উত্তৰ-পূৰ্বাঞ্চল পৰ্যটকৰ বাবে নিৰাপদ আশ্ৰয়স্থল: মধুচন্দ্ৰিকা হত্যাকাণ্ড প্ৰসংগত মেঘালয়ৰ মুখ্যমন্ত্ৰী

নতুন দিল্লী : মেঘালয়লৈ মধুচন্দ্ৰিকা উদযাপনৰ বাবে অহাৰ সময়ত ইন্দোৰৰ ব্যৱসায়ী ৰাজা ৰঘুবংশীৰ হাই-প্ৰফাইল হত্যাকাণ্ডই দেশৰ সংবাদ শিৰোনাম দখল কৰাৰ সময়তে মঙলবাৰে মুখ্যমন্ত্ৰী কনৰাড চাংমাই দাবী কৰে যে কেৱল মেঘালয়েই নহয়, সমগ্ৰ উত্তৰ-পূৰ্বাঞ্চলেই পৰ্যটকৰ বাবে এক নিৰাপদ আশ্ৰয়স্থল ।

এই ভয়ংকৰ হত্যাকাণ্ডৰ ঘটনাৰ পিছত বহু লোক আৰু ৰাষ্ট্ৰীয় সংবাদ মাধ্যমৰ এটা অংশই উত্তৰ-পূবৰ ৰাজ্যসমূহ ভ্ৰমণ কৰাটো পৰ্যটকৰ সুৰক্ষা আৰু নিৰাপত্তাৰ সন্দৰ্ভত এক 'অবাস্তৱসন্মত' নেতিবাচক ছবি প্ৰতিফলিত কৰা বুলি চৰ্চা হোৱাৰ পিছত তেওঁৰ এই বক্তব্যই তাৎপৰ্য বহন কৰিছে ।

ইটিভি ভাৰতৰ সৈতে হোৱা এক আছুতীয়া সাক্ষাৎকাৰত চাংমাই কয় যে মেঘালয় পৰ্যটকৰ বাবে এক নিৰাপদ স্থান হিচাপে বাৰম্বাৰ প্ৰমাণিত হৈছে । তেওঁ লগতে কয়, "মানুহে চিন্তা কৰাৰ প্ৰয়োজন নাই । সমগ্ৰ উত্তৰ-পূৰ্বাঞ্চল পৰ্যটকৰ অনুকূল ঠাই । কিয়নো আমাৰ মানুহবোৰ অতি বন্ধুত্বপূৰ্ণ আৰু বিভিন্ন ঋণাত্মক সমালোচনাৰ মাজতো আমি বিদেহ আত্মা (ৰাজা ৰঘুবংশী) আৰু তেওঁৰ পৰিয়ালৰ সদস্যসকলৰ বাবে প্ৰাৰ্থনা কৰিছোঁ । এইটোৱে প্ৰমাণ কৰে যে আমি কেনেকুৱা আৰু সমগ্ৰ উত্তৰ-পূৰ্বাঞ্চলো একেই ।"

তেওঁ কয় যে একাংশ লোক আৰু ৰাষ্ট্ৰীয় সংবাদ মাধ্যমে এই ঘটনাৰ ভুৱা আখ্যান প্ৰকাশ কৰি ইয়াক উজ্জ্বল কৰি তোলাটোৱে তেওঁলোকক গুৰুতৰভাৱে আঘাত দিছে । তেওঁ লগতে কয়, "আমি অধিক শক্তিশালী হৈ উভতি আহিম আৰু কেৱল মেঘালয়েই নহয় সমগ্ৰ উত্তৰ-পূৰ্বাঞ্চল যাতে নিৰাপদ হয়, সেয়া নিশ্চিত কৰিম ।"

উল্লেখ্য যে উত্তৰ-পূৰ্বাঞ্চলৰ উন্নয়ন বিভাগৰ ৰাজ্যিক মন্ত্ৰী (ড'নাৰ) সুকান্ত মজুমদাৰে সংসদত অৱগত কৰিছে যে ২০২৪-২৫ চনত উত্তৰ-পূবত অসমৰ পিছতে মেঘালয়লৈ সৰ্বাধিক পৰ্যটক আহিছিল ।

