চীনাৰ পৰা জাপানীজলৈকে... সলসলীয়াকৈ ক'ব পৰা চাহ দোকানী পূজাই ল'ব খোজে ডক্টৰেট ডিগ্ৰীও

বুদ্ধগয়া: সমগ্ৰ বিশ্বৰ আধ্যাত্মিক সাধনাৰ আশ্ৰয়স্থল বিহাৰৰ এখন ব্যস্ত গাঁৱত ২৫ বছৰীয়া পূজা কুমাৰীৰ চাহৰ বিপণিখনে লাভ কৰিছে বিশেষ চৰ্চা ৷ গয়াৰ মাঝাউলী বাংকট গাঁৱৰ বাসিন্দা এইগৰাকী মহিলাই দৰ্শনাৰ্থীক কেৱল সতেজ চাহ যোগান ধৰাই নহয়, বহু ভাষাত কথা-বতৰা পাতি জনাই উষ্ম আদৰণি ৷

পূজাৰ আছে এক সংগ্ৰামৰ কাহিনী, যিয়ে বহুতকে অনুপ্ৰাণিত কৰে । এই যাত্ৰাৰ কথা সুঁৱৰি তেওঁ কয়, ‘‘মোৰ বিশ্বাস কোনো কামেই অসাৰ নহয় । প্ৰথম অৱস্থাত মোৰ লাজ লাজ লাগিছিল যদিও তাৰ পিছত চাহ বিক্ৰী কৰি আনন্দ ল’বলৈ ধৰিলো । এতিয়া মই এই কামকে ভালপাওঁ । চাহৰ দোকানখনৰ বাবেই পৃথিৱীৰ বিভিন্ন প্ৰান্তৰ ইমানবোৰ মানুহ লগ পাইছো ৷ বিদেশী যুৱতী আৰু মহিলাসকল মোৰ বন্ধু হৈ পৰিছে ৷’’ পূজাই কয় ।

নিজৰ বিপণিত পূজা (ETV Bharat)

পূজাৰ আত্মনিৰ্ভৰশীলতা আৰু শিক্ষাৰ প্ৰতি থকা প্ৰেমে তেওঁক চাহ বিক্ৰেতাতকৈও অনন্য কৰি তুলিছিল । ঐতিহাসিক চহৰখন ভ্ৰমণ কৰা বহু বিদেশীৰ বাবে পূজা আজি বহুভাষী, ভাষাবিদ আৰু বন্ধু ।

সংগ্ৰামৰ পৰা সফলতালৈ

পূজাৰ সফলতাৰ পথ আৰু চাহৰ দোকানৰ মালিক হোৱাৰ এই যাত্ৰা সহজ নাছিল । নৱম শ্ৰেণীত পঢ়ি থাকোঁতেই শ্ৰমিক উপেন্দ্ৰ কুমাৰৰ সৈতে বিবাহপাশত হয় ৷ স্বামীৰ দৈনিক মজুৰিৰ পৰা হোৱা সামান্য উপাৰ্জনৰ পিছতো পূজাই আৰ্থিক প্ৰত্যাহ্বানৰ মাজতে পঢ়া-শুনা আৰু স্বচ্ছল জীৱনৰ সপোন দেখাটো কেতিয়াও বন্ধ নকৰিলে ।

পূজাৰ বিপণিৰ চাহে লাভ কৰিছে জনপ্ৰিয়তা (ETV Bharat)

২০২৩ চনত পৰিয়ালটোৱে বৃহৎ আৰ্থিক সমস্যাৰ সন্মুখীন হৈছিল ৷ তেতিয়াই তেওঁ স্বামীক সকাহ দিবলৈ জীৱিকাৰ বাবে বুদ্ধগয়ালৈ যোৱাৰ সিদ্ধান্ত লৈছিল । তাত তেওঁ এখন চাহৰ বিপণি খোলে, যাৰ দ্বাৰা পৰিয়ালটোৱে আৰ্থিকভাৱে সহায় লাভ কৰিবলৈ ধৰিলে ৷ সমান্তৰালকৈ শিক্ষাগ্ৰহণ কৰি যোৱাৰ লগে লগে ই তেওঁৰ শৈক্ষিক কেৰিয়াৰৰ এক টাৰ্ণিং পইণ্ট হিচাপে প্ৰমাণিত হয় ৷ শৈক্ষিক সফলতাৰ পিছতো পূজাই চাহৰ দোকানখন চলাবলৈ আক্ষেপ কৰা নাই ।

