নতুন দিল্লী : যদি আপোনাৰ আধাৰৰ আপডেট কৰিবলগীয়া আছে, তেন্তে ১৪ জুনৰ ভিতৰত কৰি লওক । ভাৰতীয় একক পৰিচয় প্ৰাধিকৰণে (UIDAI) নাগৰিকসকলক তেওঁলোকৰ আধাৰৰ তথ্য অনলাইনত বিনামূলীয়াকৈ আপডেট কৰিবলৈ অনুমতি দিছে । কিন্তু বিনামূলীয়া আপডেটৰ অন্তিম তাৰিখ ২০২৫ চনৰ ১৪ জুনলৈকেহে নিৰ্ধাৰণ কৰা হৈছে ।
যোৱা বছৰ প্ৰথমবাৰৰ বাবে প্ৰৱৰ্তন কৰা এই পদক্ষেপে ৫০ টকীয়া আপডেট মাচুল বিলুপ্ত কৰে আৰু নামভৰ্তি কেন্দ্ৰলৈ যোৱাৰ সমস্যাৰ পৰাও আপোনাক পৰিত্ৰাণ দিয়ে ।
আধাৰ কিয় আপডেট কৰিব লাগে ?
UIDAI ৰ আধাৰ নামভৰ্তি আৰু আপডেট নিয়মাৱলী, ২০১৬ অনুসৰি প্ৰতিজন আধাৰধাৰীয়ে নিজৰ পৰিচয় প্ৰমাণ (PoI) আৰু ঠিকনাৰ প্ৰমাণ (PoA) প্ৰতি ১০ বছৰৰ মূৰে মূৰে এবাৰ আপডেট কৰিব লাগিব । আপোনাৰ তথ্য আপডেট কৰি ৰখাটোৱে চৰকাৰী সুবিধাৰ বাবে আবেদন কৰাৰ সময়ত, বেংক একাউণ্ট খোলাৰ সময়ত বা কে ৱাই চি প্ৰক্ৰিয়া সম্পূৰ্ণ কৰাৰ সময়ত সমস্যাৰ পৰা হাত সাৰিবলৈ সহায় কৰে ।
অনলাইনত কি কি আপডেট কৰিব পাৰি ?
- নাম
- জন্ম তাৰিখ (নিৰ্দিষ্ট সীমাৰ অধীনত)
- ঠিকনা
- লিংগ
- ভাষা
কিন্তু বায়’মেট্ৰিক আপডেট - যেনে আঙুলিৰ ছাপ, চকুৰ স্কেন বা ফটোৰ আপডেট - আধাৰ নামভৰ্তি কেন্দ্ৰত ব্যক্তিগতভাৱে কৰিব লাগিব ।
অনলাইনত আধাৰ কেনেকৈ আপডেট কৰিব ?
- প্ৰথমে uidai ৱেবছাইট- https://myadhaar.uidai.gov.in যাওঁক
- আপোনাৰ আধাৰ নম্বৰ আৰু অ'টিপি দি লগ ইন কৰক
- ওপৰৰ সোঁফালে দস্তাবেজসমূহ আপডেটত ক্লিক কৰক
- বৈধ পৰিচয় প্ৰমাণ আৰু ঠিকনাৰ প্ৰমাণ আপল'ড কৰক (JPEG/PNG/PDF, সৰ্বাধিক 2MB)
- পৰীক্ষা কৰি জমা দিয়ক
- আপুনি স্থিতি অনুসৰণ কৰিবলৈ এটা সেৱা অনুৰোধ নম্বৰ (SRN) পাব
