আধাতে চৌদি ভ্ৰমণ সামৰি দেশলৈ উভতিল প্ৰধানমন্ত্ৰী, বিমানবন্দৰতে বহিল জৰুৰী বৈঠকত

নতুন দিল্লী : চৌদি আৰৱ ভ্ৰমণৰ সামৰণি মাৰি বুধবাৰে নতুন দিল্লীত উপস্থিত হয় প্ৰধানমন্ত্ৰী নৰেন্দ্ৰ মোদী । চৌদিৰ ৰাজকুমাৰ মহম্মদ বিন ছলমানৰ আমন্ত্ৰণত চৌদি আৰৱলৈ দুদিনীয়া ভ্ৰমণসূচীৰে গৈছিল প্ৰধানমন্ত্ৰী মোদী । অৱশ্যে জম্মু-কাশ্মীৰৰ পহলগামত সংঘটিত সন্ত্ৰাসবাদী আক্ৰমণৰ পিছত তেওঁ ভ্ৰমণৰ সময় কৰ্তন কৰে ।

চৰকাৰী সূত্ৰৰ পৰা জানিব পৰা মতে, এই আক্ৰমণৰ ঘটনাৰ বিষয়ে অৱগত হোৱাৰ পাছতেই প্ৰধানমন্ত্ৰী মোদীয়ে ভ্ৰমণৰ সময় কৰ্তন কৰাৰ সিদ্ধান্ত লয় আৰু চৌদি আৰৱে আয়োজন কৰা আনুষ্ঠানিক নৈশ আহাৰ এৰি দেশলৈ প্ৰত্যাৱৰ্তন কৰে । কাৰ্যসূচী অনুসৰি বুধবাৰে নিশা তেওঁ চৌদি আৰৱৰ পৰা ঘূৰি অহাৰ কথা আছিল । কিন্তু মঙলবাৰে পহলগামত সন্ত্রাসবাদী আক্রমণ সংঘটিত হোৱাৰ পাছত বুধবাৰে পুৱাতে তেওঁ ভাৰতত উপস্থিত হয় ৷

প্ৰধানমন্ত্ৰী নৰেন্দ্ৰ মোদীয়ে বুধবাৰে পুৱা চৌদি আৰৱৰ পৰা অহাৰ লগে লগে দিল্লী বিমানবন্দৰত বৈদেশিক পৰিক্ৰমা মন্ত্ৰী এছ জয়শংকৰৰ আৰু ৰাষ্ট্ৰীয় নিৰাপত্তা উপদেষ্টা অজিত ডোভাল সৈতে বৈঠকত মিলিত হয় ।

বৈদেশিক সচিব বিক্ৰম মিশ্ৰীও এই বৈঠকত অংশ লৈছিল বুলি বিষয়াসকলে জানিবলৈ দিয়ে ।

উপত্যকাত পৰ্যটকক লক্ষ্য কৰি সংঘটিত হোৱা আটাইতকৈ ভয়ংকৰ আক্ৰমণক লৈ দেশজুৰি শোক আৰু ক্ষোভৰ মাজতে মোদীক উভতি অহাৰ লগে লগে বিষয়াসকলে এই বিষয়ে অৱগত কৰে ।

দক্ষিণ কাশ্মীৰৰ পহলগামৰ পৰ্যটনৰ এক প্ৰধান স্থানত মঙলবাৰে সন্ত্ৰাসবাদীয়ে চলোৱা নৃশংস আক্ৰমণত কমেও ২৬ জন লোকক মৃত্যু হোৱাৰ লগতে কেইবাজনো লোক আহত হয় বুলি বিষয়াসকলে জনায় । এই আক্ৰমণৰ বলি হোৱাসকলৰ বেছিভাগেই পৰ্যটক ৷ তেওঁলোকে জনোৱা মতে, নিহতসকলৰ ভিতৰত দুজন বিদেশী, তেওঁলোক ক্ৰমে সংযুক্ত আৰৱ গণৰাজ্য আৰু নেপালৰ নাগৰিক ।

প্ৰধানমন্ত্ৰীয়ে এই আক্ৰমণৰ বাবে দায়ীসকলক ৰেহাই দিয়া নহ’ব আৰু তেওঁলোকক ন্যায়ৰ কাষ চাপিব বুলি প্ৰতিশ্ৰুতি দিয়ে । ইফালে এই ভয়ংকৰ আক্ৰমণৰ তথ্য লাভ কৰাৰ পাছতেই নিৰাপত্তা ব্যৱস্থাৰ নেতৃত্ব দিবলৈ গৃহমন্ত্ৰী অমিত শ্বাহে মঙলবাৰে লৰালৰিকৈ জম্মু-কাশ্মীৰত উপস্থিত হয় ।