২৭ খন অবৈধ বিদ্যালয় বন্ধ; শৈক্ষিক বৰ্ষৰ ক্ষতিৰ আশংকা অভিভাৱকৰ

থানে: ছীল কৰা হৈছে ২৭ খন অবৈধ বিদ্যালয় ৷ পৌৰ নিগমৰ শিক্ষা বিভাগে নতুন শিক্ষাবৰ্ষ আৰম্ভ হোৱাৰ পিছতো গ্ৰহণ কৰিছে এই সিদ্ধান্ত ৷ এই পদক্ষেপে সন্তানৰ শিক্ষাবৰ্ষত হ’ব পৰা ক্ষতিৰ বাবে অভিভাৱকসকলৰ মাজত উদ্বেগ সৃষ্টি কৰিছে ।

অৱশ্যে পৌৰসভাৰ বিষয়াসকলে নিশ্চিত কৰিছে যে এই ছীল কৰা শিক্ষানুষ্ঠানসমূহৰ ছাত্ৰ-ছাত্ৰীসকলক তেওঁলোকৰ শিক্ষাৰ ধাৰাবাহিকতা অক্ষুণ্ণ ৰাখিবলৈ সমীপৰ বিদ্যালয়সমূহত অধ্যয়ন কৰাৰ সুবিধা প্ৰদান কৰা হ’ব ।

পৌৰ নিগমৰ উপ-আয়ুক্ত শচীন সংগলে ছাত্ৰ-ছাত্ৰীসকলক আশ্বাস দি এনেদৰে কয়, ‘‘এই পৰিৱৰ্তনৰ সময়ত যদি কোনো ধৰণৰ সমস্যাৰ সন্মুখীন হয়, তেন্তে শিক্ষা বিভাগৰ সৈতে যোগাযোগ কৰি যিকোনো সহায়ৰ বাবে যোগাযোগ কৰিব পাৰে ।’’

পৌৰ আয়ুক্ত সৌৰভ ৰাওে পূৰ্বতে দিয়া নিৰ্দেশনাৰ পিছতে এই ব্যৱস্থা গ্ৰহণ কৰা হৈছে ৷ পৌৰ আয়ুক্তগৰাকীয়ে পূৰ্বে অঞ্চলটোত চলি থকা ৮১ খন স্বীকৃতিবিহীন বিদ্যালয়ৰ বিৰুদ্ধে কঠোৰ ব্যৱস্থা গ্ৰহণৰ নিৰ্দেশ দিছিল ।

অভিভাৱকসকলে অভিযোগ কৰে যে এই প্ৰতিষ্ঠানসমূহে অবৈধভাৱে কাম কৰি শিক্ষাৰ নামত ছাত্ৰ-ছাত্ৰীক শোষণ কৰি আহিছে । জিলা অভিভাৱক সন্থাৰ সভাপতি শ্বীতল চাভানে কয়, ‘‘আমি বছৰ বছৰ ধৰি অভিযোগ কৰি আহিছো, কিন্তু কোনো ব্যৱস্থা গ্ৰহণ কৰা হোৱা নাই । শৈক্ষিক বৰ্ষ আৰম্ভ হোৱাৰ পিছতহে বিষয়াসকলে সাৰ পায় ।’’

চাভানে লগতে অভিযোগ কৰে যে শিক্ষা বিভাগে প্ৰতি বছৰে অবৈধ বিদ্যালয়ৰ তালিকা প্ৰকাশ কৰে যদিও কোনো ফলপ্ৰসু ব্যৱস্থা গ্ৰহণ নকৰে । ৰাজনৈতিক চাপ আৰু দুৰ্নীতিৰ ফলত এনে বহু প্ৰতিষ্ঠান নিয়ন্ত্ৰণহীনভাৱে চলি থাকিবলৈ সক্ষম হৈছে বুলিও অভিযোগ কৰে চাভানে ।

এই দমন কাৰ্যৰ ভিতৰত আছে শাস্তি, সম্পত্তি ছীল কৰা আৰু উলংঘাকাৰীৰ বিৰুদ্ধে অপৰাধমূলক গোচৰ পঞ্জীয়ন । আন এজন অভিভাৱক উত্তম সাৱন্তই দাবী কৰে যে ‘‘প্ৰশাসনৰ সংখ্যা বিভ্ৰান্তিকৰ । মাত্ৰ চাৰি-পাঁচখন বিদ্যালয় স্বেচ্ছাই বন্ধ হৈ যায় । বেছিভাগেই এতিয়াও অবৈধভাৱে চলি আছে । আমাৰ হাতত প্ৰমাণ আছে ।’’

শিক্ষাবৰ্ষৰ মাজভাগত বিদ্যালয়সমূহ হঠাতে ছীল কৰাটোৱে সন্তানৰ শৈক্ষিক যাত্ৰাত প্ৰভাৱ পেলোৱা বুলি অভিভাৱকসকলে দাবী কৰে আৰু ভৱিষ্যতে এনে কাৰ্য নকৰিবলৈ আহ্বান জনায় ৷

পিছে এই ঘটনা অসমত নহয়, বৰং মুম্বাইৰ থানে পৌৰ নিগমৰ অন্তৰ্গত বিদ্যালয়সমূহৰ ক্ষেত্ৰতহে সংঘটিত হৈছে ৷

লগতে পঢ়ক: কেৱল মনোৰঞ্জনৰে নহয়, শিক্ষামূলক ভ্ৰমণৰ ক্ষেত্ৰতো মন পছন্দৰ স্থান ৰামোজী ফিল্ম চিটি