শীঘ্ৰে এখন অসমীয়া ছবিত দেখিবলৈ পোৱা যাব বলীউডৰ দুগৰাকী জনপ্ৰিয় অভিনেতাক
আহিবলগীয়া নতুন অসমীয়া ছবি "Malamal Boyyyz" ত দেখিবলৈ পোৱা যাব বলীউডৰ দুগৰাকী জনপ্ৰিয় অভিনেতা দুৰ্গেশ কুমাৰ আৰু অশোক পাঠকক ।
By ETV Bharat Entertainment Team
Published : June 11, 2025 at 7:23 PM IST
গুৱাহাটী: হাই ৱে’ ছবিৰ জৰিয়তে বলীউডত খোপনি পুতিবলৈ সক্ষম হোৱা জনপ্ৰিয় অভিনেতা দুৰ্গেশ কুমাৰৰ লগতে আন এগৰাকী জনপ্ৰিয় অভিনেতা অশোক পাঠকক শীঘ্ৰে দেখিবলৈ পোৱা যাব এখন অসমীয়া ছবিত । ১১ জুলাইত মুক্তিলাভ কৰিবলগীয়া নতুন অসমীয়া ছবি "Malamal Boyyyz" ত অভিনয় কৰিছে দুয়োগৰাকী জনপ্রিয় অভিনেতাই । শেহতীয়াকৈ ছবিখনৰ নিৰ্মাতাগোষ্ঠীয়ে চৰিত্ৰসমূহক ৰাইজৰ মাজত চিনাকি কৰাই দিয়াৰ অৰ্থে এটা ভিডিঅ’ আপলোড কৰিছে ।
অভিনেতা দুৰ্গেশ কুমাৰ আৰু অশোক পাঠকে সমাজকৰ্মী আৰু গুণ্ডাৰ চৰিত্ৰত অভিনয় কৰিছে । এই বাতৰি সামাজিক মাধ্যমত বিয়পি পৰাৰ লগে লগে সাংস্কৃতিক মহলত ব্যাপক চৰ্চা লাভ কৰা দেখা গৈছে । আনহাতে ভিডিঅ’ বাৰ্তা মুকলি কৰাৰ পাছতে অনুৰাগীসকলৰ মাজতো উৎকণ্ঠা বৃদ্ধি হোৱা পৰিলক্ষিত হৈছে ।
কিছুদিন পূৰ্বে, এটা ভিডিঅ’ বাৰ্তা যোগে এই দুগৰাকী অভিনেতা দুৰ্গেশ কুমাৰ আৰু অশোক পাঠকে জনাইছিল শীঘ্ৰেই অসমলৈ অহাৰ খবৰ । কিন্তু কি কাৰণত অভিনেতা দুগৰাকী অসমলৈ আহিবলৈ ওলাইছিল সেয়া তেওঁলোকে মুকলিকৈ প্ৰকাশ কৰা নাছিল ।
উল্লেখ্য যে অনিমা লহকৰৰ প্ৰযোজনা তথা মাটংগী এণ্টাৰটেইনমেণ্টৰ বেনাৰত নিৰ্মিত এই ছবিখনৰ কাহিনী, চিত্ৰনাট্য আৰু পৰিচালনা মৃণাল ডেকাৰ । এদল যুৱকৰ ধনী হোৱাৰ হোৱাৰ পৰিকল্পনা । ধনী হোৱাৰ এই যাত্ৰাটোত তেওঁলোকে সন্মুখীন হোৱা বিভিন্ন পৰিস্থিতিক কেন্দ্ৰ কৰিয়েই নিৰ্মাণ কৰা হৈছে ছবিখন । মুখ্য চৰিত্ৰত অভিনয় কৰিছে বলীন বৰা, জিণ্টু কুমাৰ কাশ্যপ, নৱজ্যোতি নাথ, উজ্জ্বল ৰাজখোৱা আৰু জুনু নাথ ডেকাই ।
আনহাতে অন্যান্য চৰিত্ৰসমূহত থাকিব অসমী শৰ্মা, অতুল পাঁচনি, সিদ্ধাৰ্থ মুখাৰ্জী, অমূল্য কুমাৰ, দীপক ৰয়, নম্ৰতা দাস, প্ৰণামী ভাৰতী, ৰাজীৱ গোস্বামী, ৰাজু ৰয়, নৱ নাথ, অতনু মহন্ত, দ্বীপজ্যোতি আদিকে ধৰি বহুতো ন-পুৰণি অভিনেতা-অভিনেত্ৰী ।
আহিবলগীয়া ছবিখনৰ গীত তিনিটাৰ এটা গীতত আচুৰ্য বৰপাত্ৰ, এটা গীতত জয় বৰুৱা আৰু আনটো গীতত বহ্নিমানে কণ্ঠদান কৰিছে । সংগীত কৰিছে ত্ৰিনয়ন মহন্তই । ছবিখনৰ চিত্ৰনাট্য আৰু সংলাপ হৈছে মৃণাল ডেকা, জিণ্টু কাশ্যপ আৰু নিশিৰঞ্জন কে মল্লিকাৰ । ছবিখনৰ দৃশ্যগ্ৰহণ কৰিছে চন্দ্ৰ কুমাৰে । শব্দ-সংমিশ্ৰণ কিংশুক মৰাণৰ । সম্পাদনাত আছে হাৰ্দিক কাশ্যপ ৷
লগতে পঢ়ক : "জয় আই অসম" ধ্বনি দি অসমলৈ আহিবলৈ ওলাইছে বলীউডৰ জনপ্ৰিয় অভিনেতা দূৰ্গেশ কুমাৰ