তেওঁ কয় যে ২০২৪-২৫ বিত্তীয় বর্ষৰ সময়ছোৱাত অসম ভ্ৰমণ কৰা ৭৬,১২,৭২০ জন পৰ্যটকৰ পাছত অঞ্চলটোৰ ভিতৰতে সৰ্বাধিক ১৩,৭১,৬৭৪ জন ঘৰুৱা পৰ্যটকে পাহাৰীয়া ৰাজ্যখন ভ্ৰমণ কৰিছিল । এই সময়ছোৱাত ১৯,৯৭৩ জন বিদেশী পৰ্যটকো মেঘালয়লৈ আহিছিল, যিটো অঞ্চলটোৰ ভিতৰত চতুৰ্থ সৰ্বাধিক । ছিকিমত বিদেশী পৰ্যটকৰ সংখ্যা আছিল সৰ্বাধিক ৯৩,৯০৮ । তাৰ পিছতে ত্ৰিপুৰা (৬৬,৭০৮), অসম (২৩,৮১৮) আৰু মেঘালয় । এই সময়ছোৱাত সংঘাতজৰ্জৰ মণিপুৰলৈ সৰ্বনিম্ন ঘৰুৱা (৫৭,৭০১) আৰু বিদেশী (৩,৬৮৮) পৰ্যটক আহিছিল ।

মজুমদাৰে কয় যে ২০২৩ চনত ভাৰতলৈ বাংলাদেশৰ পৰা ২১২ লাখ পৰ্যটক আহিছিল, যিটো আমেৰিকাৰ পিছতে সৰ্বাধিক । ই মুঠ বিদেশী পৰ্যটকৰ প্ৰবাহৰ ২২.৩ শতাংশক প্ৰতিনিধিত্ব কৰে । মজুমদাৰে লগতে কয় যে এই সময়ছোৱাত মুঠ ১,২০,৭৮,৭৭৬ জন ঘৰুৱা আৰু ২,২১,০৫০ জন বিদেশী পৰ্যটকে উত্তৰ-পূবৰ আঠোখন ৰাজ্য ভ্ৰমণ কৰিছিল ।

হত্যা আৰু মিছা আখ্যান

১১ মে’ত বিবাহপাশত আবদ্ধ হৈ ৰাজা আৰু সোনম ৰঘুবংশীয়ে ২০ মে’ত গুৱাহাটী হৈ মেঘালয়ত উপস্থিত হয় । নংগ্ৰিয়াট গাঁৱৰ হোমষ্টেৰ পৰা ওলাই অহাৰ কেইঘণ্টামানৰ পিছতে ২ মে’ত পূব খাচি পাহাৰ জিলাৰ ছোহৰাৰ পৰা নিৰুদ্দেশ হয় দম্পতীহাল ।

২ জুনত ৱেইছাৱডং জলপ্ৰপাতৰ ওচৰৰ এটা খাৱৈত ৰাজাৰ মৃতদেহ উদ্ধাৰ হয় । পৰৱৰ্তী সময়ত ৯ জুনৰ পুৱতি নিশা উত্তৰ প্ৰদেশৰ গাজীপুৰৰ পৰা সোনমক গ্ৰেপ্তাৰ কৰাৰ পূৰ্বলৈকে তেওঁৰ অনসন্ধান অভিযান অব্যাহত থাকে । পিছত তেওঁ আৰক্ষীৰ ওচৰত আত্মসমৰ্পণ কৰে । তাৰ পিছতে তেওঁৰ প্ৰেমিক ৰাজ কুশৱাহাক গ্ৰেপ্তাৰ কৰে আৰু ৰাজাক হত্যা কৰিবলৈ তেওঁলোকে নিযুক্তি দিয়া তিনিজন ভাৰাতীয়া হত্যাকাৰীক গ্ৰেপ্তাৰ কৰে ।

