বিশেষ ৭ টা দিনৰ অভিজ্ঞতাৰে নিৰ্মাণ কৰা এখন অৰুণাচলী চিনেমা ‘Alokanv’

গুৱাহাটী : অসমৰ পৰিচালকৰ পৰিচালনাৰে শীঘ্ৰে আহি আছে এখন অৰুণাচলী ছবি ‘Alokanv’ ৷ ছবিখনে ইতিমধ্যে কেইবাখনো চলচ্চিত্ৰ সমাৰোহত মনোনয়ন লাভ কৰি প্ৰশংসা বুটলিবলৈ সক্ষম হৈছে । ডিপি এণ্টাৰটেইনমেণ্ট আৰু ফায়াৰফ্লাই ফিল্মছৰ বেনাৰত ছবিখনৰ পৰিচালনা কৰিছে পৰমেশ ডেকাই ।

ছবিখনৰ সন্দৰ্ভত নিৰ্মাতাগোষ্ঠীয়ে জনোৱা অনুসৰি, "ছবিখনৰ কাহিনী মূলতঃ এগৰাকী যুৱ সাহিত্যিকৰ ওপৰত আধাৰ কৰি নিৰ্মাণ কৰা হৈছে । অৰ্ণৱ নামৰ এগৰাকী যুৱ সাহিত্যিকে অসমৰ পৰা অকণমান দূৰলৈ গৈ জীৱনৰ অভিজ্ঞতা ল'ব বিচাৰে । তাৰ বাবে তেখেত গৈ পায়গৈ অৰুণাচল প্ৰদেশত থকা তেখেতৰেই এগৰাকী বান্ধৱী ন্যুমচেনৰ ওচৰত । তেওঁৰ এই যাত্ৰা সাত দিনৰ বাবে চলে ৷ সাত দিনৰ এই বিশেষ যাত্ৰাত অৰ্ণৱে অৰুণাচলৰ প্ৰান্তে প্ৰান্তে সম্পৃক্ত হৈ থকা কৃষ্টি-সংস্কৃতি তথা অৰুণাচলৰ সেই বিশেষ অঞ্চলটোৰ লোকসকলৰ মাজত থকা বিশ্বাসৰ সৈতে জড়িত বিভিন্ন কাহিনীৰ অভিজ্ঞতা আহৰণ কৰে ।"

এখন অৰুণাচলী চিনেমা ‘Alokanv’ (Photo : ETV Bharat Assam)

লগতে নিৰ্মাতাই কয়, "কাহিনীভাগ তেনেদৰেই আগবাঢ়ে আৰু তাতেই সোমাই থাকে আন এটা ৰহস্যৰ গাঁথা । গাঁওখনত থকা ‘ইয়াপোম’ নামৰ এক গুপ্ত শক্তিৰ কথা জানিব পাৰে অৰ্ণৱে, যাক গালো জনগোষ্ঠীয়ে প্ৰকৃতিৰ ৰক্ষক আৰু আত্মাৰ বিভূতি হিচাপে বিশ্বাস কৰে । তেওঁলোকৰ বিশ্বাস অনুসৰি এই গুপ্ত শক্তিৰ আশীৰ্বাদত সৌভাগ্য উদয় হয়, আনহাতে যদি ইয়াৰ ৰোষত পৰে, তেতিয়া ভয়ংকৰ বিপৰ্যয় নামি আহে । অৰ্ণৱে প্ৰথমতে এই কাহিনীক কল্পনা হিচাপে নাকচ কৰে যদিও যিমান দিন যায় তেওঁ কিছু অদ্ভুত, অপৰিৱৰ্তনীয় ঘটনাৰ সাক্ষী হয় । গালো ভাষাত নিৰ্মিত এই ছবিখনত আপোনালোকে গালো ভাষী লোকসকল প্ৰকৃতিৰ সৈতে কিমান সক্ৰিয়ভাৱে জড়িত সেয়া স্বচক্ষে দেখিবলৈ পাব । আপোনালোকক আমি বৰ্তমানৰ বাবে ছবিখনৰ থূল মূল ব্যাখ্যাহে দিছো ।"

ছবিখনৰ কাহিনী তথা ৰচনা নীল বৰ্মন আৰু কিশলয় বুজৰবৰুৱাৰ । সহযোগী পৰিচালক হিচাপে আছে মনীষ বৰ্মন । সংগীত বলেন পাঠকৰ লগতে বেকগ্ৰাউণ্ড স্কৰ আয়ান জ্যোতি দাসৰ । ডি অ’ পিত আছে পাপু ডেকা । গালো গীতত সহযোগ কৰিছে ডেৱদি এংগ' আৰু ডবম ডজিয়ে । ছবিখনত অভিনয় কৰিছে ক্ৰমে অতনু মহন্তৰ লগতে বহু কেইগৰাকী গালো অভিনেতা-অভিনেত্ৰীয়ে । ছবিখনে ইতিমধ্যে কলকাতা আন্তঃৰাষ্ট্ৰীয় চলচ্চিত্ৰ মহোৎসৱ আৰু বেংগালুৰু আন্তঃৰাষ্ট্ৰীয় চলচ্চিত্ৰ সমাৰোহত মনোনয়ন লাভ কৰি প্ৰশংসা বুটলিবলৈ সক্ষম হৈছে ৷

লগতে পঢ়ক : জুবিন গাৰ্গৰ সৈতে এইবাৰ বিহুত গীত পৰিৱেশন নকৰে কণ্ঠশিল্পী শতাব্দী বৰাই