নতুন দিল্লী : দিল্লী উচ্চ ন্যায়ালয়ৰ ন্যায়াধীশ যশৱন্ত বৰ্মাৰ চৰকাৰী বাসভৱনৰ পৰা বুজন পৰিমাণৰ নগদ ধন উদ্ধাৰৰ ঘটনা সন্দৰ্ভত দিল্লী আৰক্ষীক এজাহাৰ দাখিল কৰিবলৈ নিৰ্দেশ বিচাৰি কৰা আবেদনৰ পৰীক্ষা কৰিবলৈ সন্মত হৈছে উচ্চতম ন্যায়ালয় । ১৪ মাৰ্চৰ নিশা প্ৰায় ১১.৩৫ বজাত ন্যায়াধীশ বৰ্মাৰ লুটিয়েন্স দিল্লীৰ বাসগৃহত অগ্নিকাণ্ডৰ পিছতে বহু পৰিমাণৰ নগদ ধনৰ উদ্ধাৰ হোৱাৰ অভিযোগটো উত্থাপন হৈছিল ।
ভাৰতৰ মুখ্য ন্যায়াধীশ সঞ্জীৱ খান্নাৰ নেতৃত্বত এক বিচাৰপীঠৰ সন্মুখত অধিবক্তা মেথিউজ জে নেদম্পাৰাই বিষয়টো উত্থাপন কৰিছিল । নেদম্পাৰাই বিচাৰপীঠক বিষয়টোৰ জৰুৰী শুনানিৰ বাবে আহ্বান জনাইছিল । বিচাৰপীঠে অধিবক্তাজনক কয় যে তেওঁৰ আবেদন বিবেচনা কৰা হ'ব ।
আবেদনকাৰীয়ে বিষয়টোৰ ভিডিঅ'টোকে ধৰি সকলো নথি-পত্ৰ ৰাজহুৱা কৰাৰ বাবে উচ্চতম ন্যায়ালয়ৰ মুখ্য ন্যায়াধীশক প্ৰশংসা কৰে । আবেদনকাৰীয়ে কয় যে ন্যায়াধীশৰ বিৰুদ্ধে এখন এজাহাৰ পঞ্জীয়ন কৰা উচিত । বিচাৰপীঠে অধিবক্তাজনক কোনো ৰাজহুৱা বিবৃতি নিদিবলৈ কয় । আনহাতে তেওঁ শীঘ্ৰে শুনানিৰ তাৰিখ পাব বুলিও আশ্বাস দিয়ে ।
২৩ মাৰ্চত অধিবক্তা নেদম্পাৰা আৰু আন তিনিজনৰ দ্বাৰা দাখিল কৰা আবেদনখনে কে বীৰাস্বামী গোচৰৰ ১৯৯১ চনৰ ৰায়কো প্ৰত্যাহ্বান জনাইছে য'ত শীৰ্ষ ন্যায়ালয়ে ৰায় দিছিল যে ভাৰতৰ মুখ্য ন্যায়াধীশৰ আগতীয়া সন্মতি অবিহনে উচ্চ ন্যায়ালয় বা শীৰ্ষ আদালতৰ ন্যায়াধীশৰ বিৰুদ্ধে কোনো অপৰাধমূলক প্ৰক্ৰিয়া আৰম্ভ কৰিব নোৱাৰি ।
আবেদনখনত কোৱা হৈছিল যে ন্যায়াধীশসকলৰ প্ৰতি প্ৰতিৰোধ ক্ষমতাই আইনৰ সন্মুখত সমতাৰ সাংবিধানিক নীতি উলংঘা কৰিছে আৰু ন্যায়িক দায়বদ্ধতা আৰু আইনৰ শাসনৰ বিষয়ে উদ্বেগ প্ৰকাশ কৰিছে ।
মুখ্য ন্যায়াধীশে তদন্ত কৰাৰ বাবে এখন আভ্যন্তৰীণ সমিতি গঠন কৰিছিল আৰু দিল্লী উচ্চ ন্যায়ালয়ৰ মুখ্য ন্যায়াধীশ ডি কে উপাধ্যায়ক ন্যায়াধীশ বৰ্মাক কোনো ন্যায়িক কাম নিদিবলৈ পৰামৰ্শ দিছিল । সোমবাৰে ন্যায়াধীশ বৰ্মাক পৰৱৰ্তী আদেশলৈকে ডি-ৰোষ্টাৰ কৰা হয় ।
মুখ্য ন্যায়াধীশ সঞ্জীৱ খান্নাৰ নেতৃত্বত উচ্চতম ন্যায়ালয়ৰ কলেজিয়ামে সোমবাৰে এক প্ৰস্তাৱ জাৰি কৰি ন্যায়াধীশ যশৱন্ত বৰ্মাক তেওঁৰ মূল উচ্চ ন্যায়ালয় এলাহাবাদ উচ্চ ন্যায়ালয়লৈ প্ৰত্যাৱৰ্তন কৰিবলৈ কেন্দ্ৰক পৰামৰ্শ দিয়ে । তাৰ মাজতে মঙলবাৰে তদন্তৰ বাবে উচ্চতম ন্যায়ালয়ৰ দ্বাৰা নিযুক্ত আভ্যন্তৰীণ সমিতিৰ তিনিজন সদস্যই ন্যায়াধীশ বৰ্মাৰ বাসগৃহ পৰিদৰ্শন কৰে ।
