নতুন দিল্লী: পহলগামকাণ্ডক লৈ দেশ উত্তপ্ত হৈ আছে । যিকোনো সময়তে আৰম্ভ হ'ব পাৰে যুদ্ধ ! যুদ্ধংদেহী ৰূপত দেখা গৈছে ভাৰতীয় সৈন্য । ভাৰতীয়ৰ ৰূপ দেখি শংকিত হৈছে পাকিস্তানো ! দেশত ইখনৰ পাছত সিখনকৈ বৈঠকত বহিছে ভাৰতীয় শীৰ্ষ নেতাসকল ।
ইয়াৰ মাজতে পঞ্জাবৰ ফিৰোজপুৰত সংঘটিত হৈছে এক অদ্ভূত ঘটনা । টহল দি থকা অৱস্থাতে অসাৱধানবশতঃ এজন ভাৰতীয় সৈন্য অজানিতে পঞ্জাবৰ ফিৰোজপুৰৰ সমীপত আন্তঃৰাষ্ট্ৰীয় সীমান্ত পাৰ হৈ পাকিস্তানত উপস্থিত হয় । তাৰ পাছতে পাকিস্তান ৰেঞ্জাৰে আটক কৰে সীমান্ত নিৰাপত্তা বাহিনীৰ ভাৰতীয় সৈন্যজনক ।
জানিব পৰা মতে, এই ঘটনাটো সংঘটিত হয় বুধবাৰে দিনৰ ভাগত । পাকিস্তানী ৰেঞ্জাৰে বুধবাৰে বিয়লি আটক কৰে ভাৰতীয় সেনা জোৱানজনক । বৰ্তমান পাকিস্তানী সেনাৰ হাতত বন্দী হৈ আছে ভাৰতীয় জোৱানজন ।
সংবাদ সংস্থা ANI-এ উল্লেখ কৰা মতে, বি এছ এফৰ জোৱানজনে সীমান্তত পহৰা দি আছিল । কৰ্মৰত স্থানীয় কৃষকসকলক নিৰাপত্তা প্ৰদান কৰি থকাৰ সময়তে অজ্ঞাতে সীমান্ত অতিক্ৰম কৰি গুচি যায় । প্ৰাৰম্ভিক খবৰ অনুসৰি, জোৱানজনে অজানিতে পাকিস্তানৰ ভূখণ্ডত ভৰি দিয়ে ।
এই ঘটনাৰ পিছতে বিষয়াসকলে জনোৱা মতে, বি এছ এফ আৰু পাকিস্তান ৰেঞ্জাৰৰ মাজত পতাকা বৈঠক আৰম্ভ কৰা হয় । বৰ্তমান ভাৰতীয় জোৱানজনক নিৰাপদে ঘূৰাই অনাৰ বাবে চিন্তা-চৰ্চা চলি আছে ।
এই সন্দৰ্ভত অৱগত এগৰাকী বিষয়াই সংবাদ সংস্থা ANIৰ আগত কয় যে দুয়োপক্ষৰ জ্যেষ্ঠ বিষয়াসকলে বিষয়টো সৌহাদ্যপূৰ্ণভাৱে সমাধানৰ বাবে যোগাযোগ কৰি আছে বুলি জানিব পৰা গৈছে ।
জম্মু-কাশ্মীৰ (LoCৰ কিছু অংশকে ধৰি), পঞ্জাব, ৰাজস্থান আৰু গুজৰাট ৰাজ্যসমূহ সামৰি ৩,৩২৩ কিলোমিটাৰ দৈৰ্ঘৰ ভাৰত-পাকিস্তান সীমান্ত পহৰা দিয়াৰ বাবে দায়বদ্ধ প্ৰাথমিক বাহিনীৰ বি এছ এফ ।
ঐতিহাসিক উত্তেজনা আৰু চলি থকা নিৰাপত্তাজনিত প্ৰত্যাহ্বানৰ বাবে এই সীমান্ত দেশৰ অন্যতম স্পৰ্শকাতৰ আৰু অস্থিৰ অঞ্চল হিচাবে বিবেচিত ।
