মধ্যপ্ৰদেশ উচ্চ ন্যায়ালয়ত বিজয় শ্বাহৰ বিৰুদ্ধে উচ্চতম ন্যায়ালয়ৰ কাৰ্যবিধি বন্ধ

নতুন দিল্লী : ভাৰতীয় সেনা বিষয়া কৰ্ণেল ছফিয়া কুৰেশ্বীৰ বিৰুদ্ধে কৰা মন্তব্যৰ সন্দৰ্ভত ৰাজ্যমন্ত্ৰী বিজয় শ্বাহৰ বিৰুদ্ধে মধ্যপ্ৰদেশ উচ্চ ন্যায়ালয়ত চলি থকা কাৰ্যবিধি বন্ধ কৰি দিয়ে উচ্চতম ন্যায়ালয়ে । অপাৰেশ্যন সেন্দূৰ সন্দৰ্ভত সংবাদ মাধ্যমৰ ব্রিফিঙৰ সময়ত বিষয়াগৰাকীয়ে আন এগৰাকী মহিলা বিষয়া উইং কমাণ্ডাৰ ব্যোমিকা সিঙৰ সৈতে দেশজুৰি খ্যাতি অৰ্জন কৰে ।

ন্যায়াধীশ সূৰ্যকান্ত আৰু এন কোটিশ্বৰ সিঙৰে গঠিত বিচাৰপীঠৰ সন্মুখত এই বিষয়টো উত্থাপন হয় । ছলিচিটৰ জেনেৰেল তুষাৰ মেহতাই শীৰ্ষ ন্যায়ালয়ক অৱগত কৰে যে মন্ত্ৰীগৰাকীৰ বিৰুদ্ধে উচ্চ ন্যায়ালয়ৰ সন্মুখত সমান্তৰাল কাৰ্যবিধি চলি আছে। বিচাৰপীঠে কয় যে যিহেতু এতিয়া তেওঁলোকৰ জ্ঞানৰ সন্মুখত আছে, সেয়েহে উচ্চ ন্যায়ালয়ৰ সন্মুখত চলি থকা কাৰ্যবিধি বন্ধ হৈ আছে ।

বিচাৰপীঠখনে কয় যে ১৯ মে’ত গৃহীত হোৱা অন্তৱৰ্তীকালীন নিৰ্দেশনা, য’ত শ্বাহক গ্ৰেপ্তাৰ কৰাত স্থগিতাদেশ দিয়া হৈছে, সেই নিৰ্দেশনা বৰ্ধিত হৈ আছে । উচ্চ ন্যায়ালয়ৰ পূৰ্বৰ নিৰ্দেশ মানি মধ্যপ্ৰদেশ চৰকাৰে গঠন কৰা বিশেষ তদন্তকাৰী দল (এছ আই টি)ৰ পৰা বিচাৰপীঠে ষ্টেটাছ ৰিপৰ্ট বিচাৰিছিল । বিচাৰপীঠে উল্লেখ কৰে যে এছ আই টিয়ে কিছুমান সা-সৰঞ্জাম জব্দ কৰি তদন্ত আৰম্ভ কৰিছে ।

বিচাৰপীঠে বিষয়টোক ৰাজনীতিকৰণ কৰিব নিবিচাৰে বুলি উল্লেখ কৰি এই বিষয়ত কোনো ধৰণৰ হস্তক্ষেপৰ অনুমতি দিবলৈ অস্বীকাৰ কৰে । বিচাৰপীঠে জুলাই মাহৰ দ্বিতীয় সপ্তাহত অধিক শুনানিৰ বাবে দিন ধাৰ্য কৰিছে । ১৯ মে’ত উচ্চতম ন্যায়ালয়ে মন্ত্ৰীগৰাকীৰ মন্তব্যৰ বাবে ওলোটাই ধৰি তেওঁৰ বিৰুদ্ধে দাখিল কৰা এফ আই আৰৰ তদন্তৰ বাবে তিনিজনীয়া এছ আই টি গঠন কৰিছিল । তীব্ৰ গৰিহণাৰ পিছত শ্বাহে দুখ প্ৰকাশ কৰি কয় যে তেওঁ কৰ্ণেল কুৰেশ্বিক নিজৰ ভগ্নীতকৈ বেছি সন্মান কৰে ।

কৰ্ণেল কুৰেশ্বীৰ বিৰুদ্ধে আপত্তিজনক মন্তব্য কৰা বুলি অভিযোগ উত্থাপন কৰা ভিডিঅ’ ব্যাপকভাৱে প্ৰচাৰিত হোৱাৰ পিছতে মধ্যপ্ৰদেশৰ মন্ত্ৰীগৰাকীয়ে তীব্ৰ সমালোচনাৰ সন্মুখীন হৈছিল ।

লগতে পঢ়ক : মন্ত্ৰী বিজয় শ্বাহৰ মন্তব্য ‘‘লেতেৰা, ঘৃণনীয় আৰু লজ্জাজনক’’ : উচ্চতম ন্যায়ালয়