ত্ৰিপুৰাৰ ৯৯% তকৈ অধিক গাঁৱত বেংকিঙৰ সুবিধা আছে : ড৹ মাণিক সাহা

আগৰতলা : বিত্তীয় অন্তৰ্ভুক্তিৰ বাবে এক ডাঙৰ মাইলৰ খুঁটি হিচাবে পৰিণত ত্ৰিপুৰা ৷ ত্ৰিপুৰাৰ মুখ্যমন্ত্ৰী অধ্যাপক ড৹ মাণিক সাহাই ঘোষণা কৰে যে ৰাজ্যৰ ৯৯% তকৈও অধিক গাঁৱত এতিয়া পাঁচ কিলোমিটাৰ ব্যাসাৰ্ধৰ ভিতৰত বেংকিঙৰ সুবিধা আছে ।

কেন্দ্ৰীয় গৃহমন্ত্ৰী অমিত শ্বাহ, কেন্দ্ৰীয় ড’নেৰ (DoNER) মন্ত্ৰী জ্যোতিৰাদিত্য সিন্ধিয়া, কেন্দ্ৰীয় ৰাজ্যিক মন্ত্ৰী ড৹ সুকান্ত মজুমদাৰ আৰু অৰুণাচল প্ৰদেশৰ মুখ্যমন্ত্ৰী পেমা খাণ্ডুৰ উপস্থিতিত নৰ্থ ইষ্ট বেংকাৰ কনক্লেভত (North East Bankers Conclave) ভাষণ দি মুখ্যমন্ত্ৰী সাহাই এই তথ্য সদৰী কৰে ৷

ড৹ সাহাই পিএম-জন ধন যোজনাৰ (PM-Jan Dhan Yojana) সফলতাৰ ওপৰতো আলোকপাত কৰে ৷ য’ত ১০.৮৩ লাখৰো অধিক বেংক একাউণ্ট মুকলি কৰা হৈছে, ৬১৭ কোটি টকাৰ জমা ধন জমা হৈছে । প্ৰতিটো একাউণ্টত গড় জমা ধন ৫,৭০২ টকা, যিটোৱে ৰাষ্ট্ৰীয় গড় ৪,৩৫৭ টকা অতিক্ৰম কৰিছে বুলি তেওঁ কয় ৷

তেওঁ লগতে দাবী কৰি কয় যে ৰাজ্য চৰকাৰে পি এম সুৰক্ষা বীমা যোজনা, পি এম জীৱন জ্যোতি বীমা যোজনা, অটল যোজনা, মুদ্ৰা যোজনা আৰু সুকন্যা সমৃদ্ধি আঁচনিৰ দৰে ফ্লেগশ্বিপ আঁচনিৰ সহায় লৈ ১০০% আৰ্থিক অন্তৰ্ভুক্তি লাভৰ বাবে প্ৰতিশ্ৰুতিবদ্ধ হৈ আছে ।

ড৹ সাহাই কয় যে বিত্তীয় অন্তৰ্ভুক্তিৰ বাবে ৰাষ্ট্ৰীয় কৌশলৰ অধীনত ত্ৰিপুৰাৰ প্ৰতিখন গাঁৱত বেংকিং টাচপইণ্ট বা আউটলেট সজ্জিত কৰা হৈছে । ‘‘এতিয়া সকলো জিলা আৰু ব্লকতে ATM ৰ সুবিধা সজ্জিত কৰা হৈছে । তদুপৰি ত্ৰিপুৰাৰ ৰাজ্যিক পৰ্যায়ৰ বেংকিং সমিতিয়ে ২০২১-২২ বিত্তীয় বৰ্ষৰ পৰা অটল পেঞ্চন যোজনাৰ বাবে সন্মানীয় উৎকৃষ্টতাৰ বঁটা লাভ কৰিছে ।" মুখ্যমন্ত্ৰী সাহাই কয় ৷

ড৹ সাহাই বিত্তীয় সাক্ষৰতা কেন্দ্ৰ আৰু বেংকিং প্ৰৱেশ সম্প্ৰসাৰণৰ বাবে কাম কৰা ২৮০০ ব্যৱসায়িক সংবাদদাতাৰ অৱদানকো স্বীকাৰ কৰে । এই প্ৰচেষ্টাসমূহৰ ফলত কৃষি আৰু MSME ঋণৰ ক্ষেত্ৰত উল্লেখযোগ্য বৃদ্ধি পাইছে বুলিও কয় ।

তেওঁ লগতে কয়, ‘‘ৰাজ্যখনৰ নিবনুৱা যুৱক-যুৱতীসকলক মুদ্ৰা ঋণ প্ৰদান উদ্যোগীকৰণ আৰু আৰ্থিক স্বাধীনতাক প্ৰসাৰিত কৰাৰ দিশতো আমি পদক্ষেপ গ্ৰহণ কৰিছো । আমাৰ লক্ষ্য ২০৪৭ৰ পদক্ষেপৰ অংশ হিচাপে আমি ক্ৰেডিট-ডিপ’জিট (Credit-Deposit চমুকৈ CD) অনুপাত ৮০% লৈ বৃদ্ধি কৰাৰ লক্ষ্য ৰাখিছো, যাৰ ফলত ৰাজ্যখনৰ অৰ্থনৈতিক বিকাশ আৰু অধিক ত্বৰান্বিত হ’ব ।”

উল্লেখ্য যে, ইয়াৰ পূৰ্বে মুখ্যমন্ত্ৰী ড৹ সাহাই উত্তৰ-পূব পৰিষদৰ ৭২ সংখ্যক পূৰ্ণাংগ অধিৱেশন আৰু উত্তৰ-পূব মহাকাশ প্ৰয়োগ কেন্দ্ৰ সমিতিৰ বৈঠকতো অংশগ্ৰহণ কৰে । কেন্দ্ৰীয় গৃহমন্ত্ৰী অমিত শ্বাহ, DoNER ৰ কেন্দ্ৰীয় মন্ত্ৰী জ্যোতিৰাদিত্য সিন্ধিয়া, কেন্দ্ৰীয় মন্ত্ৰী ড৹ সুকান্ত মজুমদাৰৰ সভাপতিত্বত অনুষ্ঠিত হোৱা অধিৱেশনত উত্তৰ-পূবৰ ৰাজ্যসমূহৰ মুখ্যমন্ত্ৰী আৰু ৰাজ্যপালসকলো উপস্থিত থাকে ।