পুৰী: পুৰীৰ ৰথ যাত্ৰাৰ কথা আমি সকলোৱে জানো । প্ৰতিবছৰে এই ৰথ যাত্ৰাৰ সময়ত পৱিত্ৰ জগন্নাথ মন্দিৰৰ ভূমি লোকাৰণ্যত পৰিণত হয় । কিন্তু এই জগন্নাথ ৰথ যাত্ৰাৰ উপৰি পুৰীত আন এক বিখ্যাত যাত্ৰা অনুষ্ঠিত হয় । এই অনুষ্ঠানতো লাখ লাখ ভক্তৰ সমাগম ঘটে ।
ই হৈছে পুৰীৰ বিখ্যাত স্নান যাত্ৰা । ইয়াক দেৱস্নান পূৰ্ণিমা বুলিও কোৱা হয় । হিন্দু পঞ্জিকাৰ অন্যতম শ্ৰেষ্ঠ আৰু পৱিত্ৰ উৎসৱ হৈছে এই স্নান যাত্ৰা । সাধাৰণতে জুন বা জুলাই মাহত পৰা হিন্দুসকলৰ বাবে পৱিত্ৰ জেঠ মাহৰ পূৰ্ণিমা তিথিত উদযাপন কৰা এই অনুষ্ঠানত ভগৱান জগন্নাথ, তেওঁৰ ভাতৃ বলোভদ্ৰ আৰু ভগ্নী সুভদ্ৰাৰ পৱিত্ৰ স্নান অনুষ্ঠানৰ লগতে ঐশ্বৰিক সুদৰ্শন চক্ৰও পালন কৰা হয় । ইয়াক ভগৱান জগন্নাথৰ জন্মদিন বুলিও গণ্য কৰা হয় ।
বুধবাৰে ওড়িশাৰ মুখ্যমন্ত্ৰী মোহন চৰণ মাঝিকে ধৰি লাখ লাখ ভক্তই দ্বাদশ শতিকাৰ মন্দিৰটোৰ চৌহদত মুকলি মঞ্চত অনুষ্ঠিত আনুষ্ঠানিক স্নান অনুষ্ঠানৰ সাক্ষী হ’বলৈ সমবেত হয় ।
এই ত্ৰিমূৰ্তিৰ মূৰ্তিকেইটা গৰ্ভগৃহৰ পৰা উলিয়াই আনি ঐশ্বৰিক স্নানৰ বাবে বিশেষভাৱে সজোৱা মঞ্চ স্নান মণ্ডপত ৰখা হয় । ইয়াত ওড়িশাৰ পুৰীৰ জগন্নাথ ধাম চৌহদৰ ভিতৰত অৱস্থিত স্বৰ্ণ কুঁৱাৰ পৰা ১০৮ টা পাত্ৰত অনা পবিত্ৰ জলেৰে আনুষ্ঠানিকভাৱে স্নান কৰোৱা হয় ।
তাৰ পিছতে পুৰীৰ পৰম্পৰাগত ৰজা গজপতি মহাৰাজ দিব্যসিংহ দেৱে আবেলি ৩.৩০ মান বজাত ‘স্নান মণ্ডপ’ৰ আনুষ্ঠানিক চাফাই কৰিব ।
"আজি পৱিত্ৰ দেৱস্নান পূৰ্ণিমা উপলক্ষে চতুৰ্ধামূৰ্তিৰ দৰ্শন কৰি সংন্নুবেদিৰ পৰা ৰাজ্য আৰু ইয়াৰ জনসাধাৰণৰ কল্যাণ আৰু এখন উন্নত ওড়িশা গঢ়াৰ বাবে আশীৰ্বাদ বিচাৰিলোঁ । প্ৰভুৰ কৃপাত সকলোৰে জীৱন সুখী আৰু সমৃদ্ধিশালী হওক । স্নান পূৰ্ণিমা ২০২৫ ।" মুখ্যমন্ত্ৰীয়ে মাঝিয়ে X পোষ্টত লিখিছে ।
স্নানৰ পিছত দেৱতাসকলক হাতীৰ সাজ-পোছাক (হাতি বেছা) পৰিধান কৰোৱা হয়, যিটো হৈছে তেওঁলোকৰ ঐশ্বৰিক আৰু মহিমাময় ৰূপৰ প্ৰতীক । এই মহান অনুষ্ঠানৰ সাক্ষী হ’বলৈ সমবেত হোৱা লাখ লাখ ভক্তৰ বাবে এয়া এক বিৰল আৰু মনোমোহা দৃশ্য । কিয়নো অনা হিন্দু আৰু মন্দিৰ চৌহদৰ বাহিৰত থকাসকলেও দেৱতাসকলৰ দৰ্শন পোৱাৰ ই এক অন্যতম বিৰল অনুষ্ঠান । আনহাতে, ভক্তিত নিমগ্ন হৈ পৱিত্ৰ ত্ৰিমূৰ্তিৰ ঐশ্বৰিক স্নান অনুষ্ঠানৰ সাক্ষী হ’বলৈ তীৰ্থ চহৰখনত ভক্তই ভিৰ কৰে ।
"শ্ৰী সুদৰ্শনক প্ৰথমে মন্দিৰৰ পৰা উলিয়াই আনি পুৱা ৫.৪৫ বজাত স্নান বেদীলৈ লৈ যোৱা হয় । ইয়াৰ পিছত ভগৱান বলোভদ্ৰ, দেৱী সুভদ্ৰা আৰু ভগৱান জগন্নাথৰ মূৰ্তিক স্নান বেদীলৈ লৈ যোৱা হয় ।" পুৱা ৮.৫৫ বজাৰ ভিতৰত ‘পাহাণ্ডী অনুষ্ঠান’ সম্পূর্ণ হোৱা বুলিও তেওঁ কয় ৷
পুৰীৰ সাংসদ সম্বিত পাত্ৰৰ সৈতে মুখ্যমন্ত্ৰী মাঝিয়ে ‘উত্তৰ দ্বাৰ’ৰ (উত্তৰ গে'ট) মাজেৰে মন্দিৰত প্ৰৱেশ কৰি পুৱাৰ প্ৰাৰ্থনা আৰু দেৱতাসকলৰ আনুষ্ঠানিক শোভাযাত্ৰা প্ৰত্যক্ষ কৰে বুলি আন এজন বিষয়াই জানিবলৈ দিয়ে ।
সন্ধিয়া ৭.৩০ বজাৰ পৰা ‘সাহান মেলা’ বা ৰাজহুৱা দৰ্শনৰ অনুমতি দিয়া হ’ব বুলি মন্দিৰৰ কেলেণ্ডাৰত উল্লেখ কৰা হৈছে । স্নানৰ পিছত অসুস্থ হৈ পৰাৰ এক পৰম্পৰাগত নীতি পালনৰ বাবে ত্ৰিমূৰ্তিক দ্বাদশ শতিকাৰ এই মন্দিৰটোলৈ লৈ যোৱা হ’ব আৰু ১৪ দিন তাত ‘অনাসৰা ঘৰ’ত (আইছ’লেচন ৰুম) থাকিব ।
আনহাতে, ‘বৈদ্য’ মন্দিৰত (কবিৰাজ) তেওঁলোকৰ চিকিৎসা বনৌষধিৰে কৰা হ’ব আৰু ২৭ জুনত বাৰ্ষিক ৰথ যাত্ৰাৰ এদিন পূৰ্বে ২৬ জুনত ‘নৱযৌৱন দৰ্শন’লৈকে দেৱতাসকলৰ ৰাজহুৱা ‘দৰ্শন’ বন্ধ থাকিব ।
