নতুন দিল্লী : উচ্চতম ন্যায়ালয়ে শুকুৰবাৰে বিনায়ক দামোদৰ সাভাৰকাৰৰ বিৰুদ্ধে কৰা বিতৰ্কিত মন্তব্য সন্দৰ্ভত কংগ্ৰেছ নেতা ৰাহুল গান্ধীক চমন জাৰি কৰাৰ বিচাৰ আদালতৰ নিৰ্দেশ স্থগিত ৰাখে । অৱশ্যে বিৰোধী দলপতিক স্বাধীনতা সংগ্ৰামীৰ বিৰুদ্ধে অপমানজনক মন্তব্য কৰাৰ পৰা বিৰত থাকিবলৈ সতৰ্ক কৰিও দিয়ে উচ্চতম ন্যায়ালয়ে । ভৱিষ্যতে এনে মন্তব্য কৰিলে পৰিণামৰ সন্মুখীন হ'ব লাগিব বুলিও ৰাহুল গান্ধীক ভৰ্ৎসনা কৰে ।
ন্যায়াধীশ দীপাংকৰ দত্ত আৰু মনমোহনক লৈ গঠিত এখন বিচাৰপীঠে গোচৰটোত শুনানি গ্ৰহণ কৰে । আৰম্ভণিতে ন্যায়াধীশ দত্তই সাভাৰকাৰৰ বিৰুদ্ধে গান্ধীৰ বিতৰ্কিত মন্তব্যৰ ওপৰত আপত্তি জনাইছিল আৰু প্ৰশ্ন কৰিছিল সুধিছিল যে ভাইচৰয়লৈ লিখা পত্ৰত "আপোনাৰ বিশ্বাসী সেৱক" শব্দটো ব্যৱহাৰ কৰাৰ বাবে মহাত্মা গান্ধীক কেৱল ব্ৰিটিছৰ সেৱক বুলি ক'ব পাৰিনে ? জ্যেষ্ঠ অধিবক্তা এ এম চিংভিয়ে বিচাৰপীঠৰ সন্মুখত গান্ধীক প্ৰতিনিধিত্ব কৰে । বিচাৰপীঠে কয় যে গান্ধী মহাৰাষ্ট্ৰত থাকোতে এই বিবৃতি দিছিল । বিচাৰপীঠে কয়, "তেওঁক তাত পূজা কৰা হয়, এনে নকৰিব ।"
ন্যায়াধীশ দত্তই কয়, "তেওঁক স্বাধীনতা সংগ্ৰামীসকলৰ সন্দৰ্ভত দায়িত্বহীন মন্তব্য কৰিব নিদিব । আপুনি স্বাধীনতা সংগ্ৰামীসকলৰ সৈতে এনে ব্যৱহাৰ কৰে নেকি ?" ন্যায়াধীশ দত্তই গান্ধীৰ অধিবক্তাক প্ৰশ্ন কৰে, "আপোনাৰ মক্কেলে জানে নে যে মহাত্মা গান্ধীয়েও ভাইচৰয়ক সম্বোধন কৰাৰ সময়ত 'আপোনাৰ বিশ্বাসী সেৱক' শব্দ ব্যৱহাৰ কৰিছিল ? আপোনাৰ মক্কেলে জানেনে যে তেওঁৰ আইতাকে যেতিয়া তেওঁ প্ৰধানমন্ত্ৰী আছিল, ভদ্ৰলোকজনৰ (সাভাৰকাৰ) প্ৰশংসা কৰি এখন পত্ৰ প্ৰেৰণ কৰিছিল ।"
শীৰ্ষ ন্যায়ালয়ে গোচৰটো স্থগিত ৰখাৰ সিদ্ধান্ত লয় কিন্তু এই চৰ্তত যে তেওঁ ভৱিষ্যতে এনে ধৰণৰ কোনো বিবৃতি নিদিয়ে । বিচাৰপীঠে কয়, "কিন্তু আমি আপোনাক সকীয়াই দিছো । স্পষ্ট কৰি দিওঁ যে আগলৈ এই ধৰণৰ যিকোনো বিবৃতিত আমি নিজাববীয়া গোচৰ লম আৰু অনুমোদনৰ কোনো প্ৰশ্নই নকৰো !" বিচাৰপীঠে লগতে কয় যে স্বাধীনতা সংগ্ৰামীসকলে এই দেশক স্বাধীনতা দিছে ।
উল্লেখ্য যে সাভাৰকাৰৰ বিৰুদ্ধে মানহানিকৰ মন্তব্য সম্পৰ্কীয় এক গোচৰত ৰাহুল গান্ধীৰ বিৰুদ্ধে চমন বাতিল কৰিবলৈ অস্বীকাৰ কৰিছিল এলাহাবাদ উচ্চ ন্যায়ালয়ে । সেই আদেশক প্ৰত্যাহ্বান জনাই ৰাহুল গান্ধীয়ে উচ্চতম ন্যায়ালয়ত আবেদন দাখিল কৰিছিল । অৱশেষত সেই আবেদনত শীৰ্ষ ন্যায়ালয়ে ৰাহুল গান্ধীক সকাহ দিয়ে যদিও তেওঁ সেই মন্তব্যৰ বাবে কঠোৰ ভাষাৰে গৰিহণাও দিয়ে ।
লগতে পঢ়ক :দৈত্য-দানৱে শুকুলা বৰফ ৰঙা কৰিলেও কাৰোবাৰ ধমনীৰে এতিয়াও বৈ আছে মানৱতাৰ তেজ - PAHALGAM ATTACK