"আমি আৰম্ভণিৰে পৰাই এই কথাত দৃঢ় আছিলোঁ যে প্ৰাৰম্ভিক তথ্যসমূহত এইটো যথেষ্ট স্পষ্ট আছিল যে স্থানীয় লোক এই হত্যাকাণ্ডৰ সৈতে জড়িত নহয় । কিন্তু তেতিয়া আমাৰ হাতত প্ৰমাণ নাছিল । গতিকে আমি এটা দিশত সকাহ পাইছোঁ, যিহেতু এতিয়া সত্যটো স্পষ্ট হৈছে ।" চাংমাই কয় ।

তেওঁ কয় যে মেঘালয়কে ধৰি উত্তৰ-পূৰ্বাঞ্চলক লক্ষ্য কৰি একাংশ লোক আৰু 'দায়বদ্ধ চেনেল'সমূহে ভুৱা আখ্যানৰ সৃষ্টি কৰিছে । "হয়, এতিয়া আমি স্পষ্ট হৈ পৰিছোঁ যে এই বিশেষ ঘটনাৰ সৈতে কোনো স্থানীয় লোক জড়িত নাছিল ।" তেওঁ কয় ।

চাংমাই কয় যে হত্যাকাণ্ডৰ পিছত আলোকপাত কৰা বিভিন্ন তথ্য আৰু আখ্যানে কেৱল চৰকাৰ আৰু আৰক্ষীক লক্ষ্য কৰি লোৱাই নহয়, মেঘালয়ৰ জনসাধাৰণকো লক্ষ্য কৰি লৈছে । "সাধাৰণতে উত্তৰ-পূবৰ মানুহক লক্ষ্য কৰি লোৱা হৈছে, যিটো এক দুখজনক কথা । এটা অতি ভুল আখ্যানৰ সৃষ্টি হ'ল । আমি আশাকৰোঁ যে এই ভুৱা আখ্যান প্ৰচাৰ কৰাসকলে এই বিষয়ে চিন্তা কৰিব আৰু স্বেচ্ছাই ক্ষমা খুজিব, কিয়নো তেওঁলোকে যি কৰিলে সেয়া ভুল আছিল ।" চাংমাই কয় ।

তেওঁ লগতে কয়, "যিসকল ব্যক্তিয়ে নেতিবাচক আখ্যানৰ বাবে মুকলিকৈ ক্ষমা বিচাৰিছে তেওঁলোকৰ প্ৰতি মোৰ সন্মান জনাইছোঁ । আশাকৰোঁ আনসকলেও আগবাঢ়ি আহি স্বেচ্ছাই ক্ষমা বিচাৰিব আৰু ইতিবাচক বাৰ্তা প্ৰেৰণ কৰিব ।"

ক্ষতি কৰা হৈছে

চাংমাই কয় যে ইতিমধ্যে এক প্ৰকাৰে ক্ষতি কৰা হৈছে । "আৰু বহু আখ্যান আহি আছে । এতিয়াও আমি দেখিবলৈ পাওঁ যে বিশেষ ঘটনাটোৰ ওপৰত ভিত্তি কৰি একাংশ লোকে উত্তৰ-পূব আৰু মেঘালয়ৰ বিষয়ে ভুল আখ্যান সৃষ্টি কৰিয়েই আছে । ক্ষতি ইতিমধ্যে হৈছে । আৰু এতিয়া প্ৰশ্ন হয়, ইয়াৰ পৰা আমি কেনেকৈ আগবাঢ়ি যাম ? চাংমাই প্ৰশ্ন কৰে ।

তেওঁ কয় যে তেওঁৰ চৰকাৰে ইয়াক ইতিবাচকভাৱে ল’ব বিচাৰে আৰু যিসকল লোকে এই আখ্যান সৃষ্টি কৰিছে তেওঁলোকক নিজৰ দৃষ্টিকোণৰ পৰাই ইয়াক শুধৰাই দিবলৈ আহ্বান জনায় । "মই সামগ্ৰিকভাৱে ৰাইজকো আহ্বান জনাইছোঁ যে মেঘালয় আৰু উত্তৰ-পূব সদায় পৰ্যটকক আদৰণি জনোৱা আৰু সন্মান জনোৱা এখন নিৰাপদ স্থান হৈ আহিছে । বৃহৎসংখ্যক লোক আৰু তেওঁলোকৰ জীৱিকা পৰ্যটনৰ ওপৰত নিৰ্ভৰশীল । আমি আশাকৰোঁ যে ক্ষতি কৰা লোকসকলে ইয়াক শুধৰাই দিব ।" তেওঁ কয় ।

