অপাৰেশ্যন সেন্দূৰ এতিয়াও সমাপ্ত হোৱা নাই !

নতুন দিল্লী : আমেৰিকাৰ মধ্যস্থতাত ইতিমধ্যে ভাৰত আৰু পাকিস্তানে যুদ্ধবিৰতিত সন্মত হৈছে । অৱশ্যে পাকিস্তানে নিজৰ কু-চৰিত্ৰ পুনৰ এবাৰ উদঙাই যুদ্ধবিৰতি উলংঘন কৰি সীমান্তত গোলাবৰ্ষণ কৰিছে । অৱশ্যে ভাৰতেও নিজৰ স্থিতি স্পষ্ট কৰিছে । যিকোনো সন্ত্ৰাসবাদী কাৰ্যকলাপক ভাৰতে যুদ্ধৰ কাৰ্যকলাপ বুলি গণ্য কৰিব । ইয়াৰ মাজতে দেওবাৰে এক চৰকাৰী সূত্ৰই জনাইছে যে অপাৰেশ্যন সেন্দূৰ এতিয়াও সমাপ্ত হোৱা নাই ।

পাকিস্তানে গুলীবৰ্ষণ কৰিলে ভাৰতে দুগুণ প্ৰচেষ্টাৰে প্ৰতিশোধ ল'ব । সূত্ৰটোৱে কৈছে, "যদি সেই ফালৰ পৰা গুলীবৰ্ষণ হয় তেনেহ'লে এই ফালৰ পৰাও অধিক শক্তিশালীভাৱে গুলী চলিব ।"

দুয়োখন দেশৰ মাজত যুদ্ধবিৰতি চুক্তিত মধ্যস্থতাৰ বিষয়ত সূত্ৰটোৱে কয় যে ভাৰতক কোনো মধ্যস্থতাকাৰীৰ প্ৰয়োজন নাই আৰু ভাৰতে কেৱল সামৰিক অভিযানৰ সঞ্চালক প্ৰধান পৰ্যায়ৰ আলোচনাতহে অংশগ্ৰহণ কৰিব । সূত্ৰটোৱে কয়, "কাশ্মীৰ সন্দৰ্ভত ভাৰতৰ স্থিতি স্পষ্ট : পাকিস্তানে পিঅ'কে খালী কৰিলেহে পাকিস্তানৰ সৈতে আলোচনা হ'ব । পাকিস্তানৰ সৈতে কোনো ধৰণৰ ৰাজনৈতিক আলোচনাৰ সম্ভাৱনা নাই ।"

পাকিস্তানৰ সৈতে ৰাষ্ট্ৰীয় নিৰাপত্তা সংস্থা আৰু বৈদেশিক পৰিক্ৰমা মন্ত্ৰালয় পৰ্যায়ত আলোচনাৰ সম্ভাৱনাৰ সামান্যতম সম্ভাৱনাও নুই কৰি সূত্ৰটোৱে কয় যে ভাৰতে পাকিস্তানৰ ৮ টা বিমানঘাটিত নিখুঁত আক্ৰমণ চলাইছে । সূত্ৰটোৱে কৈছে, "আমাৰ সৈতে কথা পতা বিশ্বৰ সকলো দেশৰ প্ৰতিনিধিয়ে কৈছে যে ভাৰতে পহলগাম সন্ত্ৰাসবাদী আক্ৰমণৰ প্ৰতি সঁহাৰি জনাব ।"

ভাৰতে পাকিস্তানৰ পৰা অহা প্ৰতিটো ক্ৰিয়াৰ অধিক শক্তিৰে প্ৰত্যুত্তৰ দিব বুলিও স্পষ্ট কৰি দিয়ে সূত্ৰটোৱে । সূত্ৰটোৱে কয়, "প্ৰধানমন্ত্ৰী মোদীয়ে স্পষ্ট কৰিছে যে যদি পাকিস্তানে গুলীচালনা কৰে তেন্তে ভাৰতে অধিক শক্তিৰে গুলীচালনা কৰিব । পাকিস্তান আৰু পাকিস্তান অধিকৃত কাশ্মীৰৰ সন্ত্ৰাসবাদীৰ ঘাটি ধ্বংস কৰি মোদীয়ে যি কৈছিল কৰি দেখুৱাইছে ।"

সূত্ৰটোৱে লগতে স্পষ্ট কৰি দিছে যে সীমান্তৰ সিপাৰৰ পৰা সন্ত্ৰাসবাদী কাৰ্যকলাপ অন্ত নপৰালৈকে সিন্ধু জলচুক্তি স্থগিত ৰখাৰ দৰে প্ৰতিশোধমূলক ব্যৱস্থাত ভাৰত অটল থাকিব ।

উল্লেখ্য যে আমেৰিকাৰ মধ্যস্থতাত হোৱা যুদ্ধবিৰতিৰ পিছত নতুন দিল্লীয়ে ইছলামবাদক যুদ্ধবিৰতি উলংঘা কৰাৰ অভিযোগ উত্থাপন কৰিছে । শনিবাৰে সন্ধিয়া এক সংবাদমেলত বৈদেশিক সচিব বিক্রম মিছৰীয়ে দাবী কৰে যে পাকিস্তানৰ সৈতে হোৱা বুজাবুজিৰ বাৰম্বাৰ উলংঘা হৈছে ৷ এই উলংঘনৰ প্ৰতি সশস্ত্ৰ বাহিনীয়ে পৰ্যাপ্ত আৰু উপযুক্ত সঁহাৰি দিছে বুলিও তেওঁ উল্লেখ কৰে ।

লগতে পঢ়ক :যুদ্ধবিৰতিত সহমত প্ৰকাশ কৰিলেও অব্য়াহতআছে অপাৰেশ্য়ন সেন্দূৰ : বায়ু সেনা - OPERATION SINDOOR