পূজাৰ চাহৰ বিপণিত এদল বিদেশী বন্ধু (ETV Bharat)

‘‘মই পি এইচ ডি ডিগ্ৰী লাভ কৰি অধ্যাপক হ’ব বিচাৰো, কিন্তু পৰিয়ালৰ দায়িত্ব গুৰুত্বপূৰ্ণ । এতিয়া মোৰ কামক লৈ গৌৰৱ অনুভৱ কৰিছো ৷ কেৱল টকাৰ কথা নহয়, মই লগ পোৱা মানুহবোৰৰ লগতে বিভিন্ন ভাষা শিকাৰো সুযোগ পাইছো ৷’’ তেওঁ কয় ।

একাধিক ভাষাত দখল

কেতিয়াও শিকিবলৈ বন্ধ নকৰাৰ বাবে বুদ্ধগয়াৰ দৰ্শনাৰ্থীৰ মাজত কেইবাটাও ভাষাৰ পণ্ডিত হিচাপে পৰিচিত পূজা ৷ দৈনিক বিদেশী লোকক লগ পোৱাৰ লগে লগে ভাষাৰ প্ৰতিও তেওঁৰ প্ৰেম বাঢ়ি আহিছে ।

স্বামীয়েও তেওঁৰ পঢ়া-শুনা আগবঢ়াই নিবলৈ উৎসাহিত কৰিছিল । মেট্ৰিক, ইণ্টাৰমিডিয়েট আৰু স্নাতক ডিগ্ৰী সম্পূৰ্ণ কৰাৰ পিছত মগধ বিশ্ববিদ্যালয়ৰ পৰা স্নাতকোত্তৰ ডিগ্ৰী (এম এ) লাভ কৰে এইগৰাকী মহিলাই ।

“মই ইংৰাজী, জাপানীজ, চীনা, থাই আৰু আমেৰিকান ইংৰাজীকে ধৰি বহু ভাষা শিকিছো । ময়ো ভাৰতৰ বিভিন্ন ৰাজ্যৰ ভাষা বুজো ৷’’ পূজাই গৌৰৱেৰে প্ৰকাশ কৰে ৷

বিদেশী বন্ধুৰ সৈতে পূজা (ETV Bharat)

বহু ভাষাত সাৱলীলভাৱে কথা ক’ব পৰাৰ ক্ষমতাই পূজাৰ চাহৰ বিপণিখনক পৃথক কৰি তুলিছে আৰু তেওঁ আটাইতকৈ মূল্যৱান সম্পদ হিচাপে প্ৰমাণিত হৈছে ৷ কাৰণ বিদেশী লোকসকলক আনৰ সৈতে যোগাযোগ কৰাত সহায় কৰে পূজাই ।

‘‘মই মোৰ ভাষাৰ দক্ষতা ব্যৱহাৰ কৰি এনে এক স্থান সৃষ্টি কৰিলো, য’ত সমগ্ৰ বিশ্বৰ লোকসকলে ঘৰত থকাৰ দৰে অনুভৱ কৰিব পাৰে । সেইবাবেই মোৰ দোকানখন সদায় বিদেশীৰে ব্যস্ত হৈ থাকে ৷’’ পূজাই লগতে কয় ।

বিদেশী অতিথিৰ বাবে এজন বন্ধু

পূজাই বহু বিদেশী বন্ধুও পাইছে যিয়ে তেওঁৰ চাহৰ দোকানলৈ অহাৰ লগতে নিজৰ বন্ধু-বান্ধৱী আৰু পৰিয়ালৰ লোককো লৈ আহে । হিন্দী আৰু ইংৰাজী ভাষাত যোগাযোগত অসুবিধাৰ সন্মুখীন হোৱাসকলৰ বাবে পূজা দোভাষী হৈ পৰে ।

