হুইলচেয়াৰৰ অভাৱত বিমানবন্দৰত পৰি আঘাতপ্ৰাপ্ত বৃদ্ধা: মূৰপোলোকা এয়াৰ ইণ্ডিয়াৰ

নতুন দিল্লী : পুনৰ এবাৰ বিতৰ্কত এয়াৰ ইণ্ডিয়া । অভিযোগ অনুসৰি এয়াৰ ইণ্ডিয়া কৰ্তৃপক্ষই হুইলচেয়াৰ নিদিয়াৰ বাবেই বিপদত পৰিল এগৰাকী বৃদ্ধা । Xৰ এটা পোষ্টত দুৰ্ভাগ্যজনক ঘটনাটো বৰ্ণনা কৰিলে এগৰাকী মহিলাই । মহিলাগৰাকীয়ে দাবী কৰা মতে এয়াৰ ইণ্ডিয়াই বৃদ্ধসকলৰ বাবে হুইলচেয়াৰৰ ব্যৱস্থা নকৰাৰ বাবে নতুন দিল্লীৰ আই জি আই বিমানবন্দৰত পৰি যায় ৮২ বছৰীয়া এগৰাকী বৃদ্ধা । বৃদ্ধাগৰাকীক সম্ভাব্য মস্তিষ্কৰ ৰক্তক্ষৰণৰ বাবে আই চি ইউত ভৰ্তি কৰোৱা হয় । শুকুৰবাৰে পাৰুল কানৱাল নামৰ মহিলাগৰাকীয়ে এটা পোষ্টত তেওঁৰ আইতাকৰ সৈতে হোৱা ঘটনাটো শ্বেয়াৰ কৰে ।

চিকিৎসালয়ত ভৰ্তি আইতাকৰ ফটো আৰু তেওঁৰ এয়াৰ টিকটৰ প্ৰতিলিপিও শ্বেয়াৰ কৰে মহিলাগৰাকীয়ে । তেওঁ দাবী কৰা মতে তেওঁলোকে আগতীয়াকৈ হুইলচেয়াৰ বুক কৰিছিল । তাৰ পিছতো হুইলচেয়াৰ নোপোৱাৰ বাবে আইতাকে কেনেদৰে খোজকাঢ়ি গৈছিল আৰু পথত দুৰ্ঘটনাক্ৰমে পৰি আঘাতপ্ৰাপ্ত হৈছিল সেই কথাও বৰ্ণনা কৰিলে মহিলাগৰাকীয়ে ।

বিমানবন্দৰত পৰি আঘাতপ্ৰাপ্ত বৃদ্ধা (Screenshot of the post (X@parulkanwar))

এয়াৰ ইণ্ডিয়াৰ বিৰুদ্ধে গুৰুতৰ অভিযোগ

অসহায় মহিলাগৰাকীয়ে পোষ্টটোত লিখিছে, "মই এইটো পোষ্ট কৰিছো কাৰণ মোৰ কোনো বিকল্প নাই আৰু এইটো ভাবি খং উঠিছে যে মানুহৰ স্বাস্থ্য আৰু জীৱনৰ মূল্য ইমান কম । এয়াৰ ইণ্ডিয়া, আপোনালোকে মোৰ আইতাক ইমান বেয়া ব্যৱহাৰ কৰিছিল । আপোনালোক লজ্জিত হোৱা উচিত ।" X ব্যৱহাৰকাৰী মহিলাগৰাকীয়ে কৈছে যে ৪ মাৰ্চত দিল্লীৰ পৰা বেংগালুৰুলৈ যাত্ৰাৰ বাবে তেওঁলোকে আইতাকৰ বাবে এখন হুইলচেয়াৰ আগতীয়াকৈ বুক কৰিছিল আৰু এয়াৰলাইনৰ দ্বাৰা নিশ্চিত কৰা হৈছিল । পাৰুলৰ মতে তেওঁৰ আইতাক এগৰাকী প্ৰাক্তন লেফটেনেণ্ট জেনেৰেলৰ পত্নী, যিয়ে কেইবাটাও যুদ্ধত ভাৰতৰ হৈ যুঁজিছিল ।

বিমানবন্দৰত পৰি আঘাতপ্ৰাপ্ত বৃদ্ধা (Screenshot of the post (X@parulkanwar))

