হাৰ মানিব নোখোজা ত্ৰিপুৰাৰ মাধুৰীমা
চিকিৎসক হোৱাৰ সপোন মনত লৈ ত্ৰিপুৰাৰ মাধুৰীমাৰ যুঁজ সকলোৰে বাবে অনুপ্ৰেৰণাৰ উৎস । বিশেষকৈ এন ই ই টি প্ৰাৰ্থীৰ বাবে...!
Published : December 28, 2024 at 7:21 PM IST
আগৰতলা : শাৰীৰিক বাধাইও সেও মানিলে ২০ বছৰীয়া মাধুৰীমা দত্তৰ সংকল্পৰ আগত । কৰ্কট ৰোগৰ তৃতীয় পৰ্যায়ৰ পৰা ওলাই আহিও এন ই ই টি পৰীক্ষাত উজলিছে উদয়পুৰৰ মাধুৰীমখা দত্ত । এন ই ই টি পৰীক্ষাত ৰাষ্ট্ৰীয় পৰ্যায়ত ২,৭৯,০৬৬ সংখ্যক আৰু ৰাজ্যিক পৰ্যায়ত ২৯৫ সংখ্যক স্থান লাভ কৰিবলৈ সক্ষম হ'ল দুৰাৰোগ্য ৰোগত ভুগি থকা মাধুৰীমাই । শিক্ষাৰ্থীগৰাকীৰ এনে প্ৰত্যাহ্বানপূৰ্ণ জীৱন এতিয়া সকলোৰে বাবে প্ৰেৰণাৰ উৎস হৈ পৰিছে । শিক্ষাৰ্থীগৰাকীৰ আত্মবিশ্বাস, ধৈৰ্য্য আৰু সংকল্পক এতিয়া সকলোৱে প্ৰশংসা কৰিছিল ।
প্ৰত্যাহ্বানক জয় কৰিলে মাধুৰীমাই
মাধুৰীমাৰ প্ৰত্যাহ্বানপূৰ্ণ যাত্ৰা আৰম্ভ হৈছিল ২০১৬ চনত । তেতিয়া তেওঁৰ বয়স আছিল মাত্ৰ ১২ বছৰ । ব্ৰিলিয়াণ্ট ষ্টাৰ স্কুলৰ ষষ্ঠ শ্ৰেণীৰ ছাত্ৰী আছিল মাধুৰীমা । সেই সময়ত তেওঁ নন-হজকিন্স লিম্ফোমা নামৰ দুৰাৰোগ্য ৰোগত আক্ৰান্ত হৈছিল ।
তেওঁৰ চিকিৎসা আৰু দুৰাৰোগ্য ৰোগৰ বিৰুদ্ধে যুঁজ ইমান সহজ নাছিল । প্ৰতিটো মুহূৰ্ততে তেওঁক পৰিয়ালৰ লোকসকলে সমৰ্থন আৰু সাহস দিছিল । প্ৰত্যাহ্বানপূৰ্ণ সময়ৰ কথা মনত পেলাই মাধুৰীমাৰ মাতৃ ৰত্না দত্তই ই টিভি ভাৰতক কয়, "এইটো এক অস্থিৰ সময় আছিল । আমি চিকিৎসাৰ বাবে মুম্বাইলৈ গৈছিলো আৰু তাত ৫ বছৰ আছিলো । প্ৰথমতে, আমি তেওঁৰ স্বাস্থ্যৰ অৱস্থা সম্পূৰ্ণৰূপে বুজি পোৱা নাছিলো । মোৰ ডাঙৰ ছোৱালী ঋতুৰীমাই পঢ়া-শুনা অব্যাহত ৰাখিছিল আৰু পিতৃৰ সৈতে ত্ৰিপুৰাতে আছিল, আনহাতে মই মাধুৰীমাৰ সৈতে মুম্বাইত আছিলো । প্ৰথমতে মোৰ ভাতৃ আমাৰ সৈতে গৈছিল, কিন্তু অৱশেষত মই অকলেই ইয়াৰ সন্মুখীন হ'ব লগা হৈছিল ।"
