সংগীতপ্ৰেমীৰ মাজলৈ আহিল 'এটি এটি কথা'
গুৱাহাটীস্থিত অ’ডিটেক ষ্টুডিঅ’ত মুকলি কৰা হয় এটি গীতৰ দৃশ্য-শ্ৰব্য সংস্কৰণ । বিশিষ্ট শিল্পী শান্তা উজীৰে উন্মোচন কৰে গীতটি ।
Published : March 22, 2025 at 5:53 PM IST
হায়দৰাবাদ: মুক্তি পালে এটি নতুন গীত ৷ শুকুৰবাৰে গুৱাহাটীৰ অ’ডিটেক ষ্টুডিঅ’ত এটি নতুন নিভাঁজ আৰু মিঠা অসমীয়া দৃশ্য-শ্ৰব্য গীত 'এটি এটি কথা' মুকলি কৰা হয় । গহপুৰৰ প্ৰতিভাসম্পন্ন কণ্ঠশিল্পী সুৰভী সোণমনি হাজৰিকাৰ শ্ৰুতিমধুৰ কণ্ঠৰে ৰোমান্টিক গীতটি উন্মোচন কৰে বিশিষ্ট শিল্পী শান্তা উজীৰে ।
উন্মোচনী অনুষ্ঠানত উপস্থিত থাকে বিশিষ্ট সংগীতজ্ঞ মানস হাজৰিকা, জনপ্ৰিয় সংগীত পৰিচালক পলাশ গগৈ, সংগীতকাৰ দ্বীপ ৰাজবংশী, গায়ক চাজু আদিকে ধৰি সংগীত জগতৰ গণ্য-মান্য ব্যক্তিসকল ।
এগৰাকী নাৰীৰ সীমাহীন ভালপোৱাৰ এক অনুভূতি গীতটিত প্ৰকাশ কৰিব বিচৰা হৈছে আৰু এই অনুভূতিত পোৱা-নোপোৱাৰ সুখ-দুখৰ প্ৰতিফলন ঘটিছে । অপূৰ্ব কথা, সুৰ আৰু কণ্ঠৰ সংমিশ্ৰণে অনন্য মাত্ৰা প্ৰদান কৰা 'এটি এটি কথা' শীৰ্ষক দৃশ্য-শ্ৰব্য গীতটোত কণ্ঠশিল্পী সুৰভী সোণমনি হাজৰিকাই কণ্ঠদান কৰাৰ লগতে সুৰ আৰু ৰচনা কৰিছে । সাৱলীল শব্দৰে ভৰা গীতটিয়ে শিল্পী সুৰভী সোণমনি হাজৰিকাক তেওঁৰ গায়নশৈলীত পূৰ্ণতা প্ৰকাশ কৰাত সহায় কৰিছে ।
গীতটিৰ অনুভূতি আৰু প্ৰকাশক জনপ্ৰিয় সংগীত পৰিচালক পলাশ গগৈৰ সাৱলীল সংগীত পৰিচালনাই অধিক শ্ৰুতিমধুৰ কৰি তুলিছে । গীতিটিৰ ভিডিঅ’ পৰিচালনা আৰু সম্পাদনা কৰিছে অপুৰাজ গগৈয়ে । গীতটিত ভিডিঅ’ৰ ৰূপ দিছে চিনেমাটোগ্ৰাফাৰ অম্লান জ্যোতি ৰাজখোৱাই ।
গীতটিৰ সংমিশ্ৰণ কৰিছে মানস হাজৰিকা আৰু পিংকু দাসে । আবেদনময়ী আৰু নিভাঁজ দৃশ্য-শ্ৰাব্য গীতটিত অভিনয় কৰিছে দীপাংকৰ মহন্ত, জুনু নাথ, অনুষ্কা কাশ্যপ, আমাইৰা দিত্য আৰু সুৰভী সোণমনি হাজৰিকাই ।
এছ এছ প্ৰডাকচনৰ দ্বাৰা নিবেদিত 'এটি এটি কথা' গীতটি ইতিমধ্যে ইউটিউব চেনেলযোগে সংগীতপ্ৰেমীসকলৰ বাবে মুকলি কৰি দিয়া হৈছে ।
