নতুন দিল্লী : MBBS শিক্ষাৰ্থীসকলৰ ওপৰত ৰাজ্য চৰকাৰসমূহে চৰ্ত আৰোপ কৰা সন্দৰ্ভত অসন্তুষ্টি প্ৰকাশ উচ্চতম ন্যায়ালয়ৰ । বুধবাৰে ৰাজ্য চৰকাৰে চিকিৎসা পাঠ্যক্ৰম সম্পূৰ্ণ কৰাৰ পিছত প্ৰান্তীয় অঞ্চলত সেৱা আগবঢ়োৱাৰ বাবে সৰ্বভাৰতীয় কোটাৰ MBBS শিক্ষাৰ্থীসকলৰ ওপৰত এক চৰ্ত আৰোপ কৰাৰ বাবে এই অসন্তুষ্টি প্ৰকাশ কৰে ।
বিষয়টো ন্যায়াধীশ সূৰ্যকান্ত আৰু এন কোটিশ্বৰ সিঙক লৈ গঠিত এখন বিচাৰপীঠৰ সন্মুখত উত্থাপন হয় । বিচাৰপীঠখনে গড়ৱালৰ এখন মহাবিদ্যালয়ৰ পৰা ২০১১ বেটছৰ শিক্ষাৰ্থীসকলে দাখিল কৰা কেইবাখনো আবেদনৰ এটা শুনানি গ্ৰহণ কৰে । তেওঁলোকে উচ্চ ন্যায়ালয়ৰ এই আদেশক সমালোচনা কৰে য'ত চুক্তি কাৰ্যকৰী নকৰা বাবে তেওঁলোকক ১৮ শতাংশ সুতৰ সৈতে উচ্চ মাচুল পৰিশোধ কৰিবলৈ কোৱা হৈছে ।
শীৰ্ষ ন্যায়ালয়ে সুতৰ হাৰ ন শতাংশলৈ হ্ৰাস কৰাৰ সিদ্ধান্ত লয় আৰু তেওঁলোকক চাৰি সপ্তাহৰ সময় দিয়ে । শীৰ্ষ ন্যায়ালয়ে কয় যে চিকিৎসকসকলে ২০১১ চনত যেতিয়া নামভৰ্তিৰ প্ৰপত্ৰ পূৰণ কৰিছিল, তেতিয়া ২০০৯ চনৰ ৰাজ্য চৰকাৰৰ নীতিৰ বিষয়ে অৱগত আছিল ।
শুনানিৰ সময়ত বিচাৰপীঠে কয় যে সৰ্বভাৰতীয় কোটাত যোগ্যতা অৰ্জন কৰা শিক্ষাৰ্থীসকল ৰাজ্যিক কোটাৰ অধীনত ভৰ্তি হোৱা শিক্ষাৰ্থীসকলৰ তুলনাত অধিক মেধাৱী । "এই প্ৰতিভাশালী আৰু মেধাৱী লোকসকলক কেনেকৈ বন্ধকী শ্ৰমিকৰ দৰে ব্যৱহাৰ কৰিব পাৰি ?" বিচাৰপীঠে প্ৰশ্ন কৰে ।
বিচাৰপীঠে উত্তৰাখণ্ড উচ্চ ন্যায়ালয়ে ৰাজ্যখনৰ ২০০৯ চনৰ নীতি বজাই ৰখাৰ পটভূমিত এই মন্তব্য কৰে । এই আঁচনিখনে ৰাজ্যখনত চিকিৎসা মহাবিদ্যালয়সমূহত অধ্যয়ন কৰি থকা সৰ্বভাৰতীয় কোটা শিক্ষাৰ্থীসকলক এখন চুক্তি স্বাক্ষৰ কৰিবলৈ আৰু ৰাজসাহায্যযুক্ত মাচুলৰ বিনিময়ত পাঁচ বছৰৰ বাবে 'দুৰ্গম' আৰু ‘‘অত্যন্ত দুৰ্গম’’ এলেকাবোৰত সেৱা আগবঢ়াবলৈ নিৰ্দেশ দিছিল ।
