তেজপুৰ: মণিপুৰৰ ৰাজ্যপাল অজয় কুমাৰ ভাল্লাই বৃহস্পতিবাৰে এক বিশেষ ঘোষণাৰ জৰিয়তে ৰাজ্যখনৰ বিভিন্ন আৰক্ষী থানাৰ পৰা লুটপাত কৰি নিয়া অস্ত্ৰ-শস্ত্ৰসমূহ জমা দিবলৈ জনাইছে আহ্বান ।
ৰাজভৱনৰ পৰা জাৰি কৰা নিৰ্দেশনাত উল্লেখ কৰিছে যে, মণিপুৰৰ শান্তি-শৃংখলা পুনৰ ঘূৰাই আনিবৰ বাবে প্ৰতিটো জনগোষ্ঠীৰ লোকে দৈনন্দিন জীৱনত শান্তিৰ বাৰ্তা প্ৰেৰণ কৰিবলৈ সামূহিক প্ৰচেষ্টাৰ জৰিয়তে ঐক্যবদ্ধভাৱে থিয় হ’ব লাগিব ৷
ৰাজ্যপাল অজয় কুমাৰ ভাল্লাই বিশেষকৈ যুৱ প্ৰজন্মক উদ্দেশ্যে কয়, ‘‘মই যুৱকসকলক অনুৰোধ কৰিছো যে, তেওঁলোকে স্থানীয় আৰক্ষী থানাসমূহৰ পৰা হিংসাৰ সময়ত লুটপাত কৰি নিয়া অস্ত্ৰ-শস্ত্ৰ আৰু লগতে যি সমূহ অবৈধভাৱে অস্ত্ৰ মজুত ৰাখিছে, সেই সকলো অতি সোনকালে জমা কৰিব লাগে । চৰকাৰে মণিপুৰত এক শান্তিৰ বাতাবৰণ সৃষ্টি কৰিবলৈ প্ৰচেষ্টা অব্যাহত ৰাখিছে আৰু ৰাজ্যৰ যুৱ প্ৰজন্মৰ ভৱিষ্যত উন্নয়ন সাধন কৰিবলৈ চেষ্টা অব্যাহত ৰাখিছে । গতিকে সকলোৱে আগবাঢ়ি আহক আৰু এখন শান্তিৰ ৰাজ্য প্ৰতিষ্ঠা কৰিবলৈ আগবাঢ়ি যাওঁ’’ ।
উল্লেখযোগ্য যে, মণিপুৰত বিগত ২০২৩ চনৰ ৩ মে’ৰ পৰা গোষ্ঠীগত হিংসাই ধৰাশায়ী কৰি ৰাখিছে । ৰাজ্যখনৰ প্ৰায় ৬০ হাজাৰ লোক আজিও গৃহহীন হৈ আশ্ৰয় শিবিৰত জীৱন নিৰ্বাহ কৰিছে ।
আনহাতে, ৰাষ্ট্ৰপতিৰ শাসন চলি থকা ৰাজ্যখনত আৰক্ষীয়ে প্ৰকাশ কৰা তথ্য মতে, পাহাৰীয়া আৰু উপত্যকা জিলাৰ ফ্ৰিঞ্জ আৰু দুৰ্বল অঞ্চলত নিৰাপত্তা বাহিনীয়ে অনুসন্ধান অভিযান চলাইছিল । অনুসন্ধান অভিযানৰ সময়ত তলত উল্লেখ কৰা সামগ্ৰীসমূহ উদ্ধাৰ কৰা হয় । আৰক্ষীয়ে ৩ (তিনিটা) ইম্প্ৰভাইজড মৰ্টাৰ, ২ (দুটা) মাস্কেট ৰাইফলছ, ১ (এক) ভঙা মেগজিন, এটা স্পটাৰ স্কোপৰ, ২ দুটা বাইনোকুলাৰ, হেলমেট আৰু ৫ পাঁচটা বুলেট প্ৰুফ ভেষ্ট (বুলেট প্ৰুফ প্লেট অবিহনে) উদ্ধাৰ কৰে । এই সামগ্ৰীসমূহ টেংগন'পাল জিলাৰ মাচি থানাৰ অন্তৰ্গত এছ এল জোগাম অঞ্চলৰ পৰা উদ্ধাৰ কৰিছে ।
তথ্য অনুসৰি, কুকি নেচনেল আৰ্মী আৰু কুকি নেচনেল অৰ্গেনাইজেচনকে ধৰি মুঠ ২৫ টা উগ্ৰপন্থী গোটে ২০৫ টা অত্যাধুনিক অস্ত্ৰ আৰু ২৭৭৬ টা অস্ত্ৰ-শস্ত্ৰ মজুত ৰাখিছে, যিটো চৰকাৰীভাৱে মজুত ৰখাৰ অনুজ্ঞা যথেষ্ট পৰিমাণে কম ।চূড়াচান্দপুৰৰ ৩০-৫৫ কিলোমিটাৰ ভিতৰত ৬ টা এনে শিবিৰ আছে ৷
১৪৪ সামগ্ৰী কঢ়িওৱা বাহন আৰু ৩৭৪ খন অত্যাৱশ্যকীয় সামগ্ৰী কঢ়িওৱা বাহন ক্ৰমে ২ আৰু ৩৭ নং ৰাষ্ট্ৰীয় ঘাইপথৰ কাষেৰে নিৰাপত্তাৰ মাজত পাৰ হৈছে । সকলো দুৰ্গম স্থানতে কঠোৰ নিৰাপত্তা ব্যৱস্থা গ্ৰহণ কৰা হয় আৰু বাহনসমূহৰ মুক্ত আৰু নিৰাপদ চলাচল নিশ্চিত কৰাৰ বাবে স্পৰ্শকাতৰ অঞ্চলত নিৰাপত্তাৰক্ষীৰ কনভয়ৰ ব্যৱস্থা কৰা হয় ।
মণিপুৰৰ বিভিন্ন জিলাত পাহাৰ আৰু উপত্যকা উভয়তে মুঠ ১১১ টা নাকা চেকপইণ্ট স্থাপন কৰা হৈছিল ৷ ৰাজ্যখনৰ বিভিন্ন জিলাত আইন উলংঘা নোহোৱাৰ বাবে কোনো লোকক আৰক্ষীয়ে আটক কৰিবলগীয়া হোৱা নাই ।
