আপোনাৰ আধাৰ কাৰ্ডৰ ফটো কিদৰে সলনি কৰিব ? অনলাইন আপডেট সম্ভৱ নেকি ? জানক সবিশেষ - AADHAAR CARD PHOTO UPDATE

নিউজ ডেস্ক, 9 ছেপ্টেম্বৰ : বৰ্তমান সময়ত আধাৰ কাৰ্ড আমাৰ সকলোৰে বাবে এক প্ৰয়োজনীয় নথি ৷ যিকোনো বিশেষ চৰকাৰী বা বেচৰকাৰী সা-সুবিধা লাভ কৰাৰ ক্ষেত্ৰত আধাৰ কাৰ্ডৰ থকাটো খুবেই জৰুৰী ৷ স্বাভাৱিকতেই আধাৰ কাৰ্ডৰ তথ্য সঠিক আৰু শুদ্ধ হোৱাটোও সমানেই গুৰুত্বপূৰ্ণ ৷ কিন্তু আধাৰ কাৰ্ডত যদি কিবা ভুল তথ্য সন্নিবিষ্ট হৈ থাকে, তেনেহ’লে তাক শুদ্ধ কৰাৰ প্ৰক্ৰিয়া সম্পৰ্কে আমাৰ বহুতৰে স্পষ্ট ধাৰণা নথকাৰ বাবে আমি বিপাঙত পৰিবলগীয়া হয় ৷

• UIDAI এ কি কি সুবিধা আগবঢ়ায় ?

ভাৰতীয় একক পৰিচয় প্ৰাধিকৰণ বা Unique Identification Authority of India (UIDAI) এ আপোনাৰ আধাৰ কাৰ্ডত থকা নিৰ্দিষ্ট বিৱৰণ যেনে আপোনাৰ নাম, জন্ম তাৰিখ, ফোন নম্বৰ আৰু ঠিকনা আপডেট কৰাৰ বিকল্প আগবঢ়ায় । এই সুবিধা অনুসৰি আপুনি আপোনাৰ জনগাঁথনিগত তথ্য যেনে যোগাযোগ নম্বৰ আৰু ঠিকনাৰ লগতে বায়োমেট্ৰিক ডাটাৰ বিৱৰণ- য'ত আপোনাৰ আইৰিছ (চকুৰ মণিবলয়) স্কেন, আঙুলিৰ ছাপ আৰু মুখমণ্ডলৰ ফটোগ্ৰাফ অন্তৰ্ভুক্ত থাকে, সংশোধন কৰিব পাৰে ।

• আপুনি আপোনাৰ আধাৰ ফটো অনলাইনযোগে সলনি কৰিব পাৰিবনে ?

বৰ্তমান সময়ত, অনলাইনৰ জৰিয়তে আপুনি আপোনাৰ আধাৰ ফটো আপডেট কৰিব নোৱাৰে । অন্যান্য বিৱৰণৰ পৰিৱৰ্তনৰ বাবে অনলাইন সুবিধা উপলব্ধ থাকিলেও, আপোনাৰ ফটো আপডেট কৰাৰ বাবে আপুনি আধাৰ সেৱা কেন্দ্ৰ (ASK) বা পঞ্জীয়ন কেন্দ্ৰ (Enrollment Centre) লৈ যাব লাগিব । আপোনাৰ আধাৰ কাৰ্ডৰ ফটো সলনি কৰিবলৈ আপুনি এই কেন্দ্ৰবোৰৰ যিকোনো এটালৈ ব্যক্তিগতভাৱে যোৱাৰ পিছত কিছুমান নিৰ্দিষ্ট প্ৰক্ৰিয়া অনুসৰণ কৰিব লাগিব ৷

লগতে পঢ়ক : আজিৰে পৰা সলনি হ'ল এইবোৰ নিয়ম... - NEW RULES FROM 1st SEPTEMBER

• আপোনাৰ আধাৰ কাৰ্ডৰ ফটো সলনি কৰাৰ বাবে প্ৰয়োজনীয় পদক্ষেপসমূহ :-

1. আধাৰ পঞ্জীয়ন কেন্দ্ৰলৈ যাওক : আপোনাৰ নিকটতম আধাৰ সেৱা কেন্দ্ৰলৈ যাওক ।
2. এপইণ্টমেণ্ট বুক কৰক : যোৱাৰ আগতে অনলাইন বা অফলাইনযোগে আপোনাৰ এপইণ্টমেণ্ট বুক কৰক ।
3. প্ৰপত্ৰখন পূৰণ কৰক : ফটো আপডেটৰ বাবে প্ৰয়োজনীয় প্ৰপত্ৰখন সম্পূৰ্ণ কৰক।
4. প্ৰপত্ৰখন দাখিল কৰক : প্ৰপত্ৰখন কেন্দ্ৰৰ আধাৰ বিষয়াক অৰ্পণ কৰক ।
5. ফটো আৰু বায়োমেট্ৰিক প্ৰমাণীকৰণ : বিষয়াই আপোনাৰ বায়োমেট্ৰিক বিৱৰণ পৰীক্ষা কৰিব আৰু আপোনাৰ নতুন ফটো তুলিব ।
6. কোনো অতিৰিক্ত নথি-পত্ৰৰ প্ৰয়োজন নাই : আপোনাৰ ফটো সলনি কৰাৰ বাবে আপুনি কোনো অতিৰিক্ত নথি-পত্ৰ দাখিল কৰাৰ প্ৰয়োজন নাই ।
7. 100 টকা পৰিশোধ কৰক : আপুনি ফটো আপডেটৰ বাবে প্ৰযোজ্য 100 টকাৰ মাচুল পৰিশোধ কৰিব লাগিব ।
8. স্বীকৃতি স্লিপ লাভ কৰক : আপুনি আবেদন দাখিলৰ প্ৰমাণ হিচাপে এটা স্লিপ (Acknowledgment Slip) লাভ কৰিব ।
9. ফটো আপডেট সময়সীমা : নতুন ফটোখন 90 দিনৰ ভিতৰত আপডেট কৰা হ'ব, যাৰ পিছত আপুনি আপডেটেড পিভিচি বা ডিজিটেল আধাৰ কাৰ্ড ডাউনলোড কৰিব পাৰে ।

• আধাৰ কাৰ্ডৰ প্ৰয়োজনীয়তা

বিভিন্ন ক্ষেত্ৰত আধাৰ কাৰ্ডে এক গুৰুত্বপূৰ্ণ ভূমিকা পালন কৰে ৷ চৰকাৰী আৰু বেচৰকাৰী সেৱা, ৰাজসাহায্য, পেন্সন, জলপানি, সামাজিক লাভালাভ, বেংকিং, বীমা, কৰ, শিক্ষা, নিযুক্তি, আৰু স্বাস্থ্যসেৱা এই আটাইবোৰ ক্ষেত্ৰত যি কোনো সুবিধা বা লাভালাভৰ বাবে আধাৰ কাৰ্ড থকাটো খুবেই জৰুৰী ।