নেশ্যনেল ডেস্ক,২ মাৰ্চ : ভাৰতীয় নৌসেনা বিশ্বৰ শক্তিশালী নৌবাহিনীৰ অন্যতম । এই নৌবাহিনীত সংযোজন হ'ব শক্তিশালী এমএইছ৬০ আৰ ছীহ'ক হেলিকপ্টাৰ । যিয়ে ভাৰতীয় নৌসেনাৰ কাৰ্যকলাপ অধিক শক্তিশালী কৰিব বুলি আশা কৰা হৈছে । বৈদেশিক সামৰিক বিক্ৰী কাৰ্যসূচীৰ অংশ হিচাপে ভাৰতে আমেৰিকাৰ পৰা ক্ৰয় কৰিব লগা ২৪ খন হেলিকপ্টাৰৰ ভিতৰত ৬ খন প্ৰথম পৰ্যায়ত দক্ষিণ নৌসেনাৰ অংশ হ'ব । ২০২০ চনৰ ফেব্ৰুৱাৰীত, ভাৰতে আমেৰিকাৰ সৈতে এমএইছ৬০আৰ ছীহ'ক হেলিকপ্টাৰ ক্ৰয় কৰাৰ বাবে এক চুক্তি স্বাক্ষৰ কৰে ।
এই হেলিকপ্টাৰ ইমানে শক্তিশালী যে ই সাগৰত লুকাই থকা শত্ৰুৰ চাবমেৰিন ধ্বংস কৰিবলৈ সক্ষম । একে সময়তে, এই হেলিকপ্টাৰে শত্ৰুৰ ঘাটি আক্ৰমণ কৰিব পাৰে আৰু কোনো অসুবিধা নোহোৱাকৈ উভতি আহিব পাৰে । এমএইছ৬০আৰ ছীহ'ক হেলিকপ্টাৰৰ আটাইতকৈ ডাঙৰ বৈশিষ্টটো হ'ল যে সাগৰৰ তলত লুকাই থকা চাবমেৰিন আৰু সাগৰৰ পৃষ্ঠত শত্ৰু দেশৰ জাহাজবোৰ চিনাক্ত আৰু আক্ৰমণ কৰিবলৈ ইয়াক মাত্ৰ কেইমিনিটমানহে সময় লাগে ।
অত্যাধুনিক এএলএফএছ ডিপিং সোণাৰ আৰু চ'নো বয় ব্যৱহাৰ কৰি এই হেলিকপ্টাৰে সাগৰৰ যিকোনো গভীৰতাৰ মাজেৰে পাৰ হৈ যোৱা চাবমেৰিনবোৰ চিনাক্ত কৰি ধ্বংস কৰিব পাৰে । এমএইছ৬০ আৰ ছীহ'ক হেলিকপ্টাৰৰ এই বৈশিষ্টৰ কথা ইটিভি ভাৰতক অৱগত কৰে স্কোয়াড্ৰন কমাণ্ডিং অফিচাৰ কেপ্টেইন এম অভিষেক ৰামে । তেওঁ উল্লেখ কৰা মতে এই হেলিকপ্টাৰ আমেৰিকাত নিৰ্মাণ কৰা হৈছিল যদিও হেলিকপ্টাৰখন স্বদেশীভাৱে নিৰ্মিত উন্নত সঁজুলি আৰু অস্ত্ৰ-শস্ত্ৰৰে সজ্জিত । এই হেলিকপ্টাৰে প্ৰমাণ কৰিছে যে ই ভাৰতীয় পৰিৱেশ আৰু পৰিস্থিতিত উৎকৃষ্ট । ইয়াক কাৰ্যকৰীভাৱে আৰম্ভ কৰাৰ বাবে সাজু কৰাটো আনন্দৰ বিষয় বুলি তেওঁ উল্লেখ কৰে ।
