নতুন দিল্লী : ইডিৰ দ্বিতীয় পৰ্যায়ৰ সোধা-পোছাৰ বাবে মঙলবাৰে ব্যৱসায়ী ৰবাৰ্ট ভাদ্ৰা পত্নী তথা ৱায়ানাডৰ সাংসদ প্ৰিয়ংকা গান্ধীৰ সৈতে দিল্লীৰ প্ৰৱৰ্তন সঞ্চালকালয়ৰ (ইডি) কাৰ্যালয়ত উপস্থিত হয় ।
আনহাতে, সোধা-পোছাৰ বাবে ইডিৰ কাৰ্যালয়লৈ যোৱাৰ ঠিক পূৰ্বে ৰবাৰ্ট ভাদ্ৰাই এ এন আইৰ আগত কয়, "আমি কাকো ভয় নকৰো... আমাক লক্ষ্য কৰি লোৱা হৈছে । কাৰণ আমি প্ৰাসংগিক । সেয়া ৰাহুল গান্ধীক সংসদত বাধা দিয়াই হওক বা মোক বাহিৰত বাধা প্ৰদান কৰাই হওক ।"
"সংস্থাটোৰ পৰা দ্বিতীয় চমন লাভ কৰি মই আচৰিত হৈছিলোঁ । কিয়নো মই ইতিমধ্যে একেটা গোচৰ সন্দৰ্ভত সংস্থাটোৰ সন্মুখত ১৫ বাৰ হাজিৰ হৈছোঁ । মোক 10 ঘণ্টা ধৰি সোধা-পোছা কৰা হৈছিল আৰু মই 23,000 খন নথিপত্ৰ জমা দিছিলোঁ । মই সংস্থাটোক 2019 চনৰ পৰা থকা মোৰ বিবৃতিবোৰ দেখুৱাইছিলোঁ । আৰু এতিয়া মই 2019 চনত দিয়া উত্তৰৰ একেটা প্ৰশ্ন সুধিছে । সংস্থাটোৰ লোকসকলো হতবাক হৈছিল । মই মাত্ৰ এইটোৱে ক'ব পাৰোঁ যে সংস্থাবোৰৰ অপব্যৱহাৰ কৰা হৈছে ।" ভাদ্ৰাই লগতে কয় ।
গান্ধী পৰিয়ালৰ জোঁৱায়েকে লগতে দাবী কৰে যে হাৰিয়ানাৰ প্ৰাক্তন মুখ্যমন্ত্ৰী মনোহৰ লাল খট্টৰে গোচৰটোত ইতিমধ্যে তেওঁক ক্লিন চিট দিছিল । "হাৰিয়ানাত ইয়াৰ তদন্ত কৰাৰ সময়ত প্ৰশাসনে জানিব পাৰিছিল যে ইয়াত কোনো ভুল নাই । খট্টৰজীয়ে মোক একেটা ক্ষেত্ৰতে ক্লিন চিট দিছিল । কিন্তু এতিয়া মোৰ বুজি পোৱাত অসুবিধা হৈছে যে মোক 7 বছৰৰ পিছত পুনৰ কিয় প্ৰশ্ন কৰা হৈছে...।"
উল্লেখ্য যে ৰবাৰ্ট ভাদ্ৰাই তেওঁৰ সাংসদ পত্নী প্ৰিয়ংকা গান্ধীৰ সৈতে ইডিৰ কাৰ্যালয়ত উপস্থিত হয় । আনহাতে, তেওঁ ভিতৰলৈ যোৱাৰ ঠিক পূৰ্বে দুয়োৱে আলিঙ্গন কৰা দেখা যায় । ইফালে ভাদ্ৰাই দাবী কৰে যে তেওঁক লক্ষ্য কৰি লোৱা সত্ত্বেও তেওঁ শক্তিশালী হৈ ওলাই আহিব ।
"আমি নিশ্চিতভাৱে লক্ষ্যত আছোঁ, কিন্তু আমি এলা-পেচা লক্ষ্য নহয়; আমি কঠিন লক্ষ্য আৰু অধিক কঠিন হৈ পৰিম... মই নিজকে কেতিয়াও সাধাৰণ লক্ষ্য বুলি নকওঁ; মোৰ ওপৰত যিমানেই চাপ প্ৰয়োগ নকৰক কিয়, মই শক্তিশালী হৈ ওলাই আহিম ।" তেওঁ দাবী কৰে ।
আনহাতে, জেৰাৰ মাজতে তেওঁ দেশ এৰিবলৈ চেষ্টা কৰিব পাৰে নেকি বুলি যি জল্পনা-কল্পনা চলি আছে তেওঁ সেয়াও খাৰিজ কৰে । "মই দেশ এৰি পলাই নাযাওঁ । মই সকলো প্ৰশ্নৰ উত্তৰ দিম। আপোনালোকে যিমান বিচাৰে সিমান সংস্থা ব্যৱহাৰ কৰক, তাত মোৰ কোনো সমস্যা নাই ।" এ এন আইৰ আগত তেওঁ কয় ।
তেওঁৰ এই মন্তব্য গুৰুগ্ৰাম ভূমি গোচৰ সন্দৰ্ভত চলি থকা তদন্তৰ মাজতে আহিছে । এই গোচৰত ইডিয়ে ভাদ্ৰাক দুদিনৰ ভিতৰত দ্বিতীয়বাৰৰ বাবে সোধা-পোছাৰ বাবে চমন জাৰি কৰে । ইয়াৰ পূৰ্বে ভাদ্ৰাই ভাৰতীয় জনতা পাৰ্টীকো লক্ষ্য কৰি লৈ দাবী কৰে যে তেওঁৰ আৰু কংগ্ৰেছ নেতা ৰাহুল গান্ধীৰ বিৰুদ্ধে 'ডাইনী হত্যা'ৰ দৰে আচৰণ আৰু 'ৰাজনৈতিক প্ৰতিহিংসা' কৰা হৈছে । ভাদ্ৰাই অৱশ্যে নিজৰ স্থিতিত অটল থাকি কয় যে তেওঁ নিৰ্দোষী আৰু 'সত্যৰ জয় হ'ব' ।
