সাপ-ময়ূৰৰ দুৰ্বাদল যুঁজ, তাকো ১০০ ফুট গভীৰ কুঁৱাত; তাৰ পিছত কি হ'ল ?
এটা শুকান কুঁৱাত এটা ময়ূৰ আৰু সাপৰ মাজৰ যুদ্ধৰ এটা ভিডিঅ' শেহতীয়াভাৱে পোহৰলৈ আহিছে । ভিডিঅ'টোত দুয়োৱে দুয়োকে আক্ৰমণ কৰি থকা দেখা গৈছে ।
Published : April 5, 2025 at 6:42 PM IST
বাড়মেৰ : ৰাজস্থানৰ বাড়মেৰ জিলাৰ পৰা এটা শিহৰণকাৰী ভিডিঅ' পোহৰলৈ আহিছে । ভিডিঅ'টোত ১০০ ফুট গভীৰ এটা শুকান কুঁৱাত আমাৰ দেশৰ ৰাষ্ট্ৰীয় পক্ষী এটা ময়ূৰ আৰু এডাল সাপৰ মাজত ব্যতিক্ৰমী যুঁজ দেখা গৈছে । অৱশ্যে ঘটনাটো কিছু দিন আগৰ যদিও ভিডিঅ'টো এতিয়াহে প্ৰকাশ পাইছে ।
ভিডিঅ'টোত সাপ-ময়ূৰে পৰস্পৰে যুঁজ দি থকা দেখা গৈছে । ইটোৱে সিটোৰ ওপৰত আক্ৰমণ কৰাৰ লগতে নিজকে সুৰক্ষিত কৰাৰো চেষ্টা কৰিছে ।
অঞ্চলটোৰ কোব্ৰামেন নামেৰে পৰিচিত মুকেশ মালীয়ে কয়, "প্ৰায় ৮-৯ দিন পূৰ্বে গেহুঁৰ গাঁৱত এটা শুকান কুঁৱাত এডাল সাপ আবদ্ধ হৈ থকাৰ খবৰ পাওঁ । ময়ূৰটো সম্ভৱত পানী খোৱাৰ বাবে কুঁৱাটোলৈ নামি গৈছিল আৰু সাপডাল পূৰ্বৰে পৰা তাত আছিল । কিন্তু কুঁৱাটোৰ গভীৰতা বেছি হোৱাৰ বাবে ময়ূৰটো বা সাপডাল বাহিৰলৈ ওলাই আহিব পৰা নাছিল । তেনে পৰিস্থিতিত দুয়োৰে জীৱনলৈ সংকট নামি আহিছিল ।"
ইয়াৰ পিছত মুকেশে দুয়োকে উদ্ধাৰ অভিযানত নামি পৰে । মুকেশে কয় যে তেওঁ প্ৰথমে সাপডাল উদ্ধাৰ কৰে আৰু পিছত ময়ূৰটোক কুঁৱাৰ পৰা বাহিৰ কৰি সুৰক্ষিত স্থানত এৰি দিয়া হয় ।
তেওঁ আৰু কয় যে গাঁওবাসীৰ সহায়ত যেতিয়া তেওঁ উদ্ধাৰ অভিযানৰ বাবে কুঁৱাটোত নামিছিল, তেতিয়া তাত ময়ূৰ আৰু সাপৰ মাজত দুৰ্বাদল যুঁজ চলি আছিল । দুয়োৱে পৰস্পৰে যুঁজি আছিল আৰু লগে লগে নিজকে ৰক্ষা কৰাৰো চেষ্টা কৰি আছিল । ই এক অতি দুৰ্লভ দৃশ্য আছিল আৰু এই দৃশ্যাংশ তেওঁ কেমেৰাত বন্দী কৰিছে ।
উল্লেখ্য যে, গাঁওখনৰ এটা শুকান কুঁৱাত এটা ময়ূৰ আৰু এডাল সাপ আবদ্ধ হৈ থকাৰ কথা গাঁওবাসীয়ে গম পায় । ইয়াৰ পিছত তেওঁলোকে মুকেশক এই বিষয়ে অৱগত কৰে । পৰৱৰ্তী সময়ত গাঁওবাসীৰ সহায়ত মুকেশে ১০০ ফুট গভীৰ শুকান কুঁৱাটোত নামি প্ৰথমে সাপডাল আৰু পিছত ময়ূৰটোক সুৰক্ষিতভাৱে তাৰ পৰা বাহিৰ উলিয়াই আনে । এই সাহসিকতাৰ বাবে গাঁওবাসীয়ে মুকেশক প্ৰশংসা কৰে ।