চাংমাই এই কথাও উল্লেখ কৰে যে কেন্দ্ৰীয় গৃহ মন্ত্ৰী অমিত শ্বাহ এই তদন্তক লৈ চিন্তিত । তেওঁ স্মৰণ কৰি কয়, "গৃহ মন্ত্ৰীয়ে মোক তথ্য, ঘটনা আৰু প্ৰমাণৰ বিষয়ে সুধিছিল । মই তেওঁৰ সৈতে নিৰ্দিষ্ট কাৰক আৰু তথ্য ভাগ-বতৰা কৰিছোঁ আৰু তাৰ ভিত্তিত তেওঁ সন্তুষ্ট হৈ কামটো আগবঢ়াই নিবলৈ পৰামৰ্শ দিছে ।"

চাংমাই কয় যে জনসাধাৰণৰ চিন্তাৰ বাবে অমিত শ্বাহে তেওঁক তদন্ত ক্ষিপ্ৰ কৰিবলৈ কয় । তেওঁ লগতে কয়, "মই তেওঁক কৈছিলোঁ যে আমাৰ আৰক্ষীয়ে সমগ্ৰ ঘটনাটো ৰাইজৰ আগত দাঙি ধৰাৰ অতি ওচৰ চাপিছোঁ ।"

আনহাতে, চি বি আই তদন্ত সন্দৰ্ভত তেওঁ কয়, "যিবোৰ তদন্ত আৰু কাৰ্য চলি আছে আৰু মেঘালয় আৰক্ষীয়ে নিজৰ কাম কৰা ধৰণটো চাই মই ভাবোঁ আমি সকলোৱে সন্তুষ্ট । সেয়েহে চি বি আই বা আন কোনো সংস্থা অনাৰ কোনো কাৰণ দেখা নাই ।"

অৱশ্যে চাংমাই কয় যে অভিযোগনামা দাখিল হোৱাৰ পিছত তেওঁৰ চৰকাৰে এই বিকল্পৰ বিষয়ে চিন্তা কৰিব পাৰে । "এই তদন্ত শেষ হওক আৰু অভিযোগনামা দাখিল হওক । ইয়াৰ পিছত যদি প্ৰয়োজন হয় আৰু মানুহৰ সন্দেহ থাকে, আমি পৰিস্থিতি পৰ্যবেক্ষণ কৰিম । কিন্তু বৰ্তমানৰ হিচাপত মই দেখা নাই যে ইয়াৰ মাজলৈ আন এজেন্সী অহাৰ কোনো প্ৰয়োজনীয়তা আছে ।"

চাংমাই কয়, "স্থানীয় লোকে পৰ্যটকসকলক সহায় কৰে । কাৰণ পৰ্যটকসকল তেওঁলোকৰ জীৱিকাৰো উৎস । আমাৰ পৰ্যটকৰ সুৰক্ষা আৰু নিৰাপত্তাৰ কথা আহিলে তেওঁলোক স্বেচ্ছাসেৱক হৈ পৰে ।"

চাংমাই লগতে কয় যে তেওঁৰ চৰকাৰে আত্মবিশ্বাস পুনৰ গঢ়ি তোলাৰ বাবে কেইবাটাও পদক্ষেপ ল’ব পাৰে । তেওঁ কয়, "আমি সকলো বিকল্পৰ সন্ধান কৰিছোঁ, যেনে জটিল স্থানত অধিক চিচিটিভি কেমেৰা স্থাপন কৰা, পৰ্যটন আৰক্ষী বা স্বেচ্ছাসেৱক গঠন কৰা বা স্থানীয় লোকসকলক অতি বেছি সক্ৰিয়ভাৱে জড়িত কৰা আৰু প্ৰশিক্ষণ দিয়া ।"