চাংগাৰেড্ডী: ভাৰতীয় প্ৰতিৰক্ষা আন্তঃগাঁথনিৰ বাবে এক গুৰুত্বপূৰ্ণ সাফল্য । আই আই টি হায়দৰাবাদ আৰু ছিম্পলিফৰ্জ ক্ৰিয়েচনে সম্পূৰ্ণ থলুৱা প্ৰযুক্তি ব্যৱহাৰ কৰি লাডাখৰ লেহত যুটীয়াভাৱে দেশৰ প্ৰথমটো ৩ডি প্ৰিণ্টেড সামৰিক ঘাটি নিৰ্মাণ কৰিছে । সাগৰপৃষ্ঠৰ পৰা 11,000 ফুট উচ্চতাত নিৰ্মিত এই আন্তঃগাঁথনিটো এতিয়া কম অক্সিজেনযুক্ত অঞ্চলত নিৰ্মিত বিশ্বৰ সৰ্বোচ্চ ৩ডি প্ৰিণ্টেড আন্তঃগাঁথনি হিচাপে আনুষ্ঠানিকভাৱে স্বীকৃত হৈছে ।
প্ৰবাল প্ৰকল্প নামৰ এই প্ৰকল্পটোৰ নেতৃত্ব দিয়ে আই আই টি হায়দৰাবাৰ অধ্যাপক কে ভি এল সুব্ৰমনিয়মে । "আমি স্থানীয়ভাৱে লাভ কৰা সামগ্ৰী ব্যৱহাৰ কৰি এই সামৰিক বাংকাৰটো নিৰ্মাণ কৰিছো । ই বিশেষকৈ চৰম পৰিস্থিতিৰ বাবে খাপ খাব পৰাকৈ নিৰ্মিত । ই ভাৰতৰ প্ৰতিৰক্ষা আৰু নিৰ্মাণ দুয়োটা খণ্ডৰ বাবে এক নতুন অধ্যায় ৰচনা কৰিছে ।" এক বিবৃতিত সুব্ৰমনিয়মে কয় ।
অভিলেখ সময়ত নিৰ্মিত
ছিম্পলিফৰ্জ ক্ৰিয়েচনৰ মুখ্য কাৰ্যবাহী বিষয়া ধ্ৰুৱ গান্ধীয়ে উল্লেখ কৰে যে এই প্ৰকল্পটোৰ বাবে ব্যৱহৃত ৰবটিক 3ডি প্ৰিণ্টাৰটো 24 ঘণ্টাৰ ভিতৰত স্থাপন কৰা হৈছিল আৰু গোটেই বাংকাৰটো মাত্ৰ 5 দিনৰ ভিতৰত সম্পূৰ্ণ কৰা হৈছিল । অতি উচ্চ অঞ্চলৰ প্ৰতিকূল বতৰ আৰু ইয়াত কাৰ্য পৰিচালনাৰ বাবে সন্মুখীন হোৱা প্ৰত্যাহ্বানবোৰ সহ্য কৰাৰ বাবে এই ডিজাইনটো প্ৰস্তুত কৰা হৈছে ।
আই আই টি হায়দৰাবাদৰ এগৰাকী পি এইচ ডি শিক্ষাৰ্থী অৰুণেও এই প্ৰকল্পটোত গুৰুত্বপূৰ্ণ অৱদান আগবঢ়াইছে । এই উদ্ভাৱনে সমগ্ৰ দেশৰ দূৰৱৰ্তী আৰু কৌশলগত সামৰিক ক্ষেত্ৰত দ্ৰুত আন্তঃগাঁথনি উন্নয়নত বৈপ্লৱিক পৰিৱৰ্তন আনিব বুলি আশা কৰা হৈছে ।
