Lakh নে Lac লিখিলে আপোনাৰ চেকখন বাউন্স হ’ব, জানেনে ?

নতুন দিল্লী : বেংকিঙৰ ক্ষেত্ৰত সহজ আৰু সুবিধাজনক লেনদেনৰ বাবে চেক হয়তো সকলোৱে ব্যৱহাৰ কৰে ৷ কিন্তু চেক বুক লিখাৰ আগত কিছুমান ক্ষেত্ৰত অধিক মনোযোগ দিয়াৰ প্ৰয়োজন ৷ এটা সামান্য ভুল হ’লেও বেংকৰ লেনদেন কাৰ্য বাতিল হ’ব পাৰে ।

ATM আৰু অনলাইন বেংকিং ব্যৱহাৰ কৰাৰ পিছতো এতিয়াও বহুতে চেকবুক ব্যৱহাৰ কৰাটো বেছি পছন্দ কৰে । বিশেষকৈ মোটা অংকৰ ধন বা ডাঙৰ লেনদেনৰ ক্ষেত্ৰত অধিকাংশই চেক ব্যৱহাৰ কৰাটো বেছি প্ৰধান্য দিয়ে । কিন্তু চেক লিখাৰ সময়ত বিশেষকৈ সংখ্যাৰ বানানৰ ক্ষেত্ৰত সঠিক পদ্ধতি মানি চলাটো গুৰুত্বপূৰ্ণ ।

চেকত লাখ টকাৰ পৰিমাণ লিখি থাকোতে কেতিয়াবা বিভ্ৰান্তিৰ সৃষ্টি হয় । যেনে ১০,০০,০০০ টকা (১০ লাখ) লিখিব লগা হ’লে, সংখ্যাগত উপস্থাপন স্পষ্ট হ’লেও, ধনৰ পৰিমাণ শব্দৰে লিখাৰ সময়ত প্ৰায়ে সমস্যাৰ সৃষ্টি হয় । সততে চেক পাতত ইংৰাজীত টকাৰ পৰিমাণ লিখা হয় ৷ তেনে ক্ষেত্ৰত ‘Lakh’ ব্যৱহাৰ কৰিব লাগে নে ‘Lac’ এই ক্ষেত্ৰটো কিছু বিভ্ৰান্তি হোৱা দেখা যায় ৷

• এই সন্দৰ্ভত RBI-এ কি কয় ?

ভাৰতীয় ৰিজাৰ্ভ বেংক(RBI)ৰ মতে শুদ্ধ শব্দটো হ'ল ‘Lakh’ । RBI ৰ নিৰ্দেশনা তথা গাইডলাইনত স্পষ্টকৈ উল্লেখ আছে যে চেক লিখাৰ সময়ত ইংৰাজীত ‘Lakh’ শব্দটো ব্যৱহাৰ কৰিব লাগে । এই শব্দটো RBI ৰ ৱেবছাইটত পোৱা যায় । লগতে বেংকে জাৰি কৰা সকলো চৰকাৰী চেকত ‘Lakh’ শব্দটো ব্যৱহাৰ কৰা হয় ৷

ইফালে ‘Lac’ শব্দটো চৰকাৰী বেংকিং পৰিভাষাৰ ক্ষেত্ৰত ব্যৱহাৰ নহয় ৷ সেয়ে চেক লিখাৰ সময়ত ‘Lac’ ৰ সলনি ‘Lakh’ লিখিব লাগে ৷ এইবোৰৰ উপৰিও ‘Lac’ ৰ সলনি ‘Lakh’ শব্দটো ব্যৱহাৰ কৰিলে চেক বাতিল হোৱাৰ সম্ভাৱনা নাথাকে ৷

দৈনন্দিন ভাষাত লাখৰ ঘৰত থকা সংখ্যাক পৰিমাণ বুজাবলৈ ‘Lakh’ শব্দটো ব্যৱহাৰ কৰা হয় ৷ বেংকিঙৰ ক্ষেত্ৰত ‘Lakh’ হৈছে শুদ্ধ শব্দ । গতিকে কোনো ধৰণৰ সম্ভাৱ্য সমস্যাৰ পৰা হাত সাৰিবলৈ চেক ব্যৱহাৰ কৰা সময়ত ‘Lakh’ লিখাটো বাঞ্ছনীয় ।