কিন্তু বিমানবন্দৰত উপস্থিত হোৱাৰ পিছতে বৃদ্ধাগৰাকীক হুইলচেয়াৰৰ ব্যৱস্থা কৰা হোৱা নাছিল । অসহায় পাৰুলে লিখিছে, "আমি প্ৰায় এঘণ্টা চেষ্টা কৰিছিলো, এয়াৰলাইন কৰ্মচাৰী, বিমানবন্দৰৰ হেল্প ডেস্ক, বিকল্প হিচাৰে ইণ্ডিগ' এয়াৰলাইন কৰ্মচাৰীসকলক অনুৰোধ কৰিছিলো (যাৰ ঘটনাক্ৰমে বিনামূলীয়া হুইলচেয়াৰ আছিল কিন্তু শ্বেয়াৰ কৰা নাছিল)। আন কোনো বিকল্প নথকাত বৃদ্ধাগৰাকীয়ে লাহে লাহে পৰিয়ালৰ এজন সদস্যৰ সহায়ত টি৩ নতুন দিল্লীৰ ৩ টা পাৰ্কিং লেন পাৰ হৈ খোজকাঢ়ি গৈছিল । তেওঁ খোজকাঢ়ি বিমানবন্দৰত প্ৰৱেশ কৰিবলৈ সক্ষম হৈছিল । তাৰ পিছতো কোনো হুইলচেয়াৰ বা সহায় প্ৰদান কৰা হোৱা নাছিল । অৱশেষত দুৰ্ঘটনাক্ৰমে তেওঁ বাগৰি পৰিছিল । এয়াৰ ইণ্ডিয়াৰ প্ৰিমিয়াম ইক'নমি কাউণ্টাৰৰ সন্মুখত তেওঁ পৰি গৈছিল । এজনো লোক সহায়ৰ বাবে আগবাঢ়ি অহা নাছিল ।"

তেওঁ কয় যে তেওঁলোকে প্ৰাথমিক চিকিৎসাৰ বাবে সহায় বিচাৰিছিল কিন্তু কোনেও সহায় কৰা নাছিল । পাৰুলে লিখিছে, "এয়াৰ ইণ্ডিয়াৰ কৰ্মচাৰীৰ পৰা আশা কৰা হৈছিল যে পৰিয়ালৰ সদস্যজনক এম আই কোঠালৈ লৈ গৈ চিকিৎসা প্ৰদান কৰিব। অৱশেষত হুইলচেয়াৰখন আহিল আৰু তেওঁক তৎক্ষণাৎ সঠিক পৰীক্ষা নকৰাকৈ উঠোৱা হৈছিল । তেওঁৰ ওঁঠৰ পৰা তেজ ওলাই আছিল । বিমানৰ কৰ্মচাৰীসকলে আইচ পেক দিছিল আৰু চিকিৎসা সহায়ৰ বাবে বেংগালুৰু বিমানবন্দৰ কৰ্তৃপক্ষক মাতিছিল । তাত এগৰাকী চিকিৎসক আছিল আৰু ২ টা চিলাই মাৰিছিল । আজি মই আই চি ইউত বহি এইটো লিখি আছো । তেওঁ ইয়াত মগজুৰ সম্ভাব্য ৰক্তক্ষৰণৰ বাবে দুদিন পৰ্যৱেক্ষণত আছে ।"

পাৰুলে উল্লেখ কৰা মতে ইতিমধ্যে অসামৰিক বিমান পৰিবহণ সঞ্চালকালয় আৰু এয়াৰ ইণ্ডিয়াত এই সন্দৰ্ভত অভিযোগ দাখিল কৰা হৈছে ।

এয়াৰ ইণ্ডিয়াৰ প্ৰতিক্ৰিয়া

মহিলাগৰাকীৰ এই পোষ্টটো শ্বেয়াৰ হোৱাৰ লগে লগে বিভিন্ন মাধ্যমৰ পৰা প্ৰতিক্ৰিয়া দেখা গৈছে । এয়াৰ ইণ্ডিয়া কৰ্তৃপক্ষইও ইয়াৰ প্ৰতিক্ৰিয়া প্ৰকাশ কৰিছে আৰু বৃদ্ধাগৰাকীৰ আশু আৰোগ্যৰ বাবে প্ৰাৰ্থনা জনাইছে । এয়াৰ ইণ্ডিয়াই সঁহাৰি জনাই পাৰুলক এটা ফোন কৰিবলৈ কৈছে । এয়াৰ ইণ্ডিয়াই লিখিছে, "মৰমৰ শ্ৰীমতী কানৱাৰ, আমি এইটো মন কৰিছো আৰু আইতাৰ আশু আৰোগ্য কামনা কৰিছো । আমি এই সন্দৰ্ভত এটা ফোনৰ জৰিয়তে আপোনাৰ সৈতে সংযোগ স্থাপন কৰিব বিচাৰো আৰু আপোনাৰ ফোন নম্বৰ আৰু ডি এমৰ জৰিয়তে সুবিধাজনক সময় শ্বেয়াৰ কৰিবলৈ অনুৰোধ কৰিছো ।"

