তেজপুৰ : অসংখ্য গুণমুগ্ধই অশ্ৰুসিক্ত নয়নেৰে শেষ বিদায় জনায় শ্বহীদ তাগে হাইলিয়াঙক । পহলগামত সংঘটিত সন্ত্ৰাসবাদী আক্ৰমণত নিহত হৈছিল তাগে হাইলিয়াং । শ্বহীদ তাগে হাইলিয়াঙক শেষবাৰৰ বাবে শ্ৰদ্ধাঞ্জলি জনায় জিলা উপায়ুক্ত, আৰক্ষী অধীক্ষকৰ লগতে গাঁৱৰ জ্যেষ্ঠ নাগৰিকসকলেও ।
শুকুৰবাৰে ভাৰতীয় বায়ুসেনাত কৰ্মৰত অৰুণাচল প্ৰদেশৰ তাগে হাইলিয়াঙৰ নশ্বদেহ নিজ গৃহৰ পৰা শেষকৃত্য কৰা স্থানলৈ সামৰিক বাহিনীৰ লোকে স-সন্মানৰে মাৰ্চপাচ কৰি লৈ যোৱা হয় । লগতে বায়ুসেনা বাহিনীয়ে টোপ চালামিৰে কৰ্পোৰেল তাগে হাইলিয়াঙক শ্ৰদ্ধাঞ্জলি জ্ঞাপন কৰি সেনাৰ সন্মানৰে তাগেৰ পত্নীৰ হাতত ৰাষ্ট্ৰীয় পতাকা আৰু তেওঁ বায়ুসেনাৰ টুপী ঘূৰাই দিয়া হয় ।
তথ্য অনুসৰি, শ্বহীদ তাগেৰ নৰশ্বৰ দেহ বৃহস্পতিবাৰে তেজপুৰ বায়ুসেনা বাহিনীৰ পৰা নামনি সোৱণশিৰিৰ জিৰ'ৰ সমীপৰ তাজিং গাঁৱলৈ নিয়া হয় । তাতে অৰুণাচল প্ৰদেশৰ মুখ্যমন্ত্ৰীগৰাকী উপস্থিত হৈ তাগেক শেষ শ্ৰদ্ধাঞ্জলি জ্ঞাপন কৰে ।
বৃহস্পতিবাৰে অৰুণাচল প্ৰদেশৰ নামনি সোৱণশিৰীৰ তাজং গাঁৱত তাগেৰ নৰশ্বৰ দেহ উপস্থিতি হোৱাৰ পিছতে এদিন ঘৰতে ৰাখি ধৰ্মীয় ৰীতি-নীতিৰে শুকুৰবাৰে শেষকৃত্য সম্পন্ন কৰা হয় শ্বহীদগৰাকীৰ ।
উল্লেখ্য যে, মঙলবাৰে (২২ এপ্ৰিল) পহলগামত পত্নীৰ সন্মুখত সন্ত্ৰাসবাদীয়ে গুলীয়াই হত্যা কৰিছিল শ্বহীদ তাগে হাইলিয়াঙক । গুলীওৱাৰ পূৰ্বে সন্ত্ৰাসবাদীয়ে শ্বহীদগৰাকীক সুধিছিল তেওঁৰ ধৰ্মৰ বিষয়ে ।
অন্য পৰ্যটকৰ দৰে মিনি ছুইজাৰলেণ্ড খ্যাত পলগামৰ সৌন্দৰ্য পাণ কৰিবলৈ পত্নীৰ সৈতে গৈছিল ভাৰতীয় বায়ুসেনা বাহিনীৰ এগৰাকী কৰ্পোৰেল বিষয়া হিচাবে কৰ্মৰত তাগে হাইলয়ঙে । সেয়াই আছিল পত্নীৰ সৈতে সময় অতিবাহিত কৰা শ্বহীদ হাইলয়ঙৰ শেষ সময়খিনি ।