কৰ্কট ৰোগী মাধুৰীমাৰ জটিল চিকিৎসা
মাতৃয়ে লগতে কয়, "মাধুৰীমাই কেম'থেৰাপী, ৰেডিয়েশ্যন আৰু ব'ন মেৰু সংৰোপণকে ধৰি একাধিক পৰ্যায়ৰ চিকিৎসা সম্পন্ন কৰিছিল । তেওঁ জ্যেষ্ঠ ভগ্নী ঋতুৰীমাই ব'ন মেৰু দান কৰিছিল । এই প্ৰচেষ্টাৰ স্বত্বেও কৰ্কট ৰোগৰ পৰা তেওঁ উপশম পোৱা নাছিল । যাৰ বাবে উদ্ভাৱনী চিকিৎসাৰ প্ৰয়োজন হৈছিল । টাটা মেম'ৰিয়েল হাস্পতাল আৰু জছলোক হাস্পতালৰ চিকিৎসকসকলে এক গুৰুত্বপূৰ্ণ আমেৰিকান ঔষধ প্ৰদান কৰিছিল-ভাৰতত এগৰাকী শিশুৰ বাবে এয়া ধৰণৰ প্ৰথম আছিল ।"
মাতৃয়ে লগতে কয়, "আৰ্থিক বোজাও বহুত বেছি আছিল, কিন্তু চিকিৎসক আৰু চিকিৎসালয়বোৰে প্ৰতিটো পদক্ষেপতে আমাক সমৰ্থন কৰিছিল ।" এনে পৰিস্থিতিত মাধুৰীমাই চিকিৎসক হোৱাৰ সপোন এৰি দিয়া নাছিল । মাতৃয়ে কয়, "তেওঁৰ বিদ্যালয় ব্ৰিলিয়াণ্ট ষ্টাৰ স্কুলে শৈক্ষিক আকাংক্ষাবোৰ জীয়াই ৰখাত এক গুৰুত্বপূৰ্ণ ভূমিকা পালন কৰিছিল । মাধুৰীমাই অনলাইন ক্লাছৰ জৰিয়তে এনইইটি প্ৰস্তুতিত সমৰ্থনৰ বাবে এলন কেৰিয়াৰ ইনষ্টিটিউটকো কৃতিত্ব দিছিল ।
মাধুৰীমাই তেওঁৰ এই যুঁজ সন্দৰ্ভত কয়, "এন ই ই টি নিজেই যিকোনো শিক্ষাৰ্থীৰ বাবে এক প্ৰত্যাহ্বান, কিন্তু মোৰ বাবে এয়া দুগুণ কঠিন আছিল । বহু বছৰৰ চিকিৎসাৰ ফলত মোৰ শৰীৰ দুৰ্বল আছিল আৰু প্ৰস্তুতিৰ সময়ত মই বাৰে বাৰে হোৱা সংক্ৰমণ, কাহ, চৰ্দি আৰু অন্যান্য স্বাস্থ্যজনিত সমস্যাৰ সৈতে মোকাবিলা কৰিব লগা হৈছিল ।"
এন ই ই টি প্ৰাৰ্থীসকললৈ তেওঁৰ আহ্বান ,"মানসিক চাপক আপোনাক অতিক্ৰম কৰিবলৈ নিদিব । শান্ত হৈ থাকক আৰু আপোনাৰ ওচৰত যি আছে তাৰ সৈতে আপোনাৰ সৰ্বশ্ৰেষ্ঠ প্ৰচেষ্টাত মনোনিৱেশ কৰক । এন ই ই টি হৈছে জ্ঞানৰ দৰেই ধৈৰ্য আৰু অধ্যৱসায়ৰ পৰীক্ষা ।"