এই সন্দৰ্ভত পাৰুলে উত্তৰত কৈছে, "দিয়া হৈছে, কিন্তু উপযুক্ত অনুসন্ধান অবিহনে মোক ফোন নকৰিব । অজুহাত নিদিব ।" এয়াৰ ইণ্ডিয়াই পুনৰ ইয়াৰ উত্তৰ দিছে,"মৰমৰ শ্ৰীমতী কানৱাৰ, আমি আপোনাৰ আইতাৰ আৰোগ্য কামনা কৰিছো । আমি সক্ৰিয়ভাৱে বিষয়টোৰ ওপৰত কাম কৰি আছো আৰু আপোনাক আশ্বাস দিছো যে আমি অতি সোনকালে সম্পূৰ্ণ বিৱৰণ শ্বেয়াৰ কৰিম ।"

পৰৱৰ্তী সময়ত এক বিবৃতিত এয়াৰ ইণ্ডিয়াই ঘটনাটোৰ বিষয়ে বিৱৰণ দাঙি ধৰি কৈছে, "হুইলচেয়াৰ বা যাত্ৰীগৰাকীক কোনো সহায় প্ৰদানৰ বাবে অস্বীকাৰ কৰা হোৱা নাছিল । এয়াৰ ইণ্ডিয়াৰ কাৰণে দিল্লী বিমানবন্দৰত এগৰাকী বৃদ্ধ গুৰুতৰভাৱে আঘাতপ্ৰাপ্ত হোৱাৰ অভিযোগ সংবাদ মাধ্যমত দেখা গৈছে । আমি বৃদ্ধাগৰাকীৰ প্ৰতি সম্পূৰ্ণ সহানুভূতিশীল আৰু তেওঁৰ দ্ৰুত আৰোগ্য কামনা কৰো । আমি আমাৰ অনুসন্ধানৰ ওপৰত নিৰ্ভৰ কৰি নিম্নলিখিতবোৰ ক'ব বিচাৰো: উক্ত যাত্ৰীগৰাকীয়ে তেওঁৰ পৰিয়ালৰ সদস্যসকলৰ সৈতে ভ্ৰমণ কৰি প্ৰস্থানৰ ২ ঘণ্টা পূৰ্বে পৰামৰ্শ দিয়াতকৈ বহু পলমকৈ প্ৰস্থান টাৰ্মিনেলত উপস্থিত হৈছিল ।

যাত্ৰীৰ সৈতে থকা পৰিয়ালৰ সদস্য/আত্মীয়সকলে হুইলচেয়াৰৰ বাবে অনুৰোধ কৰিবলৈ প্ৰস্থানৰ নিৰ্ধাৰিত সময়ৰ ৯০ মিনিটৰ কম সময়ৰ আগতে এয়াৰ ইণ্ডিয়াৰ টিকেটিং কাৰ্যালয়ৰ ওচৰত অৱস্থিত পি আৰ এম ডেস্কত প্ৰতিবেদন দিছিল । সেই সময়ত সৰ্বাধিক চাহিদাৰ বাবে যাত্ৰীৰ আত্মীয়সকলে অপেক্ষা কৰিবলগা হৈছিল আৰু ১৫ মিনিটৰ ভিতৰত হুইলচেয়াৰৰ ব্যৱস্থা কৰিব পৰা নগ'ল । যাত্ৰীগৰাকী হুইলচেয়াৰৰ বাবে এঘণ্টা অপেক্ষা কৰাৰ দাবী ভিত্তিহীন । তেওঁলোকৰ নিজৰ ইচ্ছা অনুসৰি যাত্ৰীগৰাকীয়ে খোজকাঢ়ি গৈছিল । তেওঁ দুৰ্ভাগ্যবশতঃ বিমানবন্দৰৰ চৌহদত পৰি গৈছিল । ঘটনাটোৰ পিছতে দিল্লী বিমানবন্দৰৰ বিষয়াসকলৰ লগতে কৰ্তব্যৰত বিমানবন্দৰৰ চিকিৎসকে লগে লগে তেওঁৰ ওচৰলৈ গৈ প্ৰাথমিক চিকিৎসা প্ৰদান কৰে ।

লগতে পঢ়ক :বৰযাত্ৰীৰ দল আহিল হেলিকপ্টাৰত; দৰাৰ সৈতে ছেল্ফী ল’বলৈ হেতা-ওপৰা সকলোৰে - BRINGING BRIDE BY HELICOPTER TREND