উত্তৰাখণ্ড চৰকাৰে কয় যে এইটো এটা স্বেচ্ছামূলক চুক্তি, যাৰ ভিত্তিত চুক্তি কাৰ্যকৰী কৰাসকলক ৰাজসাহায্যযুক্ত মাচুলৰ ওপৰত পাঠ্যক্ৰম সম্পূৰ্ণ কৰিবলৈ অনুমতি দিয়া হৈছিল । ৰাজ্যিক অধিবক্তাই বিচাৰপীঠক জনায় যে যিসকল শিক্ষাৰ্থীয়ে পাঁচ বছৰৰ বাবে ৰাজ্যখনৰ দূৰৱৰ্তী অঞ্চলসমূহত সেৱা আগবঢ়োৱাৰ বাবে চুক্তি কাৰ্যকৰী কৰিছে, তেওঁলোকে ৰাজ্য চৰকাৰক ৩০ লাখ টকা পৰিশোধ কৰি প্ৰতিশ্ৰুতিৰ পৰা ৰেহাই পাব পাৰে ।
বিচাৰপীঠে কয়, "ৰাজ্যসমূহে সৰ্বভাৰতীয় কোটাত শিক্ষাৰ্থীসকলৰ ওপৰত চৰ্ত আৰোপ কৰিব নোৱাৰে আৰু গ্ৰামাঞ্চলত সেৱা আগবঢ়োৱাৰ বাবে চুক্তি কাৰ্যকৰী নকৰাৰ বাবে লাখ লাখ টকাৰ জৰিমনা আৰোপ কৰিব নোৱাৰে । লগতে তেওঁলোকক বন্ধকী শ্ৰমিকৰ দৰে ব্যৱহাৰ কৰিব নোৱাৰে...।"
কেন্দ্ৰৰ অধিবক্তাই কয় যে দূৰৱৰ্তী অঞ্চলত চিকিৎসকৰ উপলব্ধতা নিশ্চিত কৰিবলৈ বহুতো ৰাজ্যই এনে কৰি আহিছে, অন্যথা কোনেও তাত কাম কৰিব নিবিচাৰে ।
এই সন্দৰ্ভত বিচাৰপীঠে প্ৰশ্ন কৰে, "এগৰাকী শিক্ষাৰ্থীয়ে কেনেকৈ এখন ৰাজ্যত সেৱা আগবঢ়াব পাৰে, বিশেষকৈ দূৰৱৰ্তী এলেকাত, যিখন ঠাইৰ তেওঁ নহয়ে ?" উদাহৰণ স্বৰূপে, ন্যায়াধীশ সূৰ্য কান্তে কয়, "ধৰি লওক তামিলনাডুৰ এগৰাকী মেধাৱী শিক্ষাৰ্থীয়ে উত্তৰাখণ্ডৰ এখন মহাবিদ্যালয়ত সৰ্বভাৰতীয় কোটাৰ অধীনত নামভৰ্তি কৰে । তেওঁ দুৰ্গম অঞ্চল আৰু অত্যন্ত দুৰ্গম এলেকাত কেনেকৈ সেৱা আগবঢ়াব ? এইটো আচৰিত কথা ।"
"উত্তৰাখণ্ডৰ এটা দূৰৱৰ্তী এলেকাৰ এজন ৰোগীয়ে তেওঁ ভোগ কৰি থকা কষ্টৰ কথা তামিলনাডুৰ চিকিৎসকক ভালদৰে বুজাই ক'ব নোৱাৰিব পাৰে । আনহাতে, চিকিৎসকেও তেওঁৰ সকলো ভাল উদ্দেশ্য থকা সত্ত্বেও ৰোগীৰ উচিত চিকিৎসা কৰিব নোৱাৰিবও পাৰে ।" বিচাৰপীঠে মন্তব্য কৰে ।
