প্ৰধানমন্ত্ৰীলৈ পঠিওৱা হ'ব গোবৰৰ পৰা প্ৰস্তুত কৰা ফাকুগুৰি

ছাহাৰণপুৰ: উত্তৰ প্ৰদেশৰ ছাহাৰণপুৰৰ কানহা উদ্যান গোশালাই গোবৰৰ পৰা ফাকু প্ৰস্তুত কৰিছে । এইবাৰ গোবৰৰ পৰা প্ৰস্তুত কৰা ফাকুগুৰিৰে হোলী খেলা হ'ব । এই ফাকুগুৰি প্ৰধানমন্ত্ৰী নৰেন্দ্ৰ মোদী আৰু মুখ্যমন্ত্ৰী যোগী আদিত্য়নাথলৈও প্ৰেৰণ কৰাৰ প্ৰস্তুতি চলোৱা হৈছে । পৌৰ নিগমে দাবী কৰা মতে, এইটো ৰাজ্যৰ প্ৰথম গোশালা য'ত এনে এক অনন্য পৰীক্ষা কৰা হৈছে । ইয়াত প্ৰাকৃতিক উপাদানেৰে ফাকু প্ৰস্তুত কৰা হৈছে ।

এই ফাকু পৌৰ আয়ুক্ত সঞ্জয় চৌহানৰ তত্বাৱধানত প্ৰস্তুত কৰা হৈছে । গোবৰৰ পৰা তৈয়াৰ কৰা এই ফাকুগুৰি হোলীৰ সময়ত সংশ্লেষিত ৰঙৰ দ্বাৰা হোৱা ক্ষতিৰ পৰা সুৰক্ষা প্ৰদান কৰিব । এই ফাকুগুৰি প্ৰধানমন্ত্ৰী নৰেন্দ্ৰ মোদী, উত্তৰ প্ৰদেশৰ মুখ্যমন্ত্ৰী যোগী আদিত্য়নাথ আৰু ৰাজ্যখনৰ নগৰ উন্নয়ন মন্ত্ৰী এ কে শৰ্মালৈও প্ৰেৰণ কৰা হ'ব ।

গৰুৰ গোবৰৰ পৰা তৈয়াৰ কৰা হৈছে ফাকু (ETV Bharat)

পৌৰ নিগমৰ আয়ুক্ত সঞ্জয় চৌহানে এই সন্দৰ্ভত কয় যে পৌৰ নিগমৰ দ্বাৰা পৰিচালিত শ্ৰী শকুম্ভাৰী কানহা উদ্যন গোশালা আই এছ অ' প্ৰমাণিত । ই দেশ আৰু ৰাজ্যত ইয়াৰ নতুন পৰীক্ষাৰ বাবে জনাজাত । গোবৰৰ পৰা প্ৰস্তুত কৰা বিভিন্ন সামগ্ৰীৰ উপৰি ইয়াত পৰিৱেশ অনুকূল ৰঙো প্ৰস্তুত কৰা হৈছে ।

গোশালাৰ জ্যেষ্ঠ ভাৰপ্ৰাপ্ত মুখ্য অভিযন্তা বি কে সিঙে কয় যে গোশালাত প্ৰস্তুত কৰা ফাকুত গোবৰৰ গুৰি, কাড়শি পাউডাৰ, সুগন্ধি, ফলৰ ৰং, বীটৰুট, পালেং শাক আৰু হালধি ব্যৱহাৰ কৰা হৈছে । ইয়াত কোনো ৰাসায়নিক পদাৰ্থ নাথাকে। এয়া হৈছে উচ্চমানৰ প্ৰাকৃতিক ফাকুগুৰি ।

গৰুৰ গোবৰৰ পৰা তৈয়াৰ কৰা হৈছে ফাকু (ETV Bharat)

তেওঁ উল্লেখ কৰে যে গৰুৰ গোবৰৰ পৰা ফাকু চাৰিটা ৰঙত তৈয়াৰ কৰা হৈছে- গুলপীয়া, সেউজীয়া, হালধীয়া আৰু নীলা । গোশালাৰ ভাৰপ্ৰাপ্ত বিষয়া আৰু নিগমৰ পশু চিকিৎসা কল্যাণ বিষয়া ডাঃ সন্দীপ মিশ্ৰই কয় যে এই ফাকু ব্যৱহাৰ কৰিলে ছালৰ কোনো ক্ষতি নহ'ব ।

তেওঁ উল্লেখ কৰে যে একজিমা আৰু চ'ৰোচিছৰ দৰে ছালৰ বিভিন্ন ৰোগৰ প্ৰাকৃতিকভাৱে পঞ্চগৱৰৰ দ্বাৰা চিকিৎসা কৰা হয় । পঞ্চগৱৰৰ মূল উপাদান হৈছে গোবৰ । তেওঁ কয় যে গোশালাৰ দ্বাৰা প্ৰস্তুত কৰা এই ফাকুগুৰি পৌৰ নিগমৰ এখন ষ্টলৰ লগতে বজাৰ আৰু অনলাইনত উপলব্ধ হ'ব । এই ফাকু 100 গ্ৰাম, 250 গ্ৰাম আৰু 500 গ্ৰামৰ পেকেটত উপলব্ধ হ'ব ।