সামাজিক মাধ্যমত ভাইৰেল হৈ থকা কোন এইজন IITian বাবা ?

ঝজ্জৰ : বিশ্বাস কৰা হয় যে মানুহে জীৱনক সম্পূৰ্ণৰূপে বুজি উঠাৰ পিছত আধ্যাত্মিকতাৰ আশ্ৰয় লয় । এই প্ৰবাদটো সঁচা প্ৰমাণিত কৰিলে হাৰিয়ানাৰ ঝজ্জৰৰ বাসিন্দা অভয় সিঙে । যি এতিয়া সামাজিক মাধ্যমত ব্যাপকভাৱে ভাইৰেল হৈ আছে ।

অভয় সিঙে আইআইটি মুম্বাইৰ পৰা এৰোস্পেচ ইঞ্জিনিয়াৰিঙত বি.টেক কৰি পিছত তেওঁ ভাৰত আৰু কানাডাত কাম কৰিছিল । কিন্তু আধ্যাত্মিকতাৰ প্ৰতি আকৰ্ষণে তেওঁক সম্পূৰ্ণ সলনি কৰিলে । পূৰ্বৰ আইআইটিয়ান এতিয়া এজন বাবা ।

বাবা হিচাপে এতিয়া সামাজিক মাধ্যমত চৰ্চিত হৈ পৰিছে অভয় সিং । প্ৰয়াগৰাজ মহাকুম্ভত অভয় সিং যথেষ্ট জনপ্ৰিয় হৈ পৰিছে । এনে সময়তে ইটিভি ভাৰতৰ সাংবাদিক উপস্থিত হয় তেওঁৰ বাসগৃহত । তেওঁৰ পৰিয়ালে অভয় সিঙৰ জীৱন যাত্ৰা সম্পৰ্কে কেইবাটাও গুৰুত্বপূৰ্ণ মন্তব্য কৰে ।

• পিতৃয়ে ক'লে গোটেই কাহিনী

অভয় সিঙৰ পিতৃ এগৰাকী অধিবক্তা । যি ঝজ্জৰ আদালতত অধিবক্তা হিচাপে অনুশীলন কৰি আছে । পিতৃ কৰণ গ্ৰেৱালে কয় যে অভয় সিং সৰুৰে পৰা পঢ়াশুনাত অতি আগ্ৰহী আৰু ভাল আছিল । স্থানীয় বিদ্যালয়ত শিক্ষা লাভ কৰাৰ পিছত অভয় সিঙে দিল্লীত আইআইটি পৰীক্ষাৰ বাবে প্ৰশিক্ষণ লৈছিল । তাৰ পিছত তেওঁ আইআইটি মুম্বাইৰ পৰা বি.টেক ডিগ্ৰী লাভ কৰে ।

পিতৃয়ে জনোৱা মতে ইয়াৰ পিছত অভয়ে মাষ্টাৰ্ছ অফ ডিজাইনিঙৰ এক পাঠ্যক্ৰমত নামভৰ্তি কৰে । কেৱল এয়াই নহয় অভয় সিঙে দেশৰ ৰাজধানী দিল্লী আৰু কানাডাৰ প্ৰতিষ্ঠিত কোম্পানীতো কাম কৰিছিল । কিন্তু পৰৱৰ্তী সময়ত তেওঁ স্বদেশলৈ উভতি আহে । সেই সময়ছোৱাত তেওঁ শীতকালত কেইবাদিন ধৰি মানালী, ছিমলা, হৰিদ্বাৰ আদি বিভিন্ন স্থান ভ্ৰমণ কৰিছিল ।

• ৬ মাহ ধৰি কোনো কথা-বতৰা হোৱা নাই

পিতৃ কৰণ গ্ৰেৱালে কয় যে তেওঁ প্ৰায় ৬ মাহ পূৰ্বে অভয় সিঙৰ সৈতে কথা পাতিছিল । তেতিয়াৰে পৰা পিতৃয়ে নাজানে অভয় ক'ত আছে । তেওঁ পৰিয়ালৰ সৈতেও দূৰত্ব বজাই ৰাখিছে । কৰণ গ্ৰেৱালে কয় যে তেওঁ আৰু তেওঁৰ পৰিয়ালে অভয় সিঙক পুনৰ ঘৰলৈ উভতি অহাটো বিচাৰে । একে সময়তে তেওঁ এইটোও বিশ্বাস কৰে যে বাবা হোৱাৰ পিছত এতিয়া তেওঁৰ পুত্ৰৰ ঘৰলৈ উভতি অহাৰ সম্ভাৱনা নাই ।

• মাতৃ আৰু ভগ্নী যথেষ্ট উদ্বিগ্ন

পিতৃয়ে লগতে কয় যে অভয়ৰ মাতৃয়ে তেওঁক বাৰে বাৰে কয় যে পুত্ৰ ঘূৰি আহিব লাগে, গাৰ্হস্থ্য জীৱন গ্ৰহণ কৰিব লাগে । কিন্তু তেতিয়া তেওঁ মাতৃক কৈছিল যে সন্ন্যাসী হোৱাৰ পিছত আৰু এতিয়া এয়া সম্ভৱ নহয় ।

পিতৃয়ে কয়, "মোৰ সন্দেহ হৈছিল তেওঁ হৰিদ্বাৰত থাকিব পাৰে, এতিয়া যেতিয়া সামাজিক মাধ্যমত ভাইৰেল হৈছে মই নিশ্চিত যে তেওঁ সুৰক্ষিত আছে । ভনীয়েকেও অভয়ক মনত পেলাই থাকে আৰু কয় যে মই তেওঁৰ সৈতে যোগাযোগ কৰিবলৈ চেষ্টা কৰিব লাগে, কিন্তু তেওঁৰ সৈতে যোগাযোগ কৰিব নোৱাৰিলো ।"