বিমান কাৰিকৰী বিষয়া লেফটেনেণ্ট কৰ্ণেল দীপক কৃষ্ণাই কয় যে সামুদ্ৰিক খণ্ডত সামৰিক উদ্দেশ্যৰ বাবে এই হেলিকপ্টাৰ হৈছে বিশ্বৰ সৰ্বশ্ৰেষ্ঠ হেলিকপ্টাৰ । তেওঁ লগতে কয় যে ই ভাৰতীয় সামুদ্ৰিক সীমাত শত্ৰুসকলৰ প্ৰত্যাহ্বানৰ মোকাবিলা কৰাত সহায় কৰিব । এক মাল্টি-মিছন হেলিকপ্টাৰ এমএইছ৬০ আৰ ছীহ'ক যিকোনো ভূমিকাৰ বাবে ব্যৱহাৰ কৰিব পাৰি । এই হেলিকপ্টাৰবোৰে অতীতত কৰা অভিযানবোৰত বিশেষ সফলতা দেখুৱাইছে ।
হেলিকপ্টাৰখন চাবমেৰিন বিৰোধী আক্ৰমণ, শত্ৰুৰ যুদ্ধ জাহাজৰ ওপৰত আক্ৰমণ, অনুসন্ধান আৰু উদ্ধাৰ অভিযান, লজিষ্টিক সমৰ্থন, কৰ্মচাৰী স্থানান্তৰ আৰু চিকিৎসা সামগ্ৰী স্থানান্তৰৰ বাবে সক্ষম । ইয়াৰ উপৰিও, এই হেলিকপ্টাৰখন বায়ু কেন্দ্ৰিক প্ৰতিৰক্ষা অভিযান আৰু বৈদ্যুতিক যুদ্ধত সক্ষম ।
এই হেলিকপ্টাৰখন সৰু এটা অঞ্চলটো অৱতৰণ কৰি পাৰে । সেয়েহে সৰু যুদ্ধজাহাজত ইয়াক সহজে মোতায়েন কৰিব পাৰি । এই হেলিকপ্টাৰৰ সন্মুখত আগুৱাই যোৱা ইনফ্ৰাৰেড চেন্সৰে এটা অবজেক্টৰ দ্বাৰা নিৰ্গত তাপক বৈদ্যুতিক সংকেতলৈ ৰূপান্তৰ কৰিব পাৰে আৰু অবজেক্টটোৰ সঠিক প্ৰতিচ্ছবি সৃষ্টি কৰিব পাৰে । হেলিকপ্টাৰৰ গ্লাছ ককপিট হৈছে এক মাল্টি-মিছন ডিজিটেল ককপিট যি দিন আৰু ৰাতি যিকোনো পৰিস্থিতিতে কাৰ্যক্ষম ।
ইতিমধ্যে দেশলৈ প্ৰেৰণ কৰা ৬ খন হেলিকপ্টাৰ কমিছন কৰাৰ পিচত 'আইএনএএছ ৩৩৪' নামেৰে জনাজাত প্ৰথম স্কোয়াড্ৰনৰ অংশ হ'ব । হেলিকপ্টাৰখনত শত্ৰুক ধ্বংস কৰিবলৈ ৩৮ টা লেজাৰ-গাইডেড ৰকেট, ৪ টা এমকে৫৪ টৰ্পেডো, মেচিনগান আৰু থলুৱা আণ্ডাৰ ৱাটাৰ বোমা আছে । নৌসেনাই জনাইছে যে এই সপ্তাহতে কোচিৰ আইএনএছ গৰুড়ত কমিছনিং কাৰ্যসূচী অনুষ্ঠিত হ'ব ।
লগতে পঢ়ক :এছইউ30 যুঁজাৰু বিমানৰ উন্নীতকৰণ; ভাৰতীয় প্ৰতিষ্ঠানেৰে প্ৰতিৰক্ষা মন্ত্ৰালয়ৰ চুক্তি