জাপানৰ পৰা অহা তেওঁৰ নিয়মীয়া গ্ৰাহক একি ইয়ামাদা পূজাৰ ঘনিষ্ঠ হৈ পৰিছে আৰু এই বন্ধনে ভাষাক অতিক্ৰম কৰিছে । তেওঁলোকৰ কথা-বতৰাবোৰো প্ৰতিবাৰৰ ভ্ৰমণতে মৰম, হাঁহি আৰু আলিংগনেৰে ভৰি থাকে ।

“মই ইয়ালৈ প্ৰায়ে আহিছো কাৰণ পূজাই জাপানীজ কয় আৰু তেওঁৰ বিপণিত পোৱা চাহৰ সোৱাদ অবিশ্বাস্য ৷ পূজাৰ চাহে ঘৰৰ অনুভৱ আনে । আমি জাপানীজ ভাষাত কথা পাতো আৰু মই ইয়াত চাহ খাই জিৰণি ল’ব পাৰো ৷" সৰু কাপ এটাত চুমুক দি একিয়ে কয় ।

শিক্ষণৰ সুযোগ

পূজাৰ দক্ষতাই ওচৰৰ দোকানীসকলকো উপকৃত কৰিছে ৷ কাৰণ তেওঁলোকে বিদেশী গ্ৰাহকৰ সৈতে মোকাবিলা কৰিবলৈ পূজাৰ সহায় বিচাৰি আহে ৷ ‘‘মই তেওঁলোকক ইংৰাজী আৰু অন্যান্য ভাষা শিকাওঁ, যাতে তেওঁলোকে আন্তঃৰাষ্ট্ৰীয় দৰ্শনাৰ্থীৰ সৈতেও সংযোগ স্থাপন কৰিব পাৰে । সমাজখনক ওভতাই দিয়াৰ এয়া এটা সৰু উপায় ৷’’ তেওঁ কয় ।

তেওঁ নিজৰ সন্তানৰ ভাষাৰ দক্ষতাও বৃদ্ধি কৰিছে যাতে সিহঁতে কেইবাটাও ভাষাৰ জ্ঞানেৰে উপকৃত হ’ব পাৰে ৷ ‘‘মই বিচাৰো যে তেওঁলোকেও মোৰ দক্ষতাক অতিক্ৰম কৰি যিমান পাৰে সিমান ভাষা শিকিব ৷’’ পূজাই কয় ।

এক ক্ৰমবৰ্ধমান ব্যৱসায়

পূজাৰ চাহৰ দোকানখনো ইয়াৰ অসামান্য দিশৰ বাবে জনপ্ৰিয় । তেওঁ ১০ আৰু ২০ টকাত চাহ বিক্ৰী কৰে, ২০ টকীয়া কাপটো বহিঃৰাজ্যৰ পৰা অহা দৰ্শনাৰ্থীৰ প্ৰিয় । চৌপাশ যিয়েই নহওক কিয়, কেৱল চাহ বিক্ৰীৰ পৰাই মাহে ১০ হাজাৰতকৈ অধিক টকা উপাৰ্জন কৰে পূজাই ৷ চাহৰ বাহিৰেও তেওঁ জলপান বিক্ৰী কৰে, যাৰ ফলত অধিক লাভান্বিত হৈছে ৷

“যদিও মই এখন সৰু চাহৰ দোকান চলাইছো, যিটো মৌলিকভাৱে এটা ব্যৱসায়, মোৰ বাবে ই ইয়াতকৈ বহু বেছি । ই এনে এখন ঠাই, য’ত মানুহ একত্ৰিত হয়, শিকে আৰু ধাৰণাবোৰৰ বিনিময় কৰে । মই আনন্দিত যে মই যি কাম কৰি আছো সেয়া কৰি যাব পাৰিম ৷’’ পূজাই কয় ।

লগতে পঢ়ক: চামুচৰ পৰা বেজীলৈকে, কটাৰীৰ পৰা কলমলৈকে... পেটৰ পৰা নোলাল কি ! - EQUIPMENT IN STOMACH