ষেপ গ্ৰহণ কৰিছে । কিয়নো চহৰখনৰ আইন-শৃংখলাজনিত পৰিস্থিতি, বিশেষকৈ ৰাজনীতিবিদ বাবা ছিদ্দিকৰ ওপৰত হোৱা মাৰাত্মক আক্ৰমণ, বলীউডৰ চুপাৰষ্টাৰ চলমান খানক ভাবুকি আৰু বলীউড অভিনেতা ছৈফ আলী খানৰ ওপৰত হোৱা ছুৰিকাঘাতৰ পিছত আৰক্ষী অধিক সষ্টম হৈ পৰিছে ।

বাবা ছিদ্দিকক যোৱাটো বৰ্ষৰ অক্টোবৰ মাহত মুম্বাইৰ বান্দ্ৰাত তেওঁৰ ঘৰৰ ওচৰতে গুলীয়াই হত্যা কৰা হৈছিল । যি হত্যাৰ দায়িত্ব স্বীকাৰ কৰিছিল কাৰাগাৰত থকা গেংষ্টাৰ লৰেন্স বিষ্ণোইৰ দলে । ইয়াৰ পিছতেই চুপাৰষ্টাৰ চলমান খানে তেওঁৰ নিৰাপত্তা বৃদ্ধি কৰাৰ লগতে বাৰান্দাত বুলেটপ্ৰুফ খিৰিকী স্থাপন কৰিছিল ।

ইফালে মাত্ৰ এটা সপ্তাহ পূৰ্বে, তাৰকা ছৈফ আলী খানক এটা দুস্কৃতিকাৰীয়ে আক্ৰমণ কৰিছিল । বিগত সপ্তাহৰ বৃহস্পতিবাৰে পুৱতি নিশা দুস্কৃতিকাৰীটো কোঠাৰ মাজেৰে তেওঁৰ বান্দ্ৰাৰ ঘৰত প্ৰৱেশ কৰিছিল । অভিনেতাজনক ছয়বাৰকৈ ছুৰীৰে আঘাত কৰিছিল । যাৰ ভিতৰত দুটা গুৰুতৰ বুলি কোৱা জানিব পৰা গৈছিল ।

আনহাতে উপস্থিত বুদ্ধি আৰু হাস্যৰসৰ বাবে জনাজাত কপিল শৰ্মা বহু বছৰ ধৰি ভাৰতীয় মনোৰঞ্জন জগতৰ জনপ্ৰিয় ব্যক্তি হিচাপে পৰিগণিত হৈ আহিছে । দ্য গ্ৰেট ইণ্ডিয়ান লাফটাৰ চেলেঞ্জ-৩ ত বিজয়ৰ পাছতে তেওঁ দৰ্শকৰ ব্যাপক সহাৰি লাভ কৰিছিল আৰু কমেডি চাৰ্কাছৰ দৰে হিট কমেডি শ্ব'ত অভিনয় কৰিছিল । অৱশ্যে 'কমেডি নাইটছ উইথ কপিল শৰ্মা' নামৰ শ্ব'টোৱে কপিল শৰ্মাক ভাৰতৰ অন্যতম বিশিষ্ট কৌতুক অভিনেতা হিচাপে এক পৰিচয় দিয়ে ।

দূৰদৰ্শন কেৰিয়াৰৰ উপৰিও শৰ্মাই 'কিছ কিচকৌ প্যাৰ কৰু', 'ফিৰংগী', 'জুইগেটো', আৰু 'ক্ৰু'ৰ দৰে চলচ্চিত্ৰৰ জৰিয়তে চলচ্চিত্ৰ উদ্যোগত প্ৰৱেশ কৰিছে । অতি শেহতীয়াকৈ, তেওঁ নেটফ্লিক্সত 'দ্য গ্ৰেট ইণ্ডিয়ান কপিল শ্ব' মুকলি কৰে, যিয়ে আমিৰ খান আৰু ৰণবীৰ কাপুৰকে ধৰি চেলিব্ৰিটিসকলৰ এক তাৰকাখচিত লাইনআপৰ জৰিয়তে দৰ্শকৰ মন জয় কৰিবলৈ সক্ষম হয় ।

আনহাতে ৰেমো ডি'চুজা এগৰাকী প্ৰখ্যাত নৃত্যশিল্পী, নৃত্য পৰিচালক, অভিনেতা আৰু চলচ্চিত্ৰ পৰিচালক । তেওঁ নৃত্যৰ ৰিয়েলিটি শ্ব' 'ডান্স ইণ্ডিয়া ডান্স'ত অংশগ্ৰহণ কৰি খ্যাতি অৰ্জন কৰিছিল আৰু পিছত অনুষ্ঠানটোৰ বিচাৰক হিচাপে অংশগ্ৰহণ কৰে । তেওঁ 'এফ.এ.এল.টি.ইউ.' (২০১১) চলচ্চিত্ৰৰ জৰিয়তে পৰিচালনাত আত্মপ্ৰকাশ কৰে আৰু 'এবিচিডি: এনি বডী কেন ডান্স' (২০১৩), 'এবিচিডি ২ (২০১৫), ফ্লাইং জেট (২০১৬), আৰু ষ্ট্ৰীট ডান্সাৰ ৩ডি (২০২০) কেধৰি কেইবাখনো চলচ্চিত্ৰ পৰিচালনা কৰে ।

ইফালে সুগন্ধা মিশ্ৰই 'দ্য কপিল শৰ্মা শ্ব' আৰু 'কমেডি নাইটছ উইথ কপিল'কে ধৰি বিভিন্ন কমেডি শ্ব'ত অংশগ্ৰহণ কৰি পেৰডী গান, কৌতুক আৰু অভিনয় দক্ষতাৰ বাবে জনপ্ৰিয় হৈ পৰে ।

বলীউডৰ অসংখ্য চলচ্চিত্ৰত তেওঁৰ বহুমুখী কৌতুক চৰিত্ৰৰ বাবে জনাজাত ৰাজপাল যাদৱক শেষবাৰৰ বাবে 'ভুল ভুলেইয়া-৩' ত দেখা গৈছিল । আনিস বাজমীৰ দ্বাৰা পৰিচালিত এই চলচ্চিত্ৰখনত কাৰ্তিক আৰিয়ান, বিদ্যা বালান, মাধুৰী দীক্ষিত আৰু তৃপ্তী ডিমৰিৰ সৈতে অভিনয় কৰিছে ।