নতুন দিল্লী: আকৌ বোমা বিস্ফোৰণৰ ভাবুকি । এইবাৰ চৰকাৰী কাৰ্যালয় বোমাৰে উৰুৱাই দিয়াৰ ভাবুকি প্ৰদান কৰিছে কোনো দুষ্ট চক্ৰই । এই খবৰ লাভ কৰাৰ পাছতে সৃষ্টি হয় এক হুলস্থূলীয়া পৰিৱেশৰ ।
জানিব পৰা মতে, এইবাৰ বোমাৰে দক্ষিণ-পশ্চিম দিল্লীৰ প্ৰশাসনিক কাৰ্যালয়টো উৰুৱাই দিয়াৰ ভাবুকি লাভ কৰা হৈছে । প্ৰথমে দ্বাৰকাস্থিত এছ ডি এমৰ কাৰ্যালয়ে বোমাৰ ভাবুকি লাভ কৰে, তাৰ পিছত তাত উপস্থিত থকা সকলো কৰ্মচাৰী আৰু অন্য লোকসকলকো ততাতৈয়াকৈ নিৰাপদে বাহিৰলৈ উলিয়াই অনা হয় ।
এই সন্দৰ্ভত আৰক্ষীয়ে তথ্য লাভ কৰাৰ পাছতে আৰক্ষীৰ লগতে সেই স্থানত বোমা নিষ্কাশন দল উপস্থিত হৈ কাৰ্যালয় চৌহদটো পুংখানুপুংখভাৱে তালাচী চলায় ।
ইয়াৰে কিছু সময়ৰ পিছতে নাজাফগড়ৰ এছ ডি এমৰ কাৰ্যালয় আৰু দক্ষিণ-পশ্চিম জিলাৰ জিলা দণ্ডাধীশ (ডি এম)ৰ কাৰ্যালয়েও বোমা বিস্ফোৰণৰ ভাবুকি লাভ কৰে । তাৰ পাছতে আৰক্ষীয়ে অতি ক্ষিপ্ৰতাৰে এই দুয়োটা কাৰ্যালয় খালী কৰি তাত তদন্ত আৰম্ভ কৰে ।
তথ্য অনুসৰি, নিৰাপত্তাৰ প্ৰতি লক্ষ্য ৰাখি সতৰ্কতামূলক ব্যৱস্থা হিচাপে সংশ্লিষ্ট সকলোকেইটা কাৰ্যালয় খালী কৰা হয় । সম্প্ৰতি কোনো বিস্ফোৰক সামগ্ৰী উদ্ধাৰ হোৱা নাই যদিও সমগ্ৰ চৌহদত বোমা নিষ্কাশনকাৰী দলে অতি সতৰ্কতাৰে তালাচী চলাই আছে ।
এই ঘটনাৰ পিছত অঞ্চলটোত আতংকময় পৰিৱেশৰ সৃষ্টি হয় । আৰক্ষী আৰু প্ৰশাসনে ৰাইজক শান্তি বজাই ৰাখিবলৈ আহ্বান জনাইছে । ঘটনাৰ পিছতে সকলো চৰকাৰী কাৰ্যালয়তে নিৰাপত্তা বৃদ্ধি কৰা হৈছে আৰু বিষয়টোৰ গুৰুত্ব বিবেচনা কৰি আৰক্ষীয়ে প্ৰতিটো দিশৰ পৰা তদন্ত কৰি আছে ।
